.jpg)
ភ្នំពេញ៖ កីឡាករមានបទពិសោធនៅខ្ចីវស្សា ធន់ ផានិត, ពេជ្រ កក្កដា, អេលីត សេងហួរ និង បាន លីម ត្រូវបានគណៈកម្មការរៀបចំការប្រកួតសង្វៀនថោន ដាក់ឱ្យពួកគេប្រកួតដណ្តើមប្រាក់លានទម្ងន់ ៥៧ គីឡូក្រាម យកទឹកប្រាក់ ៣,៤ លានរៀល នៅថ្ងៃអាទិត្យនេះ។
ការសម្រេចដាក់កីឡាករជើងថ្មី ឱ្យប្រកួតដណ្តើមប្រាក់លានដ៏កម្រនេះ ត្រូវបានគណៈផ្គូផ្គងអះអាងថា មកពីពួកគេមានទឹកចិត្តប្រកួតចូលវាយសម្រុកខ្លាំងៗ អស់ពីសមត្ថភាពធ្វើឱ្យអ្នកទស្សនានិយមចូលចិត្ត ហើយការផ្តល់ឱកាសនេះ ក៏ដើម្បីចូលរួមលើកស្ទួយ និងជួយឱ្យជើងថ្មីទាំងនេះ អាចអភិវឌ្ឍសមត្ថភាពកាន់តែល្អប្រសើរ ឈានទៅជាអ្នកប្រដាល់ដែលឆ្នើមនាពេលអនាគតផងដែរ។
លោក ជួប វុត្ថា ផលិតករ និងជាអ្នកគ្រប់គ្រងសមាសភាពកីឡាករ នៅសង្វៀនថោនប្រាប់ថា៖ «ការផ្តល់ឱកាសកីឡាករឆ្នើមៗវ័យក្មេង មានបទពិសោធនៅខ្ចីវស្សា ឱ្យប្រកួតដណ្តើមប្រាក់លាននេះ ព្រោះការប្រកួតរបស់ពួកគេ វាយអស់ពីសមត្ថភាពមានភាពទាក់ទាញមហាជនខ្លាំងហើយនេះក៏ជាទស្សនវិស័យមួយ ជួយគាំទ្រ និងបណ្តុះបណ្តាលអ្នកប្រដាល់ ដែលលេចធ្លោជំនាន់ក្រោយឱ្យក្លាយទៅជាអ្នកប្រដាល់លំដាប់ខ្លាំងជួរមុខផងដែរ»។
លោកបន្ថែមថា៖ «ទោះបីជា មានការរិះគន់ខ្លះ ប៉ុន្តែតាមបទពិសោធរបស់ខ្ញុំ រយៈពេលមួយឆ្នាំលើផ្នែកប្រដាល់នេះ ខ្ញុំគិតថា គួរតែផ្តល់ឱកាសដល់កីឡាករវ័យក្មេង ជាពន្លកគុនខ្មែរ ដើម្បីផលិតបាននូវកីឡាករគុនខ្មែរឱ្យសម្បូរបែប ឆ្លើយតបទៅនឹងសេចក្តីត្រូវការប្រកួតដ៏ច្រើន ព្រោះជើងចាស់ល្បីឈ្មោះមួយចំនួនចាប់ផ្តើមសម្តែងឫកផង និងប្រកួតមិនសូវទាក់ទាញផង»។
ទាក់ទងទៅនឹងសមត្ថភាព និងបទពិសោធបច្ចេកទេសវិញ នៅក្នុងកីឡាករវ័យក្មេងទាំង ៤ នាក់នេះ ត្រូវបានគេកត់សម្គាល់ឃើញថា ពេជ្រ កក្កដា មានក្បាច់គួរចាប់អារម្មណ៍ ហើយ ធន់ ផានិត មានទឹកចិត្តប្រកួតពុះកញ្ជ្រោល ចូលវាយសម្រុកមិនបន្ធូរដៃ ដែលទំនងមានប្រៀបជាងគេបន្តិចព្រោះសូម្បីតែជើងខ្លាំង រិន ដាវីត ក៏លំបាកយកឈ្នះគេណាស់។ ប៉ុន្តែ អេលីត សេងហួរ និង បាន លីម ក៏ជាកីឡាករចូលចិត្តវាយសម្រុក ដែលចំគោលដៅល្អអាចសន្លប់ភ្លាមៗដូចគ្នា។
លោក ធន់ សុភា គ្រូបង្វឹក ធន់ ផានិត បាននិយាយប្រាប់ថា៖ «ខ្ញុំមានជំនឿមុតមាំថា កូនសិស្សរបស់ខ្ញុំ នឹងឈ្នះប្រាក់លាននៅសប្តាហ៍នេះ ព្រោះហ្វឹកហាត់បានល្អណាស់ ពិសេសដៃគូប្រកួតមានកម្រិតសមត្ថភាពប្រហាក់ប្រហែលគ្នា និងមានដៃគូខ្លះទំនងមានកម្រិតក្រោមយើងបន្តិចបន្តួចដែរ។ ហេតុនេះ ខ្ញុំសង្ឃឹមជឿជាក់ ៩០ ភាគរយថា គេនឹងឈ្នះប្រាក់លាន»។
ចំណែកលោក ពេជ្រ សុផាន់ គ្រូបង្វឹករបស់ ពេជ្រ កក្កដា បាននិយាយថា៖ «ខ្ញុំមានទំនុកចិត្តថាកូនសិស្សរបស់ខ្ញុំ នឹងឡើងដល់វគ្គផ្តាច់ព្រ័ត្រ។ នៅក្នុងចំណោមអ្នកទាំង ៤ នេះ យើងលំបាកទស្សន៍ទាយឱ្យច្បាស់ណាស់ ព្រោះជាប្រភេទកីឡារមានចិត្តធំ ហ៊ានចូលវាយប្តូរដូចគ្នា ហេតុនេះបើវាយចូលគោលដៅពេញ វាប្រឈមទៅនឹងការស្រុតចុះ ឬសន្លប់ភ្លាមៗ ក៏ថាបានដែរ។ យ៉ាងណាក៏ដោយ ខ្ញុំរំពឹងឈ្នះ ៨០ ភាគរយ ប៉ុន្តែបើចាប់ឆ្នោតប៉ះ ធន់ ផានិត ចាញ់ឈ្នះតឹងតែងណាស់ គឺមានទំនុកចិត្តឈ្នះត្រឹម ៥០ ភាគយប៉ុណ្ណោះ»។
ជាមួយគ្នានេះដែរ លោក ស៊ន អេលីត បាននិយាយថា៖ «កូនសិស្សខ្ញុំ អេលីត សេងហួរ មិនហ៊ាននិយាយមុនទេ ព្រោះកុំឱ្យគេថា ខ្ញុំអួត ប៉ុន្តែជាទូទៅកូនសិស្សខ្ញុំ ឡើងសង្វៀនធានាវ៉ៃអស់ពីសមត្ថភាព សន្លប់ចោល មិនមែនឡើងរាំ តាមចង្វាក់ភ្លេងដូចកូនសិស្សគេនោះទេ»។
ចំណែកលោកគ្រូ ហង្ស ស៊ឺន គ្រូបង្វឹក មិនអាចសុំសម្ភាសបានទេ ខណៈដែលកីឡាករ បាន លីម ជាជើងថ្មី តែគេបានកត់សម្គាល់ថាឆ្នើមផងដែរ៕
