ភ្នំពេញៈ ការដាក់ឲ្យជួបគ្នារវាងជើងខ្លាំងជំនាន់ក្រោយរបស់កម្ពុជា វង្ស វិឆ័យ និងម្ចាស់ខ្សែក្រវាត់មកពីថៃ Ao Vantan ដែលត្រូវបានខកខានចំនួន ២ លើកកន្លង ដោយសារបញ្ហាសុខភាពកីឡាករនោះនឹងត្រូវបានផ្គូផ្គងជាថ្មី ចំណែកគណៈកម្មការផ្គូផ្គង និងប្រតិភូនាំកីឡាករថៃមកប្រកួតបានអះអាងថា វត្តមានរបស់អ្នកប្រដាល់ជើងខ្លាំងទាំង ២ បានត្រៀមរួចរាល់ ដើម្បីប្រកួតគ្នាតាមការកំណត់នៅលើសង្វៀន SEATV នាល្ងាចថ្ងៃសៅរ៍នេះ។
តាមបទពិសោធប្រកួតលើសង្វៀនកីឡាករថៃ Ao Vatan ជាជើងចាស់មានបទពិសោធប្រកួតយូរជាង ចំណែក វង្ស វិឆ័យ ទើបតែលេចធ្លោល្បីក្នុងឆ្នាំ ២០១៩ ប៉ុណ្ណោះគឺ Ao Vatan ប្រកួតច្រើនជាង វង្ស វិឆ័យ រហូតដល់ ៤៤ ដង ព្រោះ វិឆ័យ ធ្លាប់ប្រកួតបាន ៦៦ ដង ឈ្នះ ៦០ និងចាញ់តែ ៦ ដងទេ ប៉ុន្តែ Ao Vatan ធ្លាប់ប្រកួតបាន ១១០ ឈ្នះ ៨៩ ចាញ់ ១៩ និងស្មើ ២ ដងហើយការបង្ហាញខ្លួន ៥ លើកនៅស្រុកខ្មែរ គេបានឈ្នះ រឿង សោភ័ណ្ឌ ២ លើក ឈ្នះ ធឿន ធារ៉ា ២ ដង និងចាញ់ ឡៅ ចន្ទ្រា ១ ដង។
លោក ហង្ស ស៊ឺន ជាគ្រូបង្វឹកបាននិយាយថា៖ «វង្ស វិឆ័យ កំពុងហ្វឹកហាត់ត្រៀមបានល្អសម្រាប់ការប្រកួតជាមួយថៃ Ao Vatan។ វិឆ័យ មានប្រៀបត្រង់កម្ពស់ខ្ពស់ជាង កម្លាំងរឹងមាំជាងតែគ្នាមានបទពិសោធ ឡើងសង្វៀនបានចំនួនតិចទេ បើប្រៀបធៀបជាមួយគេ។ ហេតុ នេះចាញ់ ឬឈ្នះ មិនទាន់អាចនិយាយមុនបានទេ ព្រោះសុទ្ធតែជាកីឡាករលំដាប់ខ្លាំងទម្ងន់ធ្ងន់ វ៉ៃសម្រុកគ្មានសំចៃកម្លាំងដូចគ្នាគឺបើខាងណាវ៉ៃចូលគោលដៅល្អមុននឹងមានប្រៀបមិនខាន»។
លោក ញាណ សុធី នាយកគ្រប់គ្រងកម្មវិធីប្រដាល់នៅ SEATV បាននិយាយថា៖ «គូនេះធ្លាប់ផ្គូផ្គងលើកមុនឲ្យប្រកួតគ្នា ប៉ុន្តែខកខានដោយបញ្ហាសុខភាព ហើយលើកនេះយើងបានត្រៀមរួចរាល់ ដើម្បីការប្រកួតដ៏អស្ចារ្យនេះ ខណៈដែលអ្នកទស្សនាជាច្រើនចង់ឃើញជំនួបប្រកួតនេះ»។
ចំណែកលោក ថៃ អ៊ូ ប្រតិភូនាំកីឡាករេថៃមកប្រកួតបានប្រាប់ថា៖ «កីឡាករ Ao Vatan បានហ្វឹកហាត់ត្រៀមរួចហើយគឺលើកនេះមិនខកខានទៀតទេ។ សម្រាប់ការប្រកួតរបស់គូនេះពិតជាសំខាន់ និងអស្ចារ្យ ហើយសូម្បីតែតម្លៃខ្លួនប្រកួតរបស់វាក៏ថ្លៃលើសកីឡាករថៃផ្សេងៗដែរ ប៉ុន្តែបញ្ហាខាតលុយ ឬចំណាយធំមិនសំខាន់ទេ បញ្ហាសំខាន់គឺមកប្រកួតម្តងៗធ្វើម៉េចឲ្យទាក់ទាញបំផុតសម្រាប់មហាជន»។
លោក ថៃ អ៊ូ បានបង្ហើបថា សមត្ថភាពរបស់ Ao Vatan នៅថៃមានតម្លៃខ្ពស់ជាងនៅខ្មែរដល់ទៅ ២ ឬ ៣ ដងឯណោះ ហើយការមកប្រកួតនេះគឺដើម្បីមិត្តភាពគូឯកប្រចាំសប្តាហ៍ដែលភាគីប្រតិភូយើងទាំង ២ ផ្តល់សហការគ្នាឲ្យបានល្អ។ ដោយឡែកកីឡាករ ផាន រះ ត្រូវដាក់ប្រកួតមិត្តភាពជាមួយម្ចាស់ខ្សែក្រវាត់ Phat Ngam ក្នុងទម្ងន់ ៦០ គីឡូក្រាមនៅថ្ងៃសៅរ៍នោះដែរ ហើយប្រភពជាច្រើនបានលើកឡើងថា បើវ៉ៃគ្នាមែនទែនអស់ពីសមត្ថភាព ផាន រះ មិនអាចឈ្នះថៃបានទេ៕