ភ្នំពេញ៖ អ្នកប្រដាល់ចាស់វស្សា ជ័យ ស៊ីណេត ដែលមានឈ្មោះក្នុងបញ្ជីជាតិថា សុវណ្ណ រតនា នោះ បានលេចមុខជាថ្មីក្នុងការប្រកួតមួយនៅសង្វៀនប៉ុស្តិ៍លេខ ៨ ថៃ ក្នុងកម្មវិធី Super Champ ហើយបានផ្តួលម្ចាស់ផ្ទះថៃ ឲ្យសន្លប់ធំ ត្រឹមទឹកទី ២ ដើម្បីបង្កើនបាននូវទំនុកចិត្ត ក្នុងការសាងភាពល្បីល្បាញឡើងវិញ។
បើទោះបីជាកីឡាករកម្ពុជាភាគច្រើនទទួលលទ្ធផលចាញ់ នៅក្នុងកម្មវិធី Super Champ នេះ ប៉ុន្តែការប្រកួតកាលយប់ថ្ងៃសៅរ៍ កន្លងមកនេះ ជ័យ ស៊ីណេត បានលើកមុខមាត់ជាថ្មីឡើងវិញ ដោយប្រើកណ្តាប់ដៃផ្ទួនៗ និងបន្ថែមដោយស្នៀតកែងចូលគោលដៅនាំឲ្យកីឡាករថៃម្ចាស់ផ្ទះឈ្មោះ ណេម៉ា ដួលសន្លប់នៅត្រឹមទឹកទី ២ ប៉ុណ្ណោះ។
សម្រាប់ការប្រកួតនៅទឹកទី ១ ការប្តូរស្នៀតទាត់ និងកណ្តាប់ដៃ មានលក្ខណៈកាច និងពុះកញ្ជ្រោលដូចគ្នា ដែលលំបាក នឹងវាយតម្លៃថា ខាងណាមានប្រៀបជាងណាស់។ នៅពេលចូលដល់ទឹកទី ២ ការប្តូរកណ្តាប់ដៃ ហាក់បីដូចថយចុះ ហើយជំនួសមកវិញដោយស្នៀតទាត់ និងវាយកែងមុខកាណូត។
ទោះជាយ៉ាងណា នៅក្នុងស្ថានភាពដ៏គ្រោះថ្នាក់នោះ ជ័យ ស៊ីណេត បានប្តូរកណ្តាប់ដៃផង កែងមុខកាណូតផង ចូលចំគោលដៅផ្ទួនៗ ហើយជាមួយគ្នានេះ គេបានបន្ថែមដោយស្នៀតកែងស្តាំចូលគល់ថ្គាម បណ្តាលឲ្យកីឡាករថៃដួលទាំងជំហរសន្លប់យ៉ាងលឿនបំផុត។ នេះជាជ័យជម្នះគួរឲ្យភ្ញាក់ផ្អើលមួយរបស់កីឡាករកម្ពុជា ដែលចេញទៅប្រកួតកន្លងមក ទទួលបរាជ័យញឹកញាប់ ប៉ុន្តែលើកនេះបានស្តារមុខមាត់ឡើងវិញ ដោយផ្លែកែងរបស់ ស៊ីណេត។
លោក មីស្ទ័រលី ប្រតិភូនាំកីឡាករទៅប្រកួតនៅ Super Champ បានប្រាប់ថា៖ «ជ័យជម្នះរបស់ ជ័យ ស៊ីណេត មិនមែនចៃដន្យទេ គឺគាត់បានហ្វឹកហាត់ត្រឹមត្រូវ ព្រមទាំងបានថែទាំ បំប៉នកម្លាំង និងថែរក្សាសុខភាពពីខ្ញុំផ្ទាល់ចំនួន ២ សប្តាហ៍ បូករួមទាំងការហាត់នៅក្លិបឃ្លាំងមឿង នៅឯភ្នំពេញ ១ សប្តាហ៍ទៀត ក្រោមការគ្រប់គ្រងរបស់អ្នកគ្រូសុខា ទើបធ្វើឲ្យ ស៊ីណេត មានកម្លាំងល្អ និងប្រកួតបានល្អ»។
