.jpg)
បេក្ខភាពទាំង ៤ នាក់ ដែលត្រូវប្រកួតដណ្តើមប្រាក់លាន នៅលើសង្វៀនថោន ប្រចាំសប្តាហ៍នេះ។ សហការី
ភ្នំពេញ៖ អ្នកប្រដាល់ទម្ងន់ធ្ងន់ ឈឿង ល្វៃ របស់សមាគមប្រដាល់ក្រសួងមហាផ្ទៃត្រូវបានផ្គូផ្គងឱ្យឡើងប្រកួតជាមួយអ្នកប្រដាល់ទម្ងន់ធ្ងន់ ៧២ គីឡូក្រាម ចំនួន ៣ នាក់ទៀត មានកីឡាករ ធី តុងហ៊ី, លួន សុខខេង និង ថៃ រិទ្ធី ក្នុងកម្មវិធីប្រកួតម៉ារ៉ាតុងដណ្តើមប្រាក់លាន នៅលើសង្វៀនថោន នាយប់ថ្ងៃអាទិត្យនេះ។
សម្រាប់អ្នកទាំង ៤ នេះ តម្រូវឱ្យធ្វើការចាប់ឆ្នោតមុនការប្រកួតជម្រុះ ៣ ទឹក ហេតុនេះគេនៅមិនទាន់ដឹងថា អ្នកណាត្រូវជួបជាមួយអ្នកណាទេ ប៉ុន្តែចំពោះអ្នកលេងកណ្តាប់ដៃធ្ងន់ ថៃ រិទ្ធី មានការជឿជាក់ខ្ពស់ថា នឹងឈ្នះបានប្រាក់លានប្រចាំសប្តាហ៍នេះ ព្រោះសូម្បីតែ ឈឿង ល្វៃ ក៏ហាក់ញញើតដែរ ប៉ុន្តែ ឈឿង ល្វៃ បានព្រលយពាក្យថា បើចាប់ឆ្នោតប៉ះ ធី តុងហ៊ី ឬក៏ លួន សុខខេង គឺរូបគេធានាឈ្នះ ១០០ ភាគរយ។ ខណៈការប្រកួតកីឡាប្រដាល់គុនខ្មែរជ្រើសរើសជើងឯកជាតិកន្លងមក ឈឿង ល្វៃ ទទួលបានលេខ ២ ដោយចាញ់តែ ឡៅ ចន្ទ្រា ម្នាក់ប៉ុណ្ណោះ។
ទាក់ទងទៅនឹងការជ្រើសរើសកីឡាករទម្ងន់ធ្ងន់ប្រកួតដណ្តើមប្រាក់លាននេះ លោក ជួប វុត្ថា អ្នកផ្គូផ្គងការប្រកួតប្រចាំសង្វៀនថោន បានប្រាប់ថា៖ «កីឡាករទម្ងន់ធ្ងន់ជាង ៧២ គីឡូក្រាមនេះ ពិតជាលំបាករកដៃគូឱ្យប្រហាក់ប្រហែលគ្នាណាស់ ព្រោះយើងបាត់បង់ និងអវត្តមានកីឡាករប្រភេទនេះច្រើន ហើយនៅក្នុងចំណោមអ្នកប្រដាល់ទាំង ៤ នេះ យើងមើលឃើញថា ថៃ រិទ្ធី និង ឈឿង ល្វៃ មានសមត្ថភាពលេចធ្លោជាងគេ ចំណែក ធី តុងហ៊ី និង លួន សុខខេង ទោះជាធ្លាប់ជាកីឡាករលំដាប់ខ្លាំង និងមានបទពិសោធនៅលើសង្វៀនជិត ២០ ឆ្នាំក្ដី ប៉ុន្តែការប្រកួតរបស់អ្នកទាំង ២ មួយរយៈនេះ ទំនងធ្លាក់ចុះនូវកម្លាំង។
តាមរយៈការសម្ភាសពីប្រវត្តិប្រកួត លួង សុខខេង ចាស់វស្សាជាងគេ ដោយប្រកួតបានចំនួន ១៣៣ ដង ឈ្នះ ១០០ ចាញ់ ៣១ ស្មើ ២ ដង ក្នុងនោះផ្តួលដៃគូឱ្យសន្លប់បាន ៣៦ ដង ចំណែក ធី តុងហ៊ី ធ្លាប់ប្រកួតបាន ៦៦ ដង ឈ្នះ ៥២ ចាញ់ ១២ ស្មើ ២ ដង ក្នុងនោះផ្តួលដៃគូសន្លប់ ៣២ ដង ហើយ ថៃ រិទ្ធី ប្រកួតបាន ៥៦ ដង ឈ្នះ ៤២ ចាញ់ ១២ ស្មើ ២ ដង ក្នុងនោះផ្តួលដៃគូសន្លប់ ៣៤ ដង ខណៈ ឈឿង ល្វៃ ជាអ្នកប្រដាល់វ័យក្មេងជំនាន់ក្រោយ ធ្លាប់ប្រកួតបាន ៤០ ដង ឈ្នះ ៣០ ចាញ់ ៨ ស្មើ ២ ដង ក្នុងនោះផ្តួលគូតស៊ូឱ្យសន្លប់បាន ១១ ដង។
ទោះជាយ៉ាងណា ឈឿង ល្វៃ មិនដែលញញើតជើងចាស់ណាម្នាក់ឡើយ ហើយក្នុងកម្មវិធីដណ្តើមប្រាក់លាននៅថោននេះ រូបគេធ្លាប់ចូលប្រកួតបាន ២ លើក។ ឈឿង ល្វៃ បានប្រាប់ថា៖ «បើជួប ថៃ រិទ្ធី ខ្ញុំសង្ឃឹមឈ្នះ តែ ៦០ ភាគរយប៉ុណ្ណោះ ប៉ុន្តែប្រសិនចាប់ឆ្នោតប៉ះចំកីឡាករ លួន សុខខេង ឬ ធី តុងហ៊ី គឺសង្ឃឹមឈ្នះ ១០០ ភាគរយ»។
ចំណែក ថៃ រិទ្ធិ ដែលជាកីឡាករឆ្នើមប្រចាំសង្វៀនថោន ដោយប្រកួតមិនធ្លាប់ចាញ់នោះបាននិយាយថា៖ «ខ្ញុំមានទំនុក ចិត្តឈ្នះ ៩០ ភាគរយ ប៉ុន្តែតឹងតែង ប្រសិនប៉ះ ឈឿង ល្វៃ»។ សម្រាប់ ធី តុងហ៊ី និង លួន សុខខេង បាននិយាយស្រដៀងគ្នាថា ជួបកីឡាករវ័យក្មេងៗ យើងមានបញ្ហាផ្នែកកម្លាំង ហេតុនេះការប្រកួតតាំងចិត្តយកឈ្នះ ប៉ុន្តែមិនសង្ឃឹមឈ្នះខ្ពស់ទេ ចាំមើលប្រកួតជាក់ស្តែងសិន។
ចំពោះ លោក ធន់ សុភា គ្រូបង្វឹក ថៃ រិទ្ធី និយាយថា៖ «ខ្ញុំមើលឃើញថា ថៃ រិទ្ធី មានការលំបាកនៅពេលប្រកួតជាមួយ ឈឿង ល្វៃ តែទោះបីជាយ៉ាងណា រិទ្ធី មានប្រៀបផ្នែកទាត់ កណ្តាប់ដៃ និងកម្លាំងល្អជាង អ៊ីចឹងខ្ញុំមានសង្ឃឹមដល់ទៅ ៩០ ភាគរយ»៕
