.jpg)
ឈឿង ល្វៃ បានទាត់ ធី តុងហ៊ី បណ្តាលឱ្យសន្លប់ក្នុងទឹកទី២។ សហការី
ភ្នំពេញ៖ អ្នកប្រដាល់វ័យក្មេងទម្ងន់ធ្ងន់ ឈឿង ល្វៃ របស់ក្លិបនាគរាជចតុមុខ កំពុងតែលេចធ្លោខ្លាំងក្នុងប្រភេទទម្ងន់ធ្ងន់ ៧២ គីឡូក្រាម ដោយការប្រកួតឈ្នះជាបន្តបន្ទាប់ ពិសេសឈ្នះជើងចាស់មួយចំនួនទៀត ហើយកាលពីយប់ថ្ងៃអាទិត្យ កន្លងមកនេះ ឈឿង ល្វៃ បានយកឈ្នះជើងខ្លាំង ថៃ រិទ្ធី នៅវគ្គជម្រុះ និងបានបន្តផ្តួលអតីតសិស្សរួមក្លិប ធី តុងហ៊ី ឱ្យសន្លប់ ដើម្បីឈ្នះបានប្រាក់ ៣,៤ លានរៀល នៅលើសង្វៀនថោនជាលើកដំបូង។
ជ័យជម្នះនេះ បានធ្វើឱ្យអ្នកទស្សនាមានការកោតសរសើរយ៉ាងខ្លាំងដល់ ឈឿង ល្វៃ ខណៈដែលទម្ងន់ធ្ងន់ ៧២ គីឡូក្រាមនេះ លំបាករកដៃគូប្រកួតណាស់ ប៉ុន្តែ ឈឿង ល្វៃ ទើបតែចូលប្រឡូកក្នុងវិស័យប្រដាល់ក្នុងក្លិបនាគរាជចតុមុខ បានត្រឹម ២ ឆ្នាំប៉ុណ្ណោះ តែមានឱកាសប្រកួតឈ្នះជើងចាស់មួយចំនួន ហើយ ឈឿង ល្វៃ ក៏ទើបតែឈ្នះជើងឯករងថ្នាក់ជាតិដែរ ក្រោយចាញ់ពិន្ទុ ឡៅ ចន្ទ្រា នៅវគ្គផ្តាច់ព្រ័ត្រ។
ក្រៅពីនេះ ឈឿង ល្វៃ ធ្លាប់ឈ្នះចាញ់ជាមួយជើងចាស់មួយចំនួនដូចជា ឡុង សុភី, វង្ស វិឆ័យ, ឡុង សុវណ្ណឌឿន និង ធឿន ធារ៉ា ជាដើម ប៉ុន្តែមិនទាន់ប៉ះជាមួយជើងខ្លាំងកណ្តាប់ដៃពិឃាត រឿង សោភ័ណ្ឌ នៅឡើយទេ។ ទោះជាយ៉ាងណា នៅក្នុងជំនួបជាមួយ ថៃ រិទ្ធី វគ្គជម្រុះដំបូង កាលពីថ្ងៃអាទិត្យនោះ ល្វៃ ឈ្នះក្នុងលក្ខណៈតឹងតែង ដោយពិន្ទុមិនឯកច្ឆន្ទ ៣ ទល់ ២ ហើយចំណុចទាក់ទាញខ្លាំង ដោយសារ ឈឿង ល្វៃ មានទឹកចិត្តប្រកួតមហាធំ និងប្រើស្នៀតទាត់ ជង្គង់បានល្អ ធ្វើឱ្យ ថៃ រិទ្ធី ដែលមួយរយៈនេះ មិនធ្លាប់ចាញ់នោះ បានស្គាល់រសជាតិចាញ់ទាំងមិនអស់ចិត្ត។
ឈឿង ល្វៃ បាននិយាយថា៖ «កាលខ្ញុំនៅជាមួយលោកគ្រូ ឡុង សាលវ័ន្ត ខ្ញុំដាក់ឈ្មោះឡុង ល្វៃ ដោយធ្លាប់ចាញ់សន្លប់ក្រោមកណ្តាប់ដៃ ថៃ រិទ្ធី នៅសង្វៀនបាយ័ន ប៉ុន្តែពេលនេះខ្ញុំសប្បាយចិត្តខ្លាំងណាស់ ដោយបានឈ្នះជើងខ្លាំង ថៃ រិទ្ធី វិញ និងដណ្តើមបានប្រាក់លាន ដើម្បីទ្រទ្រង់ជីវភាពឱ្យល្អ»។
ឈឿង ល្វៃ បន្ថែមថា៖ «ពីដំបូងខ្ញុំគិតថា លំបាកប្រកួតនេះ និងលំបាកឈ្នះ ថៃ រិទ្ធី ណាស់ ប៉ុន្តែខ្ញុំសម្រេចចិត្តចេញស្នៀតទាត់ និងជង្គង់ឱ្យបានច្រើន ដើម្បីរំខាន និងបិទកុំឱ្យគាត់មានឱកាសវ៉ៃកណ្តាប់ដៃ ព្រោះកណ្តាប់គាត់ចេញធ្ងន់ណាស់ អាចនឹងសន្លប់បាន។ យ៉ាងណាក៏ដោយ ថៃ រិទ្ធី មានពេលខ្លះចង់យ៉ាប់ ដោយសារខ្ញុំទាត់ចូលច្រើន ចំគោលដៅល្អ ហើយស្នៀតទាត់របស់ខ្ញុំនេះ បានបន្តយកទៅប្រើប្រាស់ជាមួយ ធី តុងហ៊ី មានប្រសិទ្ធភាពល្អ ក្នុងវគ្គផ្តាច់ព្រ័ត្រ ដោយខ្ញុំទាត់សន្ធាប់ចូលឆ្អឹងជំនីរ ធ្វើឱ្យគាត់សន្លប់ត្រឹមទឹកទី២ និងឈ្នះបានរង្វាន់តែម្តង»។
ចំណែកលោក ស្វាយ សុខុម ជាគ្រូបង្វឹកបាននិយាយថា៖ «ឈឿង ល្វៃ កំពុងល្អ ព្រោះវាគោរពវិន័យ និងខំហ្វឹកហាត់ល្អ។ ឈឿង ល្វៃ ទើបតែអាយុ ២៣ ឆ្នាំ កម្ពស់ល្អ មកពីភូមិធ្នង់ ឃុំគោល ស្រុកប្រាសាទសំបូរ ខេត្តកំពង់ធំ ហើយក្នុងប្រភេទទម្ងន់ធ្ងន់នេះ គឺអ្នកជំនាន់ក្រោយ ឈឿង ល្វៃ ឈ្នះសឹងគ្មានគូប្រៀប និងកំពុងឈានទៅប្រកួតជាមួយកីឡាករជើងចាស់មួយចំនួនក្នុងលទ្ធផលឈ្នះភាគច្រើនផងដែរ។ ទោះយ៉ាងណា ឈឿង ល្វៃ ពិតជាលំបាករកដៃគូប្រកួតព្រោះក្នុងទម្ងន់ធ្ងន់នេះ កីឡាករខ្លាំងមានសមត្ថភាពប្រហាក់ប្រហែលគ្នាលំបាករក ដោយសារកីឡាករមានចំនួនតិច»៕