លោកបន្តថា នៅពេលដែលក្រុមការងាររបស់យើងទទួលបានការអញ្ជើញពីសង្វៀនថៃភ្លាម យើងបានត្រៀមការហ្វឹកហាត់យ៉ាងតិច ៣ សប្តាហ៍មុន ដើម្បីពង្រឹងសមត្ថភាពកីឡាករឲ្យបានខ្លាំងល្អ ដោយលោកផ្តល់ទីតាំងហ្វឹកហាត់ និងអាហារបំប៉នផងដែរ។
លោកថា៖ «ដើម្បីប្រកួតឈ្នះថៃ ត្រូវតែត្រៀមហ្វឹកហាត់ឲ្យបានល្អ និងទទួលយករបៀបហ្វឹកហាត់តាមបច្ចេកទេសកម្លាំង និងកលល្បិច ហើយកីឡាករជើងខ្លាំង ឬកម្រិតមធ្យមរបស់កម្ពុជា ដែលចង់ទៅប្រកួតក្រៅប្រទេស គឺគួរតែមកហាត់បំប៉នជាមួយក្លិបខ្ញុំ ដោយមិនគិតប្រាក់ដើម្បីប្រកួតឈ្នះ និងបានលើកមុខមាត់ក្លិបរបស់បងប្អូន និងសហព័ន្ធផងដែរ»។
ចំណែក ជ័យ ស៊ីណេត បានឆ្លងឆ្លើយតាមការខលវីដេអូជាមួយភ្នំពេញប៉ុស្តិ៍ថា៖ «ខ្ញុំប្រឹងហាត់ សម្រុកយកថាមពលជាង ៣ សប្តាហ៍ ដោយត្រៀមបានល្អ ហើយក្នុងកម្រិត ៣ ទឹក ខ្ញុំនៅតែធ្វើបានល្អ និងមានទំនុកចិត្តឈ្នះតាំងពីទឹកទី ១ មក»។
ជ័យ ស៊ីណេត បន្តថា៖ «ខ្ញុំចូលប្រឡូកក្នុងប្រដាល់នេះ ចំនួន ២០ ឆ្នាំមកហើយ តាំងពីជំនាន់ដំបូងមាន រឿង សោភ័ណ្ឌ និង ឡុង សុភី ជាដើម ក្នុងនោះក៏ធ្លាប់ផ្តួល ឡុង សុភី ឲ្យសន្លប់បានម្តងដែរ ប៉ុន្តែខ្ញុំមិនដែលឈ្នះបានជើងឯក ឬខ្សែក្រវាត់ទេ ព្រោះមិនសូវមានឱកាសប្រកួតជាមួយកីឡាករបរទេស»។
កីឡាករដដែលនេះបានបន្ថែមថា៖ «ក្នុងរយៈពេល ២០ ឆ្នាំនេះ ខ្ញុំប្រកួតជាមួយបរទេសជាផ្លូវការបាន ៩ ដង ឈ្នះ ៧ និងចាញ់ ២ ដង ប៉ុន្តែប្រកួតតាមខេត្តនៅថៃរាប់មិនអស់ទេ។ នៅខ្មែរ ខ្ញុំមានឱកាសតិចណាស់ បានប្រកួតលក្ខណៈអន្តរជាតិ ហេតុនេះខ្ញុំមិនសូវមានទឹកចិត្តហាត់ ប៉ុន្តែពេលនេះ ខ្ញុំស្វែងរកការប្រកួតក្រៅប្រទេសវិញម្តង ដើម្បីសាងភាពល្បីល្បាញ គឺដើម្បីវ៉ៃរកលុយចិញ្ចឹមជីវិតតែម្ដង ព្រោះខ្ញុំគ្មានមុខរបរអ្វីក្រៅពីនេះឡើយ»៕