.jpg)
មាស សារ៉ាក់ បានទប់ការទាត់របស់ថៃ Kev Tab ទាំងមានឈាមស្រោចមុខ។ ពន្លក
ភ្នំពេញៈ កីឡាករកម្ពុជា មាស សារ៉ាក់ របស់ក្លិបអាណាចក្រគុនខ្មែរ បានបន្តយកឈ្នះកីឡាករថៃ Kev Tab ក្នុងលក្ខណៈតឹងតែង ដើម្បីទទួលបាន ៣ ពិន្ទុបន្ថែម ក្នុងការប្រកួតវគ្គជម្រុះសន្សំពិន្ទុដណ្តើមខ្សែក្រវាត់ Khmer Inter Championship (KIC) ទម្ងន់ ៥៧ គីឡូក្រាម នៅសង្វៀន One TV។
ប៉ុន្តែសម្រាប់ការប្រកួតកាលពីថ្ងៃអាទិត្យនោះដែរ យុគ យក្សផ្លែ មកពីក្លិបបុរីរាជសីហ៍មានរិទ្ធ បានចាញ់ពិន្ទុកីឡាករថៃ Lafan ក្នុងជំនួបស្វិតស្វាញដូចគ្នា។ ទោះបីជាយ៉ាងណា ចំពោះលទ្ធផល ២ គូនេះ ធ្វើឲ្យយោបល់រិះគន់ខុសៗគ្នា ដោយមានអ្នកខ្លះថា មាស សារ៉ាក់ មិនគួរឈ្នះ និង យក្សផ្លែ មិនគួរចាញ់។
តាមរយៈការប្រកួត ៥ ទឹកពេញនោះ មាស សារ៉ាក់ រងរបួសបែក ១៥ ថ្នេរតាំងពីទឹកទី២ និងមានឈាមហូរស្រោចខ្លួនដោយកែងរបស់កីឡាករថៃ ប៉ុន្តែទឹកចិត្តប្រកួតរបស់ សារ៉ាក់ នៅតែស៊ូបានល្អ និងវាយចេញដោយកណ្តាប់ដៃ បានច្រើន និងធ្វើឲ្យ Kev Tab វង្វេងម្តងម្កាលសឹងតែសន្លប់។ ជាមួយគ្នានេះគ្រូពេទ្យប្រចាំសង្វៀន បានជូតឈាមញឹកញាប់ និងអនុញ្ញាតឲ្យបន្តការប្រកួតរហូតដល់ចប់ទឹកទី ៥ ហើយជាលទ្ធផល ចៅក្រមទាំង ៥ បានផ្តល់ឲ្យ មាស សារ៉ាក់ ឈ្នះ ៤ ទល់នឹង ១ ខណៈដែលភាគីថៃឡាំប៉ាខ្លាំង និងតវ៉ាក្រៅផ្លូវការ។
ជុំវិញបញ្ហានេះ លោក ចាន់ សុទ្ធ ប្រធានវិនិច្ឆ័យ បានពន្យល់ថា៖ «កីឡាករថៃមានចំណុចចាញ់ គឺវាយដកថយទប់ទល់ ហើយចំណុចឈ្នះរបស់ មាស សារ៉ាក់ មានភាពក្លាហានចូលវាយសម្រុកស័ក្តិសមជាគូខ្សែក្រវាត់ និងចេញដោយស្នៀតកណ្តាប់ដៃបានច្រើន និងចំគោលដៅល្អ។ កីឡាករថៃ មានប្រៀបបានតែមួយកែងឲ្យបែកឈាមប៉ុណ្ណោះ ក្រៅពីនេះវាយថយពេក គឺចាញ់ប្រៀប មាស សារ៉ាក់ តែម្តង»។
