The Phnom Penh Post Search

Search form




Logo of Phnom Penh Post newspaper Phnom Penh Post - ជើង​ខ្លាំង វី ​សម្ផស្ស​ នឹង​ត្រូវ​បញ្ជូន​ទៅ​ហាត់​នៅ​ចិន​ ៥​ឆ្នាំ​​​ត្រៀមស៊ីហ្គេម ២០២៣




ជើង​ខ្លាំង វី ​សម្ផស្ស​ នឹង​ត្រូវ​បញ្ជូន​ទៅ​ហាត់​នៅ​ចិន​ ៥​ឆ្នាំ​​​ត្រៀមស៊ីហ្គេម ២០២៣

Content image - Phnom Penh Post
កីឡាករ​ប្រដាល់​សកល វី សម្ផស្ស នឹង​ត្រូវ​បញ្ជូន​ឲ្យ​ទៅ​ហ្វឹក​ហាត់​នៅ​ចិន​រយៈ​ពេល​៥​ឆ្នាំ ដើម្បី​ត្រៀមស៊ីហ្គេម ឆ្នាំ​២០២៣។ យឺន ពន្លក

ជើង​ខ្លាំង វី ​សម្ផស្ស​ នឹង​ត្រូវ​បញ្ជូន​ទៅ​ហាត់​នៅ​ចិន​ ៥​ឆ្នាំ​​​ត្រៀមស៊ីហ្គេម ២០២៣

ភ្នំពេញៈ ​អ្នក​ប្រ​ដាល់​សកល​វ័យ​ក្មេង​របស់​កម្ពុជា​ ​វី​ សម្ជស្ស​ ដែល​កើត​ចេញ​ពី​ការ​បណ្តុះ​បណ្តាល​របស់​សហព័ន្ធ​កីឡា​ប្រដាល់​​កម្ពុជា ​បាន​ក្លាយ​ជា​អ្នក​លេង​កណ្តាប់​ដៃ​ជំនាន់​ក្រោយ ដែល​មាន​ទេពកោសល្យ និង​​ សមត្ថ​ភាព​គ្រប់​គ្រាន់ ក្នុងការ​ប្រកួតតំណាង​ឲ្យ​កម្ពុជា នៅ​លើ​ឆាក​អន្តរជាតិ ពិសេស​ការ​ប្រកួត​ស៊ីហ្គេម ឆ្នាំ​ ២០២៣ ដែល​កម្ពុជា ត្រូវ​ធ្វើ​ជាម្ចាស់​ផ្ទះ។

ជាមួយ​​ភាព​អំណោយ​ផល​ផ្នែក​កាយ​សម្បទា​ពី​ធម្ម​ជាតិ ដោយ​​មានកម្ពស់​ ១,៧២ ​ម៉ែត្រ និង​មាន​ទម្ងន់ ​៦៤ ​គីឡូក្រាម វី សម្ផស្ស ​បាន​ជាប់​ជម្រើស​ជាតិ​ ផ្នែក​ប្រដាល់​សកល ​តាំង​​ពី​ក្រុម​យុវជន​ថ្នាល ហើយបាន​បន្ត​ជាប់​ជម្រើសជាតិ នា​ពេល​កន្លង​មក​នេះ ហើយ​នៅ​ពេល​នេះ វី សម្ផស្ស គឺ​ជា​បេក្ខភាព ដែល​​សហព័ន្ធ​កីឡា​ប្រដាល់​កម្ពុជា ត្រៀម​បញ្ជូន​ទៅ​ហ្វឹក​ហាត់​ រយៈ​ពេល​វែង ​នៅ​ចិន ដើម្បី​ត្រៀម​ការ​ប្រកួត​ស៊ីហ្គេម ឆ្នាំ​ ២០២៣។

លោក ​ប៊ុយ ​សុ​ភ័ណ្ឌ ​អគ្គ​លេខាធិការ​សហព័ន្ធកីឡា​ប្រ​ដាល់​សកល​កម្ពុជា បាន​ប្រាប់​​ថា​៖ «កីឡាករ ​វី ​សម្ផស្ស​ ​ជា​បេក្ខភាព​ទី​១ ​ដែលសហព័ន្ធ ​គ្រោង​ដាក់​ឲ្យទៅ​​ហ្វឹក​ហាត់​នៅ​ប្រ​ទេស​​ចិន ​រយៈ​ពេល​ ៥ ​ឆ្នាំ ​មុន​នឹង​ព្រឹត្តិការណ៍​ស៊ី​ហ្គេ​ម ឆ្នាំ​ ២០២៣ មក​ដល់​ ព្រោះ​​ចិន ​មាន​គម្រោង​ផ្តល់​ឲ្យ​យើង​នូវ​កីឡាករ ​១០ ​នាក់ ​សម្រាប់​ចេញ​ទៅ​ហ្វឹក​ហាត់​ ស្នាក់​នៅ​ និង​ រៀន​ភាសា​ចិន នៅ​ប្រទេស​ចិន ​ក្នុង​រយៈ​ពេល​ ៥​ ឆ្នាំ ដោយ​​​ទទួល​បាន​ប្រាក់​ខែ​ទៀត​ផង»​។​​

