.jpg)
ភ្នំពេញ៖ អ្នកប្រដាល់ជើងចាស់មានបទពិសោធច្រើន គង់ ហូវ និង សេន កុសល ហាក់មានការព្រួយបារម្ភទៅនឹងសមត្ថភាពរបស់ជើងថ្មីកំពុងលេចធ្លោ សេក ថាវរី និង សំ អាន នៅពេលអ្នកទាំង ៤ ត្រូវបានដាក់ឱ្យប្រកួតម៉ារ៉ាតុងដណ្តើមប្រាក់លាន ទម្ងន់ ៦០ គីឡូក្រាម ប្រចាំសប្តាហ៍ទី៦៨ នៅលើសង្វៀនថោន ថ្ងៃអាទិត្យនេះ។
កីឡាករ សេន កុសល ដែលធ្លាប់ជាជើងខ្លាំងក្នុងទម្ងន់ ៥៧ និង ៦០ គីឡូក្រាម គឺបានមកស្នាក់ និងហ្វឹកហាត់ជាមួយលោកគ្រូ ធន់ សុភា ចំណែកកីឡាករលំដាប់ខ្លាំង គង់ ហូវ ក៏បានមកស្នាក់នៅ និងហ្វឹកហាត់ជាបណ្តោះអាសន្នជាមួយលោកគ្រូ ជា រិទ្ធ ផងដែរ ប៉ុន្តែអ្នកទាំង ២ នេះ គិតថា បើសិនចាប់ឆ្នោតប៉ះ សំ អាន និង សេក ថាវរី ពិតជាលំបាកឈ្នះណាស់ព្រោះគេកម្លាំងថ្មី វ៉ៃសម្រុកខ្លាំងមិនញញើតនោះទេ។
លោក ធន់ សុភា ប្រាប់ថា៖ «កុសល មកហាត់ត្រៀមជាមួយខ្ញុំ ហើយស្ថានភាពដូចជាមិនសូវបានល្អ និងលំបាកឈ្នះជើងថ្មីៗណាស់ ព្រោះបើប៉ះជាមួយជើងថ្មីដូចជាកីឡាករ សំ អាន ពិតជាឧបសគ្គធំហើយ ហើយបើប៉ះ សេក ថាវរី ក៏មិនងាយស្រួលដែរ ព្រោះជើងថ្មីជំនាន់ក្រោយទាំង ២ នាក់នេះ ហាត់ល្អ ប្រកួតល្អណាស់ និងបានឈ្នះជើងចាស់មួយចំនួនផងមកដែរ»។
អតីតអ្នកលេងកណ្តាប់ដៃធ្ងន់ ធន់ សុភា បានបន្ថែមថា៖ «តាមខ្ញុំពិនិត្យ ទៅលើសមត្ថភាពរបស់ សេន កុសល និងដៃគូទាំង ៣ នាក់ទៀត គឺយ៉ាប់ឈ្នះគេ ព្រោះយើងអាចចាញ់ប្រៀបផ្នែកកម្ពស់ ពិសេសកម្លាំង ហេតុនេះរំពឹងឈ្នះមិនលើស ៥០ ភាគរយទេ»។
កីឡាករ គង់ ហូវ និយាយថា ហ្វឹកហាត់មិនសូវបានល្អជាប់លាប់ទេ ដោយជីវភាពខ្វះខាត ឆ្លៀតពេលដើរព្រៃរកឃ្មុំលក់នៅស្រុកសន្ទុក ខេត្តកំពង់ធំ។ គង់ ហូវ បានបន្តថា៖ «ក្នុងបន្ទុកគ្រួសារ ខ្ញុំមើលថែទាំចិញ្ចឹមឪពុកម្តាយចាស់ផង មានប្រពន្ធ និងកូនផង ហេតុនេះពេលវេលាហ្វឹកហាត់បានតិចតួច ហើយមួយរយៈនេះ ប្រកួតមិនសូវបានល្អ»។
គង់ ហូវ ដែលទើបចាញ់ ទូច ដេវីដ, អេ អាំម៉ារីន និង រឿម វណ្ណៈ បានទទួលស្គាល់ថា៖ «ខ្ញុំមិនដែលប្រកួតជាមួយ សំ អាន និង សេក ថាវរី ទេ គឺពួកគេខ្លាំងជំនាន់ក្រោយ ហេតុនេះខ្ញុំមិនហ៊ាននិយាយមុនទេ ប៉ុន្តែ សេន កុសល ខ្ញុំធ្លាប់ប្រកួត ៤ លើក ឈ្នះ ២ និងចាញ់ ២ លើក។ ខ្ញុំសង្ឃឹមឈ្នះ ៥០ ភាគរយ និងធានាវ៉ៃអស់ពីសមត្ថភាព»។
ចំពោះ លោក ឡៅ ស៊ីណាត គ្រូជំនួយកីឡាករ សំ អាន បាននិយាយថា៖ «សំ អាន ហាត់ឡើងវ៉ៃបាន ២ ឆ្នាំ ប៉ុន្តែសមត្ថភាពល្អ ហើយនៅក្នុងចំណោមកីឡាករទាំង ៤ នាក់នេះ ខ្ញុំមើលឃើញថា សមត្ថភាពវាកំពុងល្អខ្លាំង អាចមានលទ្ធភាពយកឈ្នះជើងចាស់ទាំងនោះបាន។ សំ អាន មានកណ្តាប់ដៃធ្ងន់ កម្លាំងល្អ និងធន់ទៅនឹងការវ៉ៃលុករបស់ដៃគូ ដូច្នេះខ្ញុំសង្ឃឹមឈ្នះ ៨០ ភាគរយ ខណៈកន្លងមក សំ អាន ធ្លាប់ឈ្នះប្រាក់រង្វាន់នេះម្តងហើយ»។
យ៉ាងណាមិញ សេក ថាវរី មិនអាចទាក់ទងសម្ភាសបាន ប៉ុន្តែលោក ជួប វុត្ថា អ្នកផ្គូផ្គងកីឡាករនៅសង្វៀនថោនបាននិយាយថា៖ «ខ្ញុំមើលឃើញប៉ុន្មានប្រកួតចុងក្រោយនេះ សេក ថាវរី ប្រកួតល្អ ហើយសមត្ថភាពរបស់គេប្រហាក់ប្រហែលជាមួយ សំ អាន ដែរ ហេតុនេះការចាញ់ឈ្នះនឹងតឹងតែង»៕
