អ្នកប្រដាល់ជើងថ្មី ទើបសាងបានឈ្មោះល្បីខ្លាំងក្នុងឆ្នាំ ២០១៩ រិន ដេវីត បានត្រួសត្រាយឧបសគ្គជាច្រើន ដើម្បីបានឈានជើងចូលមកក្នុងក្រុមជម្រើសជាតិថ្នាលប្រដាល់គុនខ្មែរក្នុងរយៈពេលខ្លីបំផុត ហើយតាមរយៈការតស៊ូ និងតាំងចិត្តហ្វឹកហាត់ ឡើងប្រកួតមានលក្ខណៈមោះមុត ក្លាហាន គឺគេទទួលបានលទ្ធផលល្អបំផុតនៅក្នុងប្រភេទទម្ងន់ ៥៤ គ.ក្រ ដែលសឹងតែរកដៃគូក្នុងស្រុកប្រកួតមិនបាន។
ទោះជាយ៉ាងនេះសមត្ថភាពរបស់ រិន ដេវីត បច្ចុប្បន្នបានឈានចូលក្នុងលំដាប់ខ្លាំងប្រហាក់ប្រហែលជាមួយកីឡាករជម្រើសជាតិម្នាក់ទៀតគឺ ហ៊ឹម គឹមរៀង មកពីក្លិបតាព្រហ្មមានជ័យ។ ដោយឡែកនៅក្នុងការប្រកួតនៅសង្វៀនអាស៊ីអាគ្នេយ៍ នារសៀលថ្ងៃសៅរ៍នេះ រិន ដេវីតត្រូវឆ្លងកាត់ការប្រកួតជាមួយជើងចាស់ ម៉ន វណ្ណី។
នៅក្នុងជំនួបនេះ ដេវីត បានប្រាប់ថា៖ «ខ្ញុំរីករាយ នឹងការសាកល្បងសមត្ថភាពជាមួយរៀមច្បង ម៉ន វណ្ណី។ ខ្ញុំសព្វថ្ងៃដូចជាលំបាករកដៃគូប្រកួតណាស់ ប៉ុន្តែរៀមច្បង ម៉ន វណ្ណី ល្បីល្បាញខ្លាំងមុនខ្ញុំ»។
សិស្សក្លិបនាគរាជចតុមុខ រិន ដេវីត បានបន្ថែមថា៖ «ខ្ញុំបានប្រកួតឈ្នះកីឡាករជើងចាស់មួយចំនួនជាបន្តបន្ទាប់ លើកលែងតែកីឡាករ ហ៊ឹម គឹមរៀង ដែលខ្ញុំវ៉ៃបានត្រឹមទប់ទល់ល្អមើល ប៉ុន្តែមិនដែលបានឱកាសឈ្នះម្ដងណាឡើយ។ ចំណែក ម៉ន វណ្ណី ជាអ្នកប្រដាល់ជើងខ្លាំងមួយរូបទៀត ដែលខ្ញុំត្រូវការឈ្នះ ដើម្បីត្រួសត្រាយឈានគ្រប់គ្រងនៅទម្ងន់ ៥៤ គ.ក្រ ប៉ុន្តែខ្ញុំគិតថា ជ័យជម្នះពិតជាតឹងតែង និងឧបសគ្គធំណាស់»។
លោក ញាន សុធី នាយកគ្រប់គ្រង និងផ្គូផ្គងនៅសង្វៀន SEATV និយាយថា៖ «ពួកគេទាំង ២ នាក់ សុទ្ធតែត្រូវការឈ្នះដូចគ្នា ព្រោះលំដាប់ជួរមុខក្នុងទម្ងន់ ៥៤ គីឡូក្រាម។ ទោះយ៉ាងណា ជំនួបរវាងអ្នកខ្លាំងជំនាន់មុន និងស្រករក្រោយនេះ អ្នកឈ្នះ ឬអ្នកចាញ់ សុទ្ធតែឈឺខ្លួនដូចគ្នា ព្រោះសមត្ថភាពវិជ្ជាគុនវ៉ៃសម្រុកមិនចេះបន្ធូរដៃដូចគ្នា»។
លោក ម៉ាង ម៉ន គ្រូបង្វឹក ម៉ន វណ្ណី បាននិយាយថា៖ «គូនេះសមត្ថភាពប្រហែលគ្នា អ៊ីចឹងបញ្ហាចាញ់ ឬឈ្នះ គឺអាស្រ័យលើកម្លាំង និងស្ថានភាពជាក់ស្តែង ល្បិចប្រកួត ចេញចូល ឬផ្លាស់ប្តូរក្បាច់ក្នុងពេលប្រកួត។ នៅក្នុងទម្ងន់ស្មើគ្នា កីឡាករជាកូនៗក្នុងក្លិបរបស់ខ្ញុំ ទោះជាមានសមត្ថភាពល្អប្រៀបលើគេ ឬខ្លាំងជាងគេ ឬឈ្នះខ្សែក្រវាត់ ក៏ដោយ គឺនៅតែគ្មានឱកាសបានជាប់ជាកីឡាករជម្រើសជាតិម្តងណាឡើយ»។
នៅមានគូឯកប្រចាំសប្តាហ៍ ទម្ងន់ ៦០ គីឡូក្រាម ដែលមានប្រិយភាពខ្លាំង គឺ សូត្រ វាសនា ត្រូវប្រកួតជាមួយ ថន ភឿត។ អ្នកទាំង ២ នេះមិនធ្លាប់ជួបគ្នាទេ ខណៈដែល សូត្រ វាសនា ជាកីឡាករវ័យក្មេងជំនាន់ក្រោយ ធ្លាប់វ៉ៃក្នុងទម្ងន់ ៥៤ និង ៥៧ គ.ក្រ ទើបតែឡើងទម្ងន់មកវ៉ៃក្នុងទម្ងន់ ៦០ គ.ក្រ។ ចំណែក ថន ភឿត ធ្លាប់ប្រកួតចាញ់ញឹកញាប់ជាមួយ សូត្រ ខេវិន ជាបង សូត្រ វាសនា ហើយជាកីឡាករចាស់វស្សា មានកម្លាំងរឹងមាំល្អ ប៉ុន្តែចេញចូលយឺត ព្រមទាំងស្ថានភាពទឹកចិត្តប្រកួតសាមញ្ញ មិនពុះកញ្ជ្រោលសម្រុកខ្លាំងនោះឡើយ៕