ចំណែក លោក ​វ៉ែន ​សុផល ​គ្រូ​បង្វឹក​ជម្រើស​ជាតិ​ផ្នែក​ប្រ​ដាល់​សកលកម្ពុជា ​​បាន​ប្រាប់​​ថា​៖ «​កីឡាករ​ វី​ សម្ផស្ស​ ធ្លាប់​ជាប់​ជា​កីឡាករ​ជម្រើស​ជាតិ​ថ្នាល​ និង​ឈុត​ធំ​កន្លង​មក​ ហើយ​​កាល​ពី​សប្តាហ៍​មុន ​កីឡាករ​វ័យ​ក្មេង​រូប​នេះ​ ទើប​តែ​ប្រកួត​ឈ្នះ​ជើង​ឯក​ជាតិ​ និង​បាន​មេដាយ​មាស​ ប្រចាំ​ឆ្នាំ​ ២០១៧​ ដោយ​បាន​ផ្តួល​កីឡាករ​ជើង​ចាស់​មួយ​ចំនួន​ មាន​ដូច​ជា ឡុង​ សុវណ្ណឌឿន​ និង ​នួន ​មុន្នី ជា​ដើម​ គឺ​រូប​គេ​​មាន​លក្ខណៈ​ សម្បតិ​ល្អ​ ទាំង​សមត្ថ​ភាព រាង​កាយ​ កម្ពស់ ​សុខភាព​ និង ​ការ​គោរព​វិន័យ​បាន​ល្អ ​ផង​ដែរ»​។​

បើ​តាម​ លោក ​ប៊ុយ ​សោភ័ណ្ឌ​ ​គឺ វី​ សម្ផស្ស​ មាន​សមត្ថភាព​ល្អ ​ជា​បេក្ខភាព​ត្រូវ​ចេញ​ទៅ​ប្រ​កួត​ស៊ី​ហ្គេម​ នៅ​ប្រទេស​ម៉ាឡេស៊ី កន្លង​មក ​ប៉ុន្តែ ​​បាន​​ខក​ខាន ​ដោយសារ​​មាន​អាយុ​មិន​គ្រប់​។

វី ​សម្ផស្ស​ ​ជា​ប្អូន​បង្កើត​របស់កីឡាករ ​វី ​សាវុធ កីឡាការិនី ​វី ​ស្រី​ខួច និង ​វី ស្រី​ឆាយ​ ដែលអ្នក​ទាំង​នេះ ​សុទ្ធតែ​ជា​អ្នកប្រយុទ្ធ​ឆ្នើម​ ​​មាន​ប្រភេព​ចេញ​ពីគ្រួ​សារ​ក្រី​ក្រ​មួយ ប៉ុន្តែ ​​គ្រួសារ​មួយនេះ អាច​​អភិវឌ្ឍជីវភាព​បាន​ប្រសើរ​ជាង​មុន ក្នុង​ពេល​បច្ចុប្បន្ន ​តាម​រយៈ​ការ​ឡើង​ប្រកួត​យក​ប្រាក់​តម្លៃ​ខ្លួន និង ​ប្រាក់​រង្វាន់ផ្សេងៗ​ទៀត ​របស់​អ្នកទាំង​៤​នេះ​។​

កីឡាករ វី​ សម្ផស្ស​ បាន​និយាយ​ថា​៖ «សម្រាប់​​ដំណឹង​ គ្រោង​ចេញ​ទៅ​ហាត់​នៅ​ប្រ​ទេស​ចិននេះ ​គឺ​លោក​គ្រូ​របស់​ខ្ញុំ ​បាន​ប្រាប់ខ្ញុំ​​រួច​ហើយ​ ហើយ​​ ខ្ញុំ​ពេញ​ចិត្តខ្លាំង ​និង​កំពុង​រង់​ចាំ​ដោយ​សប្បាយ​ចិត្ត​បំផុត»​៕​

Content image - Phnom Penh Post
កីឡាករ​ប្រដាល់​សកល វី សម្ផស្ស នឹង​ត្រូវ​បញ្ជូន​ឲ្យ​ទៅ​ហ្វឹក​ហាត់​នៅ​ចិន​រយៈ​ពេល​៥​ឆ្នាំ ដើម្បី​ត្រៀមស៊ីហ្គេម ឆ្នាំ​២០២៣។ យឺន ពន្លក

អត្ថបទគួរចាប់អារម្មណ៍