The Phnom Penh Post Search

Search form




Logo of Phnom Penh Post newspaper Phnom Penh Post - ជើងចាស់​សៀវ ង៉ុយ និង​ជើង​ថ្មី​ឡុង ឡា ឈ្នះ​ថៃ​ដូចគ្នា




ជើងចាស់​សៀវ ង៉ុយ និង​ជើង​ថ្មី​ឡុង ឡា ឈ្នះ​ថៃ​ដូចគ្នា

Content image - Phnom Penh Post
កីឡាករ​ថៃ Phanoun រង​ការ​វាយ​ឲ្យ​សន្លប់​ពី​កីឡាករ​កម្ពុជា​សៀវ ង៉ុយ។ យឺន ពន្លក

ជើងចាស់​សៀវ ង៉ុយ និង​ជើង​ថ្មី​ឡុង ឡា ឈ្នះ​ថៃ​ដូចគ្នា

ភ្នំពេញ: កីឡាករ​ចាស់វស្សា​សៀវ ង៉ុ​យ មកពី​កង​អន្តរាគមន៍​លេខ ២ ក្រសួង​ការពារ​ជាតិ ដែល​ធ្លាប់​ជា​អ្នក​ប្រដាល់​ជើង​ខ្លាំង ១ រូប ប៉ុន្តែ​បាត់​ភាព​ល្បី​ល្បាញ​ពី​សង្វៀន​មួយ​រយៈ​កន្លង​មក​នោះ​បាន​វិល​មក​ប្រកួត​ជាមួយ​កីឡាករ​ថៃ ដោយ​ផ្តួល​ឲ្យ​សន្លប់​ត្រឹម​ទឹក​ទី ២។

ចំណែក​ជើង​ថ្មី​ឡុង ឡា ដែល​មក​តាំង​ពី​ខេត្ត ឧត្តរ​មានជ័យ បាន​ប្រកួត​ជាមួយ​កីឡាករ​ថៃ Phanoun Nom និង​ទទួល​បាន​លទ្ធផល​ឈ្នះ​ពិន្ទុ​គួរ​ឲ្យ​កត់​សម្គាល់ នៅ​សង្វៀន​អាស៊ី​អាគ្នេយ៍។

មួយរយៈ​នេះ​សៀវ ង៉ុ​យ ហាក់បីដូចជា​ធ្លាក់ចុះ​ប្រិយភាព ខណៈដែល​ការ​ប្រកួត​របស់​គេ​គ្មាន​ភាព​ទាក់​ទាញ​មហាជន​សោះ ប៉ុន្តែ​ការ​ប្រកួត​កាល​ពី​ល្ងាច​ថ្ងៃ​សៅរ៍ រូបគេ​ធ្វើ​បាន​ល្អ​ក្នុង​ពេល​ជួប​កីឡាករ​ថៃ Rak Samyan ដែល​តស៊ូ​បាន​ត្រឹម​តែ ២ ទឹក​ប៉ុណ្ណោះ។

ជ័យជម្នះ​របស់​កីឡាករ​ទាំង ២ បានធ្វើ​ឲ្យ​អ្នកទស្សនា​ភាគច្រើន​កោត​សរសើរ ដែល​អាច​នឹង​ធ្វើ​ឲ្យ​ពួកគេ​មាន​ប្រជា​ប្រិយ​ភាព​ឡើង​វិញ។

សៀវ ង៉ុយ មាន​ទម្លាប់​មិន​ដេញ​វាយ​លើ​ដៃគូ​មុន​ទេ ហេតុ​នេះ​ភាព​ទាក់​ទាញ​ហាក់បី​ដូច​កាន់​តែ​ធ្លាក់​ចុះ​ទៅៗ ប៉ុន្តែ​ការ​ប្រកួត​លើក​នេះ រូបគេ​បាន​ចេញ​ស្នៀត​ទាត់​ជង្គង់ ព្រមទាំង​ចូល​វាយ​កែង​បាន​ល្អ​គួរ​ឲ្យ​ជក់​ចិត្ត ខណៈ​ដែល​ការ​ប្រកួត​ក្នុង​ទឹក​ទី ១ កីឡាករ​ថៃ​ហាក់បី​ដូច​រឹងមាំ ប៉ុន្តែ​ក្នុង​ពេល​ការ​ប្រកួត​ឈាន​ចូល​ដល់​ទឹក​ទី ២ សៀវ ង៉ុយ កាន់​តែ​មាន​ប្រៀប​ខ្លាំង​ឡើង។ អ្វី​ដែល​កត់​សម្គាល់​នៅ​ទឹក​ទី ២ គឺថា សៀវ ង៉ុយ បាន​ព្យាយាម​ទាត់​ជើង​ក្រោម​របស់​កីឡាករ​ថៃ Rak Samyan មាន​ប្រសិទ្ធ​ភាព​ល្អ​ខណៈ​ដែល​កីឡាករ​ថៃ​រូប​នោះ​មាន​សញ្ញា​បង្ហាញ​ការ​ឈឺ​ជើង។

ជាមួយ​គ្នា​នោះ លោក​អាជ្ញា​កណ្តាល​ណន រិទ្ធ បាន​ចាប់​កីឡាករ​ថៃ​រាប់​ដល់​ចំនួន ៨ ទើប​បន្ត​ការ​ប្រកួត​ទាំង​លំបាក​លំបិន មុន​នឹង​សៀវ ង៉ុយ​បាន​បន្ថែម​ស្នៀត​ធាក់​ចូល​មុខ និង​ទាត់​បន្ថែម​ចូល​ជើង​ក្រោម​បណ្តាល​ឲ្យ​កីឡាករ Rak Samyan ដួល​សន្លប់​ធំ សុំ​ចុះ​ចាញ់​ក្នុង​ចុង​ទឹក​ទី ២ តែ​ម្តង។

ចំណែក​កីឡាករ​ឡុង ឡា ដែល​ទើប​ទទួលបាន​ឱកាស​ប្រកួត​ជាមួយ​កីឡាករ​ថៃ​លើក​ទី ១ នោះ បាន​ប្រឹងប្រែង​អស់​ពី​លទ្ធភាព និង​ធ្វើ​ឲ្យ​អ្នក​ទស្សនា​ជក់​ចិត្ត។

បន្ថែម​លើសពីនេះ​ស្នៀត​វាយ​កែង និង​កណ្តាប់ដៃ​របស់គេ បានធ្វើ​ឲ្យ​កីឡាករ​ថៃ​បែក​ឈាម​នៅ​ទឹក​ទី ៣ ហើយ​អាជ្ញា​កណ្តាល​បញ្ជូន​ទៅ​ឲ្យ​គ្រូពេទ្យ​ជូត​ឈាម​ផង​ដែរ។ ទោះ​ជា​យ៉ាង​ណា លទ្ធផល​របស់​ឡុង ឡា បាន​ឈ្នះ​ត្រឹម​ពិន្ទុ​បន្ទាប់​ពី​ការ​ប្រកួត ៥ ទឹក​ប៉ុណ្ណោះ។

លោក​ញាន សុធី នាយក​គ្រប់គ្រង​កម្មវិធី​ប្រកួត បាន​កោត​សរសើរ​ចំពោះ​ការ​ប្រកួត​របស់​អ្នក​ទាំង ២ ដែល​មាន​ភាព​ទាក់​ទាញ​ជាង​មុន ដោយសារ​តែ​មាន ការ​ប្រឹង​ប្រែង​ល្អ​ជាង​មុន៕

អត្ថបទគួរចាប់អារម្មណ៍