.jpg)
បាង កាណុន និង សូដា សុវណ្ណម៉ាយ បានផ្សងសំណាងមកប្រកួតគ្នា រកអ្នកឈ្នះ ទៅវគ្គបន្ត។ រូបថត សហការី
ភ្នំពេញ៖ ការប្រកួតគុនខ្មែរវគ្គជម្រុះដណ្តើមពានរង្វាន់ TV5 Boxing Knock Out Series Cell Card បានឈានចូលលើកទី៤ ដែលត្រូវចម្រាញ់ជ្រើសយកអ្នកឈ្នះតែម្នាក់ ក្នុងទម្ងន់ ៥៤ គីឡូក្រាម ឡើងទៅវគ្គបន្ត ហើយបេក្ខភាពទាំង ២ រូប ត្រូវប្រកួតប្រជែងនៅថ្ងៃសៅរ៍នេះ តម្រូវទៅលើកីឡាករជើងថ្មី សូដា សុវណ្ណម៉ាយ មកពីក្លិបគោព្រៃ និង បាង កាណុន របស់ក្លិបអាណាចក្រគុនខ្មែរ។
សម្រាប់សមត្ថភាព និងបទពិសោធប្រកួតរបស់អ្នកទាំង ២ នេះ ត្រូវបានគេមើលឃើញថា នៅខ្ចីវស្សា បើប្រៀបធៀបទៅនឹងអ្នកបានឈ្នះកៅអីវគ្គ២ ចំនួន ៣ នាក់ ដែលកំពុងរង់ចាំជាស្រេចក្នុងនោះមានកីឡាករ ធន់ អៀងឡៃ, រិន ដេវីដ និង ពេជ្រ ប៊ុនសិទ្ឋ។ រវាង សូដា សុណ្ណម៉ាយ និង បាង កាណុន នឹងមានអ្នកឈ្នះម្នាក់ ឡើងទៅវគ្គបន្ត ខណៈអ្នកទស្សនាប្រដាល់ភាគច្រើន បានហៅការប្រកួតរបស់អ្នកទាំង ២ នេះថា ទំនងដូចជាផ្សងព្រេងច្រើនជាង ព្រោះក្នុងទម្ងន់ ៥៤ គីឡូក្រាមនេះ ប្រជុំជើងខ្លាំងល្អជាងនេះច្រើនណាស់។
លោក ញាណ សុធី ជំនួយការផ្គូផ្គងប្រចាំសង្វៀន TV5 បានប្រាប់ថា៖ «ពួកគេវ័យក្មេងបទពិសោធថ្មី តែកំពុងឡើងជើងល្អ។ ជាមួយគ្នានោះកីឡាករ សូដា សុវណ្ណម៉ាយ ហ្វឹកហាត់កំពុងល្អ ហើយ បាង កាណុន ជំនាញកណ្តាប់ដៃ មានប្រភពមកពីជម្រើសជាតិប្រដាល់សកលធ្លាប់មានស្នាដៃប្រកួតល្អដែរ»។
លោក សុធី ដែលធ្លាប់មានបទពិសោធរៀបចំផ្គូផ្គងនៅសង្វៀន SEATV បានបន្ថែមថា៖ «មុននឹងផ្គូផ្គង ខ្ញុំសុទ្ធតែបានទៅពិនិត្យមើលការហ្វឹកហាត់ ព្រមទាំងតាមដានការប្រកួតដល់ទីតាំងក្លិបផ្ទាល់ ដើម្បីឱ្យប្រាកដថា កីឡាករហ្វឹកហាត់ល្អ ទើបយកមកប្រកួត ចំណែកប្រវត្តិប្រកួតវិញ សូដា សុវណ្ណម៉ាយ ធ្លាប់ប្រកួត ២៥ ដង ឈ្នះ ១៦ ចាញ់ ៧ និងស្មើ ២ ដង ហើយ បាង កាណុន ប្រកួតបាន ៣៥ ដង ឈ្នះ ២២ ចាញ់ ១១ និងស្មើ ២ ដង»។
ចំណែកលោក ផាត់ សូដា គ្រូបង្វឹកប្រចាំក្លិបគោព្រៃ បាននិយាយថា៖ «សូដា សុវណ្ណម៉ាយ ហ្វឹកហាត់ និងគោរពវិន័យល្អ ហើយក្នុងទម្ងន់ ៥៤ គីឡូក្រាមនេះ ថ្នាក់ដឹកនាំក្លិប ជំរុញឱ្យគេទៅចូលរួមដណ្តើមពាននេះ។ សមត្ថភាពរបស់គាត់ ទើបតែមានបទពិសោធខ្ចី ប៉ុន្តែការចូលប្រកួត គឺដូចយើងសាកល្បងដែរ ថាតើពេលប្រកួតជាមួយអ្នកខ្លាំង យើងនឹងទទួលបានបច្ចេកទេសល្អៗសម្រាប់យើងបានដូចម្តេច?»។
លោក សូដា បន្តថា៖ «ខ្ញុំគិតថា សុវណ្ណម៉ាយ ជួប បាង កាណុន មិនមែនជាឧបសគ្គធំនោះឡើយ ព្រោះស្នៀតទាត់ ជង្គង់ និងកណ្តាប់ដៃ យើងមានទំនុកចិត្តល្អជាង ខណៈ បាង កាណុននេះ មានជំនាញតែស្នៀតកណ្តាប់ដៃមួយផ្នែកប៉ុណ្ណោះ ហេតុនេះចំពោះខ្ញុំជាគ្រូបង្វឹកមើលឃើញថា សង្ឃឹមឈ្នះ ៦០ ភាគរយ»។
ចំណែក បាង កាណុន មិនអាចទាក់ទងសម្ភាសបាន ប៉ុន្តែជំនួយការផ្គូផ្គងលោក ញាន សុធី បាននិយាយថា សមត្ថភាព គឺមានកម្រិតប៉ុនគ្នា ហើយបើប្រៀបធៀបជាមួយកីឡាករទាំង ៣ នាក់ មាន ធន់ អៀងឡៃ, រិន ដេវីដ និង ពេជ្រ ប៊ុនសិទ្ឋ ដែលបានឈ្នះក្នុងវគ្គជម្រុះនេះរួចហើយនោះ គឺពិតជាគ្មានលទ្ធភាពឈ្នះបានមែន សម្រាប់ជុំក្រោយៗ ព្រោះប៉ះសុទ្ធតែអ្នកខ្លាំងៗ។
ចំណែកគូពិសេសអម ១ គូទៀត គួរឱ្យចាប់អារម្មណ៍ គឺក្លិបគោព្រៃ បានអ្នកប្រដាល់ទម្ងន់ ៦០ គីឡូក្រាមជើងថ្មី សូដា ម៉ាឡាកាំង ឱ្យប្រកួតជាមួយជើងចាស់ យុគ យក្សផ្លែ ក្លិបបុរីរាជសីហ៍។ សូដា ម៉ាឡាកាំង នេះត្រូវបានគេអះអាងថា ហ៊ានប៉ះជាមួយជើងចាស់ យក្សផ្លែ មិនទាន់ដឹងថា ទទួលបានលទ្ធផលយ៉ាងណាទេក្នុងការប្រកួត ៥ ទឹកពេញនោះ៕