លោកបានហៅចៅក្រម ដែលផ្តល់ពិន្ទុនោះត្រឹមត្រូវ ទទួលយកបានតាមបច្ចេកទេសហើយការលើកឡើងរបស់អ្នកទស្សនា គឺបង្ហាញពីទស្សនៈគាំទ្រនិយមចូលចិត្ត មិនមែនលក្ខណៈតាមបច្ចេកទេស ដែលយើងរៀនសូត្រតាមច្បាប់ទេ ប៉ុន្តែគឺជាការមើលឃើញរបស់គាត់ ក្នុងនាមមហាជន ដែលគាត់មានសិទ្ធិរិះគន់ឲ្យយោបល់ តែគ្មានសិទ្ធិដាក់ពិន្ទុនោះឡើយ។
ចំណែកអ្នកលេងកណ្តាប់ដៃ យុគ យក្សផ្លែ វ៉ៃបានល្អ ប៉ុន្តែនៅតែចាញ់ប្រៀបកីឡាករថៃ Lafan ដោយស្នៀតទាត់។ ទោះជាយ៉ាងណាជំនួបតានតឹងចំនួន ៥ ទឹក Lafan ទទួលរងនូវកណ្តាប់ដៃពី យក្សផ្លែ សឹងតែវង្វេងម្តងៗ។
ជាមួយគ្នានោះ កណ្តាប់ដៃផ្ទួនៗ និងវាយ ៣ កែងបន្ថែមក្នុងទឹកទី ៣ ដែលធ្វើឲ្យ Lafan សឹងតែអស់ឱកាសតដៃនោះ លោកអាជ្ញាកណ្តាល សួន ប៊ុនសូត្រ មិនចាប់រាប់ ធ្វើឲ្យ យក្សផ្លែ បាត់ឱកាសឈ្នះ។
ក្រោយពេល Lafan ស្តារស្ថានការណ៍បានវិញ គឺមានប្រៀបផ្នែកទាត់បានច្រើន ទៅលើ យក្សផ្លែ និងបានឈ្នះ ជាឯកច្ឆន្ទ ៥-០។ ប៉ុន្តែអ្នកទស្សនាភាគច្រើនលាន់មាត់ថា យក្សផ្លែ គួរតែឈ្នះ ហើយ យក្សផ្លែ ទទួលរងការចាញ់ប្រផិតប្រផើយតាំងពីលើកដំបូងម្ល៉េះ គឺដូចជាមិនយុត្តិធម៌។ យក្សផ្លែ និយាយថា៖ «ខ្ញុំប្រឹងអស់ពីសមត្ថភាព ប៉ុន្តែបញ្ហាចាញ់នេះមិនដឹងថា យ៉ាងម៉េច បើចៅក្រមឲ្យអ៊ីចឹងនោះ ខ្ញុំមិនហ៊ានតវ៉ាទេ»។
យោងតាមលទ្ធផលប្រកួតនេះ បានធ្វើឲ្យ មាស សារ៉ាក់ មាន ៩ ពិន្ទុពេញ ស្មើជាមួយ អេលីត ចំរើន និង ម៉ន សាម៉េត ប៉ុន្តែបើគិតតាមនាទីផ្តួលដៃគូឲ្យសន្លប់គឺ អេលីត ចំរើន ឈរនៅកំពូល លេខ ១ តាមពីក្រោយដោយ សាម៉េត និង សារ៉ាក់ ហើយពួកគេនៅរង់ចាំការប្រកួតលើកទី ៤ ចុងក្រោយ ដើម្បីរកអ្នកមានប្រៀប ២ នាក់ ឡើងទៅវគ្គបន្ត។
ចំណែកពូលថៃវិញ មានតែ ៣ នាក់ ដែលឆ្លងកាត់ ៣ ប្រកួត ឈ្នះបាន ១ និងមាន ៤ ពិន្ទុស្មើគ្នា អ៊ីចឹងមិនទាន់រកអ្នកមានប្រៀបឡើងទៅវគ្គបន្តដូចគ្នា៕
