.jpg)
សាបាន (ខៀវ) ទាត់លើគូប្រកួតខ្លួនកាលពីល្ងាចថ្ងៃសៅរ៍។ សហការី
ភ្នំពេញ៖ ព្រឹត្តិការណ៍ TV5 Boxing Knock-Out Serie by K-Cement ពីយប់ថ្ងៃសៅរ៍ទី ៨ ខែកុម្ភៈ បានរកឃើញអ្នកឈ្នះចំនួន ២ នាក់ដំបូង ដែលបានកក់កៅអីវគ្គទី ៣ ដើម្បីទៅប្រកួតគ្នាគឺកីឡាករជើងថ្មី ខាំ សាបាន និងជើងចាស់ រិន សារ័ត្ន បន្ទាប់ពីឈ្នះថៃគូរៀងៗខ្លួនដូចការរំពឹងទុក្ខ។ ជាមួយគ្នានេះ អ្នកប្រដាល់ចំនួន ២ រូបបានខ្ទាតចេញពីការប្រកួត គឺកីឡាករ អៀប លីឆា និង អ៊ុំ កំសត់ ត្រូវអស់ឱកាសឡើងប្រកួតក្នុងព្រឹត្តិការណ៍នេះទៀតហើយ។
ចំណែកការប្រកួតជាលក្ខណៈមិត្តភាពអន្តរជាតិជាមួយអ្នកប្រដាល់ថៃនោះ អ្នកកីឡាករ ផល សោភ័ណ្ឌ ក្លិបតាឡីដំរីមានរិទ្ធប្រើពេលត្រឹម ៤ ទឹកប៉ុណ្ណោះ យកឈ្នះអ្នកប្រដាល់ថៃ Wakai Thep ខណៈដែលកីឡាករថៃរូបនោះមិនសូវជាខ្លាំងនោះឡើយ។
ការប្រកួតក្នុងវគ្គជម្រុះជុំទី ២ នេះ គឺ អ្នកប្រដាល់ចំនួន ២ រូប បានកក់កៅអីសម្រាប់ប្រកួតបន្តវគ្គជម្រុះជុំទី ៣ គឺកីឡាករ ខាំ សាបាន មកពីក្លិបរ៉ាហាប់ស្វាយប៉ាក ដែលទទួលជ័យជម្នះដូចការរំពឹងរបស់លោកគ្រូបង្វឹក បឺត សំខាន់។
កីឡាករ អៀប លីឆា ក្លិបតាឯកដំបងដែកមានរិទ្ធប្រកួតប្រឹងអស់ពីសមត្ថភាព ប៉ុន្តែចាញ់ប្រៀបផ្នែកទាត់ក្នុងនោះនៅចុងទឹកទី ៣ បានវ៉ៃឲ្យ អៀប លីឆា ឲ្យអាជ្ញាកណ្តាលរាប់ដល់ចំនួន ៨។
មានស្ថានភាពមិនសូវខុសគ្នាប៉ុន្មានដែរសម្រាប់គូដណ្តើមពានមួយទៀត អ្នកប្រដាល់ រិន សារ័ត្នក្លិបបញ្ជាការដ្ឋានកងទ័ពជើងទឹកប្រកួតឈ្នះអ្នកប្រដាល់ អ៊ុំ កំសត់ ក្លិបព្រៃទទឹងកីឡាខេត្តបាត់ដំបងដោយពិន្ទុដូចការរំពឹងតាំងពីមុនប្រកួតនេះម្ល៉េះ ប៉ុន្តែមានលក្ខណៈតឹងតែងគួរសមផងដែរ។
អ្នកប្រដាល់ទាំង ២ រូបនេះ ទោះបី សារ័ត្ន មានបទពិសោធចាស់វស្សា និងមានកេរ្តិ៍ល្បីល្បាញជាងក៏ពិតមែន តែសមត្ថភាពតស៊ូប្រកួតរបស់អ្នកទាំង ២ គឺស្វិតស្វាញដែលលទ្ធផលឈ្នះក្នុងលក្ខណៈតឹងតែងបំផុត។ ទោះជាយ៉ាងណា អ្នកប្រដាល់ទាំងពីបានកក់កៅអីជម្រុះវគ្គ ៣ មុនគេជាស្រេច ហើយតាមរូបមន្តប្រកួត គឺពួកគេនឹងត្រូវប៉ះប្រកួតគ្នា ដើម្បីបន្តទៅវគ្គពាក់កណ្តាលផ្តាច់ព្រ័ត្រជាបន្តទៀត។
ចំណែកគូប្រកួតមិត្តភាពអន្តរជាតិវិញ កីឡាករចំណូលថ្មីរបស់ថៃក៍ជាកីឡាករជើងចាស់មួយដែរ ប៉ុន្តែសមត្ថភាពគឺមិនមានប្រៀបល្អជាង ផល សោភ័ណ្ឌ នោះឡើយ។ នៅទឹកដំបូងដែលជួបគ្នាមួយប្រាវ ឃើញថាចេញអាវុធដាក់គ្នាល្អគួរសម ប៉ុន្តែបន្ទាប់កីឡាករថៃទំនងជាស្រុតចុះត្រូវបាន ផល សោភ័ណ្ឌ វ៉ៃឲ្យអាជ្ញាកណ្តាលរាប់ចំនួន ៨ មួយលើក ហើយនៅបន្តការប្រកួតបានរហូតដល់ទឹកទី ៤។ ទោះបីជានៅតែប្រឹងប្រែងប្រកួតបន្តក៏ដោយ ក៏អ្នកប្រដាល់ថៃរូបនេះនៅតែមិនអាចគេចផុត ឬឆ្លងផុតទឹកទី ៤ នោះឡើយ។ ក្បាច់បញ្ចប់ដៃគូរបស់កីឡាករ ផល សោភ័ណ្ឌ បានបញ្ចេញ ១ ជង្គង់ហោះ ដើម្បីធ្វើឲ្យកីឡាករថៃ វ៉ាកៃថេប សន្លប់ក្រោកលែងរួចតែម្ដង៕
