ភ្នំពេញ៖ គ្រូបង្វឹកលោក ឈុត សេរី ដែលជាឪពុកបង្កើតរបស់កីឡាករ ឈុតសេរី វ៉ាន់ថង បានប្រាប់ថា កូនប្រុសរបស់លោក ដែលបានឃ្លាតឆ្ងាយពីសង្វៀនប្រដាល់ជិត ៣ ខែមកហើយនោះ អាចនឹងជួបការលំបាកសម្រាប់ការវិលមកជួបជើងខ្លាំងថៃ Tuon Pe ក្នុងការប្រកួតដណ្តើមប្រាក់លាន ក្នុងទម្ងន់ ៦០ គីឡូក្រាម នៅលើសង្វៀន CNC នារសៀលថ្ងៃសៅរ៍នេះ។
លោក ឈុត សេរី បានប្រាប់ភ្នំពេញប៉ុស្តិ៍ កាលពីម្សិលមិញថា៖ «វ៉ានថង បានខានឡើងប្រកួតចូល ៣ ខែមកហើយ ដោយសារវាជាប់រៀនប្រឡងបាក់ឌុប កាលពីពេលថ្មីៗនេះ ហើយការវិលមកជួប Tuon Pe ស្របពេលយើងបានខកខានប្រកួតយូរបែបនេះ វាពិបាកបន្តិចហើយ តែធ្វើម៉េចបើគេដាក់ឲ្យយើងជួបគ្នាហើយ»។
គ្រូបង្វឹកបានបន្ថែមថា៖ «ខ្ញុំស្គាល់ Tuon Pe ច្បាស់ដូចថ្ងៃអ៊ីចឹង គឺគេជាជើងខ្លាំងដែលធ្លាប់ផ្តួលឲ្យកីឡាករកម្ពុជាសន្លប់ច្រើនគ្នាមកហើយ។ ហេតុនេះ វ៉ាន់ថង ជួប Tuon Pe លើកនេះយ៉ាប់បន្តិច ហើយ ព្រោះស៊ុហ្វគេល្អ គេចាស់វស្សា និងមានទិចនិកខ្ពស់ជាង ហើយគេក៏មានភាពរឹងមាំជាងយើងដែរ»។
ឈុតសេរី វ៉ាន់ថង ជាកីឡាករវ័យក្មេង ដែលមានសមត្ថភាពខ្ពស់ ហើយរូបគេក៏ធ្លាប់បានឈ្នះខ្សែក្រវាត់នៅលើសង្វៀន CNC នេះផងដែរ ក្រោយឈ្នះ តាញ់ មករា នៅវគ្គផ្តាច់ព្រ័ត្រ។ វ៉ាន់ថង ក៏ត្រូវបានជ្រើសរើសដាក់ឲ្យចូលហ្វឹកហាត់ក្នុងក្រុមជម្រើសជាតិគុនខ្មែរ ឆ្នាំ ២០១៩ នេះផងដែរ ប៉ុន្តែលោក ឈុត សេរី បានបដិសេធ ដោយសារលោកចង់ឲ្យ វ៉ាន់ថង មានពេលវេលាគ្រប់គ្រាន់ក្នុងការរៀនសូត្រ ត្រៀមប្រឡងបាក់ឌុប។
ទោះបីជាយ៉ាងណា ការខកខានប្រកួតជិត ៣ ខែមកនេះ ត្រូវបានគេមើលឃើញថា ឈុតសេរី វ៉ាន់ថង អាចនឹងប្រឈមការពិបាកច្រើន សម្រាប់ការដាក់ឲ្យប្រកួតដណ្តើមប្រាក់លានជាមួយ Tuon Pe នៅថ្ងៃសៅរ៍នេះ ព្រោះ Tuon Pe ជាកីឡាករមានសមត្ថភាពខ្ពស់ ហើយជំនាញវាយកែងខ្លីរបស់គេ បានផ្តួលឲ្យកីឡាករកម្ពុជាសន្លប់ច្រើនណាស់មកហើយ។ Tuon Pe ក៏ធ្លាប់បានឈ្នះខ្សែក្រវាត់នៅ CNC ផងដែរ ក្រោយវាយ សុខ សាវិន ឲ្យសន្លប់វគ្គផ្តាច់ព្រ័ត្រ។
លោក ឈុត សេរី បានបន្ថែមថា៖ «បើយើងចូលវាយសម្រុក ដើម្បីតែល្អភ្នែកអ្នកមើល យើងពិបាកទប់ជាមួយ Tuon Pe ហើយ ព្រោះកីឡាករថៃម្នាក់នេះ មានជំនាញវាយខ្លី ហើយកៀក ប៉ុន្តែបើវាយតាមភាពវៃឆ្លាតរបស់ វ៉ាន់ថង គឺវាយដក គេចលិច គេចកើត ឆក់លិច ឆក់កើត អាហ្នឹងមានសង្ឃឹមខ្លះ តែគេថា វាយបែបនេះ មិនល្អភ្នែកអ្នកមើល»។
ជាមួយគ្នានេះ កីឡាករកម្ពុជា ខាំ ខ្លានាង ក៏ត្រូវប្រកួតដណ្តើមប្រាក់លាន ក្នុងទម្ងន់ ៥១ គ.ក្រ ជាមួយថៃ Khav Krachang នៅថ្ងៃសៅរ៍នោះផងដែរ ហើយការប្រកួតប្រាក់លាននេះ គឺអ្នកឈ្នះបាន ១ លានរៀល ស្មើគ្នាបានម្នាក់ ៥០ ម៉ឺនរៀល ឯអ្នកចាញ់បានតែប្រាក់តម្លៃខ្លួនទេ៕