ភ្នំពេញ៖ អ្នកប្រដាល់វ័យក្មេងចំនួន ៣ រូប ដែលទើបតែពង្រឹងសមត្ថភាពបានល្អ តាមរយៈប្រកួតឈ្នះញឹកញាប់ដូចគ្នានោះ ត្រូវបានផ្គូផ្គងឱ្យប្រកួតជាមួយអ្នកប្រដាល់ជារៀមច្បងចាស់វស្សា ដោយក្នុងនោះជើងថ្មីជំនាញលេងកណ្តាប់ដៃ ជី ឆៃលី ត្រូវជួបកីឡាករមានបទពិសោធចាស់ជាង ប៊ន ពន្លឹក រីឯ ជើងថ្មីទម្ងន់ធ្ងន់ លី រិទ្ធី ត្រូវប៉ះជើងចាស់ យ៉ាម ខេមរា ហើយជើងថ្មីល្បីខ្លាំង ថាន់ ប៊ុនរ៉ុង ត្រូវដាក់ឱ្យប្រកួតជាមួយជើងចាស់ ជ័យ ស៊ីនេត ដែលជាគូសន្សំប្រាក់លាននៅលើសង្វៀនបាយ័ន នាល្ងាចថ្ងៃសៅរ៍សប្តាហ៍នេះ។
សម្រាប់ការប្រកួតទាំង ៣ គូនេះ ត្រូវបានគេសង្កេតឃើញថា សមត្ថភាពកីឡាករជើងថ្មីទាំង ៣ នាក់ខាងលើ ទំនងមានប្រៀបជាង និងក្លាហានជាងកីឡាករជើងចាស់ ដែលមានបទពិសោធច្រើនជាង ហើយទាំងភាគី ជី ឆៃលី, ថាន់ ប៊ុនរ៉ុង និង លី រិទ្ធី សុទ្ធតែសង្ឃឹមឈ្នះក្នុងភាគរយខ្ពស់។
លោក ធន់ សុភា ជំនួយការផ្គូផ្គងប្រចាំសង្វៀនបាយ័ន និងជាគ្រូបង្វឹកផ្ទាល់របស់ ជី ឆៃលី និង ថាន់ ប៊ុនរ៉ុង បានប្រាប់ថា សម្រាប់កីឡាករ ៣ គូ ក្នុងការប្រកួតរបស់ភេសជ្ជៈ WURKZ នៅល្ងាចថ្ងៃសៅរ៍នេះ គឺកម្មវិធីសម្រិតសម្រាំង ព្រោះថាមានតែ ៣ គូ ហេតុនេះធនធានសមត្ថភាពកីឡាករ គឺភាគច្រើនដាក់ឱ្យប្រកួតអាចធានាបានថា មិនងាយនឹងសន្លប់ ដើម្បីកុំឱ្យខូចកម្មវិធី ហើយបើនិយាយពីបច្ចេកទេសវិញ ជី ឆៃលី អាចនឹងមានប្រៀបច្រើនលើ ប៊ន ពន្លឹក ទោះបីជាមានបទពិសោធខុសគ្នាក៏ដោយ។
លោកបានបញ្ជាក់ថា៖ «ខ្ញុំជាគ្រូបង្វឹក ជី ឆៃលី ផ្ទាល់ដៃ គឺមានទំនុកចិត្តឈ្នះ ៧០ ភាគរយ ព្រោះកម្លាំងកណ្តាប់ដៃក្នុងទឹកចិត្តប្រកួតមិនចេះបន្ធូរដៃទេ ចំណែក ថាន់ ប៊ុនរ៉ុង ប្រកួតបានត្រឹម ២៧ ដង ចាញ់តែ ៤ ដងទេ ប៉ុន្តែផ្តួលជើងចាស់ឱ្យចុះចាញ់ជាច្រើននាក់ ហើយក្នុងមួយរយៈនេះ គេឈ្នះបានចំណាត់ថ្នាក់រង្វាន់ប្រាក់លានកម្មវិធី Cambodia Beer ចំនួន ២ លើក ហេតុនេះខ្ញុំរំពឹងឈ្នះ ជ័យ ស៊ីនេត ៨០ ភាគរយ»។
ចំណែកលោកស្រី សុខ អ្នកគ្រប់គ្រងកីឡាករ ជ័យ ស៊ីនេត បានប្រាប់ថា៖ «ស៊ីនេត ហាត់បានល្អ ប៉ុន្តែគ្នាចាស់កម្លាំង ខ្សោយជាងក្មេង ហេតុនេះ យើងមិនហ៊ានសង្ឃឹមឈ្នះច្រើនទេ ព្រោះអាចចាញ់ការចូលវាយសម្រុកសន្ធាប់ខ្លាំង។ យើងអាចចាញ់ តែបើវ៉ៃតាមរបៀបបច្ចេកទេសធានាល្អជាង តែទោះបីជាយ៉ាងណា ការចាញ់ ឬឈ្នះ ក្នុងលក្ខណៈតឹងតែងដែរ»។
សម្រាប់គូទម្ងន់ធ្ងន់រវាងជើងថ្មី លី រិទ្ធី និង យ៉ាម ខេមរា សុទុ្ធតែរំពឹងឈ្នះដូចគ្នា។ តាមប្រវត្តិប្រកួតថ្មីៗ យ៉ាម ខេមរា ល្អជាងមុន ដោយទើបតែឈ្នះជើងចាស់ ធី តុងហ៊ី និងឈ្នះ ឯម ឡេងលី។ ចំណែក លី រិទ្ធី វិញប្រកួតចុងក្រោយនេះ ចាញ់ពិន្ទុ ឡុង សុភី ប្រផិតប្រផើយ ប៉ុន្តែឈ្នះពិន្ទុអ្នកលេងស្នៀតទាត់ ឡុង ល្វៃ។
កីឡាករ ថៃ រិទ្ធី ដែលជាគ្រូរបស់ លី រិទ្ធី បាននិយាយថា៖ «ឥឡូវក្លិបមិនទាន់បើកហាត់ជាផ្លូវការទេ ប៉ុន្តែកីឡាករហាត់ក្នុងក្លិបមិនបើកទូលាយ ហើយខ្ញុំតាមត្រួតពិនិត្យតាមអនឡាញ។ តាមខ្ញុំគិត លី រិទ្ធី ឥឡូវល្អខ្លាំង កម្លាំងល្អជាង យ៉ាម ខេមរា ពិសេសស្នៀតកណ្តាប់ និងទាត់ឆ្ងាយ ប៉ុន្តែយើងបារម្ភតែក្បាច់ឱបឡើងជង្គង់ប៉ុណ្ណោះ ដែល យ៉ាម ខេមរា មានប្រៀបជាង។ តែទោះបីជាយ៉ាងណា ខ្ញុំគិតថា លី រិទ្ធី នៅតែឈ្នះ ក្នុងទំនុកចិត្ត ៩០ ភាគរយ»៕