.jpg)
ឈុតសេរី វ៉ាន់ថង ត្រូវប្រឈមជាមួយជើងខ្លាំង Thanou Ngen នៅថ្ងៃអាទិត្យ ខាងមុខនេះ។ រូប សហការី
ភ្នំពេញ៖ អ្នកប្រដាល់ចិត្តធំវ័យក្មេងវ៉ៃមិនសំចៃកម្លាំង ឈុតសេរី វ៉ាន់ថង មកពីក្លិបរ៉ាហូកីឡាខេត្តបាត់ដំបង ដែលចូលខ្លួនមកចំណុះឲ្យសមាគមប្រដាល់កីឡាក្រសួងការពារជាតិនោះត្រូវបានគណៈកម្មការផ្គូផ្គងរបស់សង្វៀនអាស៊ីអាគ្នេយ៍ ដាក់ឲ្យប្រកួតជាមួយកីឡាករជើងខ្លាំងរបស់ថៃ Thanou Ngen ក្នុងទម្ងន់ ៦០ គីឡូក្រាម ក្នុងកម្មវិធី Boostrong Fighter នាព្រឹកថ្ងៃអាទិត្យ ខាងមុខនេះ។
តាមកំណត់សម្គាល់ប្រវត្តិប្រកួតរបស់ ឈុតសេរី វ៉ាន់ថង ក្នុងឆ្នាំ ២០១៩ គឺឈ្នះស្ទើរទាំងអស់គឺគេចាញ់កីឡាករថៃតែ ១ ប្រកួត និងដណ្តើមបានខ្សែក្រវាត់ ១ ផងដែរ។ នៅក្នុងការប្រកួតដែលបានចុះបញ្ជីសរុបចំនួន ៦៥ លើក វ៉ាន់ថង ឈ្នះ ៥៧ ដង ចាញ់តែ ៧ និងស្មើ ១ ដង ក្នុងនោះផ្តួលដៃគូឲ្យសន្លប់បាន ២០ ដង។
បច្ចេកទេសប្រកួតរបស់ វ៉ាន់ថង ដែលឈានចូលក្នុងពិភពប្រដាល់រយៈពេលខ្លី ប៉ុន្តែសាងភាពល្បីល្បាញខ្លាំងយ៉ាងលឿនបំផុត គឺទឹកចិត្តប្រកួតធំ ហ៊ានចូលវាយសម្រុកគ្មានសំចៃកម្លាំង ជាមួយបច្ចេកទេសវ៉ៃបែបវៃឆ្លាត និងមិនដែលចុះចាញ់ដៃគូ ទោះបីឧបសគ្គធំ និងប្រឈមខ្លាំងក៏ដោយ។
យ៉ាងណាក៏ដោយ សម្រាប់ការជួបជើងខ្លាំង Thanou Ngen លើកនេះ លោក ឈុត សេរី ដែលជាឪពុក និងជាគ្រូបង្វឹក មានការព្រួយបារម្ភខ្លាំង ខណៈដែលលទ្ធផលនៃការប្រកួតលោករំពឹងឈ្នះត្រឹម ៥០ ភាគរយប៉ុណ្ណោះ ដោយសារសមត្ថភាពរបស់ Thanou Ngen ខ្លាំង និងចាស់វស្សាជាងផងដែរ។
លោក ឈុត សេរី បានប្រាប់ថា៖ «ជំនួបប្រកួតនេះ ជាការងារធ្ងន់ និងលំបាកឈ្នះណាស់ ព្រោះសមត្ថភាព និងបច្ចេកទេសប្រកួតកីឡាករថៃ Thanou Ngen នេះល្អណាស់ ហើយនៅស្រុកថៃគេជាប្រភេទកីឡាល្អខ្លាំង ក្នុងលំដាប់ទម្ងន់ស្រាល។ ហេតុនេះខ្ញុំគិតថា មានសង្ឃឹមឈ្នះត្រឹម ៥០ ភាគរយ ព្រោះបញ្ហាកម្លាំងយើងអាចស្រុតចុះនៅចុងទឹក។ បន្ថែមលើនេះក្បាច់ជង្គង់របស់គេ មានកម្រិតលើយើងបន្តិច ប៉ុន្តែយើងនឹងប្រឹងឲ្យអស់ពីសមត្ថភាព ដើម្បីប្រកួតឲ្យបានល្អ»។
លោកបញ្ជាក់ថា៖ «ទោះបីកូនខ្ញុំជាប់រវល់ខ្លាំង ក្នុងការរៀននៅសាកលវិទ្យាល័យ ប៉ុន្តែការហ្វឹកហាត់នៅតែរក្សាបានជាប់ជាប្រចាំ ព្រោះមុខរបរប្រដាល់នេះហើយ ដែលទទួលបានប្រាក់ជួយក្នុងជីវភាព និងការរៀនសូត្របន្តមកដល់ពេលនេះ។ ជាមួយនឹងការប្រដាល់នេះ ខ្ញុំមានសង្ឃឹមថា ថ្នាក់ដឹកនាំកីឡា នឹងផ្តល់ក្របខ័ណ្ឌជាមន្ត្រីរាជការដល់កូនរបស់ខ្ញុំ ដូចអ្នកប្រដាល់ខ្លាំងៗដទៃទៀត»។
ទោះជាយ៉ាងណាប្រភពមួយសុំលាក់ឈ្មោះបានបង្ហើបថា ឈុតសេរី វ៉ាន់ថង កំពុងស្នើសុំក្របខ័ណ្ឌ ជាកងយោធពលខេមរភូមិន្ទ ដោយសារក្លិបរបស់គេត្រូវបានដាក់បញ្ចូលក្រោមចំណុះសមាគមកីឡាប្រដាល់ក្រសួងការពារជាតិ។
កីឡាករ Thanou Ngen ធ្លាប់មកប្រកួតស្រុកខ្មែរច្រើនលើកដែរហើយ ហើយយើងពិតជាលំបាករកដៃគូមានសមត្ថភាពស័ក្តិសម ឲ្យជួបជាមួយគេណាស់ព្រោះអ្នកប្រយុទ្ធរបស់ថៃម្នាក់នេះចិត្តធំ កណ្តាប់ដៃធ្ងន់ កម្លាំងធានា ៥ ទឹកបានយ៉ាងល្អ។ បើតាមគណៈកម្មការផ្គូផ្គងបានប្រាប់ថា ថៃម្នាក់នេះធ្លាប់ប្រកួត ៦៤ ដង ឈ្នះ ៥៥ និងចាញ់ ៩ ដង ហើយការប្រកួតចុងក្រោយជាមួយ ឡុង សំណាង កាលពីសប្តាហ៍មុន គេចាញ់ពិន្ទុទាំងប្រផិតប្រផើយបំផុត។
លោក ញាន សុធី អ្នកគ្រប់គ្រងកម្មវិធីប្រដាល់ប្រចាំសង្វៀនអាស៊ីអាគ្នេយ៍បានប្រាប់ ភ្នំពេញប៉ុស្តិ៍ ពីថ្ងៃពុធថា៖ «កីឡាករថៃ Thanou Ngen នេះ ធ្លាប់មកប្រកួតនៅសង្វៀនខ្ញុំម្តង គឺមានសមត្ថភាពខ្លាំងគួរឲ្យកត់សម្គាល់ គឺចាញ់ ឡុង សំណាង តែការប្រកួត គឺស៊ូអស្ចារ្យណាស់»៕
