ភ្នំពេញ៖ អ្នកប្រដាល់ សៅ វណ្ណា របស់ក្លិបវាលស្បូវច្បារអំពៅនៃសមាគមប្រដាល់ក្រសួងមហាផ្ទៃដែលទើបបានវិលមកកាន់សង្វៀនប្រដាល់ ក្រោយឃ្លាតពីសង្វៀនជិត ៣ ឆ្នាំ ដោយរងរបួសធ្ងន់ធ្ងរបន្ទាប់កីឡាករថៃ Ram Boy វាយក្បាច់ជង្គង់ឲ្យសន្លប់យ៉ាងគ្រាំគ្រា នៅសង្វៀនប៉ុស្តិ៍លេខ ៥ នោះ នឹងត្រូវជួបជើងខ្លាំងវ័យក្មេងជាក្រុមថ្នាលជម្រើសជាតិ ថៃ រ៉េត នៅលើសង្វៀន SEATV នាថ្ងៃសៅរ៍នេះ។
កាលវិលមកកាន់សង្វៀនវិញ របស់ សៅ វណ្ណា ចំនួន ៣ លើក ក្នុងអំឡុងការប្រកួតបិទទ្វារដោយស្ថានភាពជំងឺកូវីដ ១៩ នេះ គឺបានឈ្នះទាំង ៣ លើក គួរឲ្យកត់សម្គាល់ ពិសេសបានឈ្នះ ពុទ្ធ សំបូរ នៅសង្វៀនថោន និងឈ្នះ សោម វិឆ័យ ដែលសុទ្ធតែអ្នកប្រដាល់កំពុងមានសមត្ថភាពលេចធ្លោ។
លោក ម៉ៃ សុភា គ្រូបង្វឹក សៅ វណ្ណា បានប្រាប់ថា៖ «ឥឡូវ សៅ វណ្ណា វិលមកប្រកួតវិញហើយ ដោយសារសុខភាពបានប្រសើរជាងមុន ចំណែកតម្លៃខ្លួនប្រកួតមានសង្វៀនខ្លះបានផ្តល់ជូនដូចប្រកួតជាមួយកីឡាករបរទេស គឺបាន ៤០០ ដុល្លារ ក្នុង ១ លើក»។
គ្រូបង្វឹករូបនេះ បន្ថែមថា៖ «សៅ វណ្ណា ជាកីឡាករល្អ ហេតុនេះបើសិនជាមានអ្នកថែទាំ និងជួយទំនុកបម្រុងជីវភាព គឺសមត្ថភាពរបស់គេ កាន់តែល្អថែមទៀត ព្រោះគ្នាក្រីក្របំផុត។ ចំណែកការជួប ថៃ រ៉េត លើកនេះ ខ្ញុំសង្ឃឹមឈ្នះដល់ទៅ ៨០ ភាគរយ ព្រោះបទពិសោធ និងហ្វឹកហាត់បានល្អ ហើយសុខភាពក៏ល្អដែរ»។
តាមប្រវត្តិប្រកួត សៅ វណ្ណា ធ្លាប់ប្រកួតបាន ៣៦ ដង និងចាញ់តែ ៤ លើកទេ ក្នុងនោះធ្លាប់ឈ្នះពានទីហ្វីវគ្គផ្តាច់ព្រ័ត្រនៅសង្វៀនប៉ុស្តិ៍លេខ ៥ ដែរ ក្រោយយកឈ្នះកីឡាករ អ៊ំ វណ្ណេត។ ប៉ុន្តែក្រោយមក សៅ វណ្ណា ត្រូវបានលាឈប់ពីសង្វៀនទៅនៅស្រុកកំណើត ស្ថិតនៅឃុំសំពោងជ័យ ស្រុកព្រៃឈរ ខេត្តកំពង់ចាម ក្រោយកីឡាករថៃ Ram Boy បានវាយក្បាច់ជង្គង់ឲ្យសន្លប់យ៉ាងគ្រាំគ្រា និងរងរបួសធ្ងន់ធ្ងរបាក់កម្លាំង។
ចំណែក ថៃ រ៉េត របស់ក្លិបកងពលតូចទ័ពពិសេសឆត្រយោង ៩១១ ជាកីឡាករទើបតែល្បីល្បាញ ក្រោយចូលប្រឡូកប្រដាល់ក្នុងឆ្នាំ ២០១៩ ហើយឆ្នាំ ២០២០ នេះ ថៃ រ៉េត ជាជម្រើសជាតិថ្នាលគុនខ្មែរ។ ប្រវត្តិប្រកួតរបស់គេល្អ ដោយប្រកួតភាគច្រើនឈ្នះជានិច្ច គឺសូម្បីជើងចាស់មួយចំនួន ក៏លំបាកឈ្នះគេដែរ។
លោក ហង្ស ស៊ឺន គ្រូបង្វឹក ថៃ រ៉េត មិនអាចទាក់ទងបាន ប៉ុន្តែមន្ត្រីគណៈកម្មការផ្គូផ្គងប្រាប់ភ្នំពេញប៉ុស្តិ៍ថា ពីដំបូងផ្គូផ្គង សៅ វណ្ណា ជាមួយ ជា សំនៀង ដែលជាសិស្សច្បង ថៃ រ៉េត ប៉ុន្តែចុងក្រោយខាងក្លិប គេសុំដូដាក់កីឡាករ ថៃ រ៉េត វិញ ដែលអាចមកពីគេយល់ថា ថៃ រ៉េត ខ្លាំងជាង និងស័ក្តិសមជាង។
លោក ញាន សុធី អ្នកគ្រប់គ្រងការប្រកួតនៅសង្វៀនអាស៊ីអាគ្នេយ៍ បានប្រាប់ថា៖ «គូពិសេសទី៣ នេះ មានសមត្ថភាពល្អដូចគ្នា។ ថៃ រ៉េត ខ្ចីវស្សាជាង ប៉ុន្តែកម្លាំងល្អជាង និងចិត្តមោះមុតដូចគ្នា។ ទោះជាយ៉ាងណា ដោយសារសង្វៀន SEATV ជិតផ្អាកការប្រកួត ព្រោះមិនទាន់មានដៃគូឧបត្ថម្ភ ហេតុនេះតម្លៃខ្លួនប្រកួតរបស់គូនេះ គិតត្រឹមតម្លៃប្រកួត ជាកីឡាករខ្មែរធម្មតា គឺឈ្នះ ឬចាញ់ ក្នុងរង្វង់ ៥០ ម៉ឺនរៀលប៉ុណ្ណោះ ដោយយើងពុំទាន់មានលទ្ធភាពគិតដូចប្រកួតជាលក្ខណៈអន្តរជាតិនៅឡើយ»៕