.jpg)
ថាន់ ប៊ុនរ៉ុង បានម៉ាត់ចូលថ្គាម ភួង ពិសិដ្ឋ បណ្តាលឱ្យសន្លប់។ សហការី
ភ្នំពេញ៖ កីឡាករជើងថ្មី ថាន់ ប៊ុនរ៉ុង បានប្រើពេលតែ ៣ ទឹកប៉ុណ្ណោះ ក្នុងការផ្ដួលអ្នកប្រដាល់ចាស់វស្សា ភួង ពិសិដ្ឋ ឱ្យដួលសន្លប់នៅចុងទឹកទី៣ ខណៈមុនពេលប្រកួតគ្មាននរណាហ៊ានទស្សន៍ទាយ ឬព្យាករថា ជើងថ្មី ថាន់ ប៊ុនរ៉ុង អាចធ្វើបានល្អបែបនេះនោះទេ ព្រោះការប្រកួតក្នុងឋានៈជាគូឯកប្រចាំសប្តាហ៍ នៅលើសង្វៀនប៉ុស្តិ៍លេខ ៦ កាលពីថ្ងៃសៅរ៍ កន្លងមកនេះ ត្រូវបានគេស្គាល់ ប៊ុនរ៉ុង តិចណាស់ អ៊ីចឹងគេយល់ថា សមត្ថភាពពិតជាមិនអាចយកឈ្នះរាមច្បង ភួង ពិសិដ្ឋ បាននោះទេ។
អ្នកទស្សនាភាគច្រើន សុទ្ធតែរំពឹងថា ជើងថ្មី ថាន់ ប៊ុនរ៉ុង បើគេចផុតពីសន្លប់ ដោយចាញ់ត្រឹមពិន្ទុ ចាត់ទុកថា ល្អប្រសើរណាស់ទៅហើយ ហើយជាមួយគ្នានេះ ការប្រកួតនៅក្នុងអំឡុងទឹកទី១ ភួង ពិសិដ្ឋ ទំនងដូចជាមានប្រៀបពិន្ទុនាំមុខដែរ ប៉ុន្តែចូលដល់ទឹកទី៣ ការវាយចេញដោយប្តូរក្បាច់កណ្តាប់ដៃរបស់ ប៊ុនរ៉ុង បានល្អធ្វើឱ្យ ពិសិដ្ឋ ដួលសន្លប់ មិនអាចបន្តការប្រកួតបានទៀត។
អ្វីដែលនឹកស្មានមិនដល់នោះ ក្នុងប្រភេទទម្ងន់ ៦០ គីឡូក្រាម ភួង ពិសិដ្ឋ ជាអ្នកប្រដាល់ដែលមានកណ្ដាប់ដៃធ្ងន់ រហ័ស មានជង្គង់ល្អ និងជាអ្នកប្រដាល់ល្បីលំដាប់ល្អ មានបទពិសោធល្អជាង ថាន់ ប៊ុនរ៉ុង ដាច់ ប៉ុន្តែការប្រកួតជាក់ស្តែងដ៏គួរឱ្យកោតសរសើរ គឺ ប៊ុនរ៉ុង បែរជាបានធ្វើឱ្យ ពិសិដ្ឋ ចុករមួលម្ដង ដោយក្បាច់ជង្គង់ ហើយអាជ្ញាកណ្ដាលរាប់ ៨ ចប់ គេនៅបន្តការប្រកួតបានទៀត។ ទោះយ៉ាងណា ថាន់ ប៊ុនរ៉ុង បានប្រើកណ្តាប់ដៃវាយផ្តាច់ នៅទឹកទី៣ ឱ្យ ភួង ពិសិដ្ឋ សន្លប់យ៉ាងលឿនមិនគួរឱ្យជឿ។
លោក ធន់ សុភា គ្រូបង្វឹករបស់ ថាន់ ប៊ុនរ៉ុង បាននិយាយថា៖ «ថាន់ ប៊ុនរ៉ុង មានបទពិសោធតិច និងខ្ចីជាងដៃគូមែន ប៉ុន្តែស្នៀតសម្លាប់ គឺអាវុធល្អ ដូចជាក្បាច់ជង្គង់ស្រួច និងកណ្តាប់ដៃធ្ងន់ ដែលជាចំណុចពិសេសក្នុងការផ្តួលដៃគូឱ្យសន្លប់នោះ»។
លោកបានបន្ថែមថា៖ «ប៊ុនរ៉ុង ជាសិស្សថ្មីប្រកួតបានប្រហែល ២០ លើក ប៉ុន្តែអាចចាត់ទុកថា ជើងថ្មីដែលចាប់ផ្តើមសាងឈ្មោះល្បីតាមរយៈការផ្តួលជើងចាស់មួយចំនួន ហើយក្នុងប្រភេទទម្ងន់ ៦០ គីឡូក្រាមនេះ ថាន់ ប៊ុនរ៉ុង មានបទពិសោធតិច និងខ្ចីជាងគេ តែអាចចាប់គូឱ្យប្រកួតជាមួយជើងចាស់រៀមច្បងមួយចំនួនបានក្នុងលក្ខណៈប្រជែងគ្នាស្វិតស្វាញល្អមើល»។
ចំណែកលោក ម៉ាក់ សាខន គ្រូបង្វឹក ភួង ពិសិដ្ឋ បាននិយាយថា៖ «ខ្ញុំក៏មិននឹកស្មានថា ភួង ពិសិដ្ឋ សន្លប់ដែរ ព្រោះកន្លងមកវាល្អជង្គង់ និងទាត់ ហើយជើងថ្មីមួយចំនួនក៏លំបាកយកឈ្នះវាដែរ ប៉ុន្តែលើកនេះ ពិតជាស្មានមិនដល់ថា វាសន្លប់ធ្ងន់របស់អ្នកជំនាន់ក្រោយទៅវិញ។ ទោះយ៉ាងណា ខ្ញុំទទួលស្គាល់ថា គេជើងថ្មីជាងយើង តែបើគេហាត់ល្អ វ៉ៃល្អ ចូលគោលដៅល្អនោះ យើងត្រូវតែទទួលស្គាល់សមត្ថភាពគេល្អ និងអាចផ្តួលយើងបាន អ៊ីចឹងនៅលើសង្វៀន យើងកុំមើលងាយដៃគូឱ្យសោះ»។
ជំនួយការផ្គូផ្គងប្រចាំសង្វៀនប៉ុស្តិ៍លេខ ៥ លោក ញាន សុធី ប្រាប់ថា៖ «ខ្ញុំមិននឹកស្មានថា ជើងថ្មី ថាន់ ប៊ុនរ៉ុង អាចផ្តួលរៀមច្បង ភួង ពិសិដ្ឋ ឱ្យសន្លប់ទឹកទី៣ ទេ។ ខ្ញុំគិតពីដំបូងថា ប៊ុនរ៉ុង ទប់ត្រឹមចាញ់ពិន្ទុ គឺល្អណាស់ហើយ ប៉ុន្តែជាក់ស្តែង គេវ៉ៃជើងខ្លាំងឱ្យសន្លប់បានទៀត អ៊ីចឹងសមត្ថភាពរបស់ ថាន់ ប៊ុនរ៉ុង ក្នុងប្រភេទទម្ងន់ ៦០ គ.ក្រនេះអាចថា ចាប់ផ្តើមលេចធ្លោល្អមិនខាន»៕
