.jpg)
ទូច ដាវីដ បានទាត់ទៅលើ មាស សារ៉ាក់ នៅក្នុងប្រកួតផ្តាច់ព្រ័ត្រម៉ារ៉ាតុងដណ្តើមជើងឯក។ រូបថត PNN
ភ្នំពេញ៖ អ្នកប្រដាល់វ័យក្មេង កំពុងប្រជែងបានភាពល្បីល្បាញ ទូច ដាវីដ បានចាត់ទុកការប្តូរញើសឈាមស្រស់ៗ នៅលើសង្វៀន ថា ជាដើមទុនដ៏សំខាន់សម្រាប់រូបគេរកបានប្រាក់កម្រៃយកទៅផ្គត់ផ្គង់គ្រួសារ និងទុកសម្រាប់យកទៅបន្តការសិក្សានៅមហាវិទ្យាល័យ ដោយកីឡាកររូបនេះ អះអាងថា ចង់រៀនផ្នែកច្បាប់ និងចង់មានការងារក្នុងក្របខ័ណ្ឌនាពេលអនាគត។
ទូច ដាវីដ បាននិយាយថា៖ «ការឈ្នះជើងឯកម៉ារ៉ាតុងក្នុងទម្ងន់ ៦០ គីឡូក្រាមនេះ គឺនឹងធ្វើឲ្យគ្រប់ស្ថានីយសម្លឹងឃើញពីសមត្ថភាពរបស់ខ្ញុំ ហើយនឹងធ្វើឲ្យខ្ញុំមានឈ្មោះបានប្រកួតញឹកញាប់ នៅលើសង្វៀនប្រដាល់របស់ពួកគាត់ ព្រោះការចូលរួមប្រឡូកក្នុងវិស័យប្រដាល់នេះ ខ្ញុំសង្ឃឹម និងចាត់ទុកថា ជាដើមទុនមួយ ដែលយើងអាចរកកម្រៃបានយកទៅផ្គត់ផ្គង់គ្រួសារ និងទុកសម្រាប់ការសិក្សា»។
យ៉ាងណាក៏ដោយ នៅពេលនេះ ទូច ដាវីដ នៅមិនទាន់បានចូលសិក្សានៅមហាវិទ្យាល័យនៅឡើយទេ គឺក្នុងអំឡុងពេល ១ ឆ្នាំនេះ ដាវីដ បានផ្តោតខ្លាំងទៅលើការហ្វឹកហាត់ និងប្រកួត ដើម្បីរកកម្រៃ ហើយកំលោះរូបនេះ បានបញ្ជាក់ថា រូបគេនឹងមិនបោះបង់ចោលប្រដាល់នោះទេ ទោះបីជារូបគេរៀនចប់ ហើយមានការងារធ្វើក៏ដោយ។
សិស្សគណក្លិបអារុណរះកីឡា ទូច ដាវីដ បានបន្ថែមថា៖ «ខ្ញុំបានផ្អាកការសិក្សារយៈពេល ១ ឆ្នាំ ដើម្បីរកលុយទៅរៀនបន្តនៅមហាវិទ្យាល័យ អ៊ីចឹងការសិក្សា និងប្រដាល់ត្រូវដើរទន្ទឹមគ្នា គឺខ្ញុំមិនបោះបង់ចោលការប្រដាល់នោះទេ ហើយប៉ារបស់ខ្ញុំ បានប្រាប់ថា ត្រូវរៀនផង និងហ្វឹកហាត់ប្រដាល់ផង កុំចោលមួយណាឲ្យសោះ។ ខ្ញុំចង់រៀនផ្នែកច្បាប់ ហើយនៅពេលរៀនចប់ ខ្ញុំប្រឡងរកការងារធ្វើ ដោយខ្ញុំចង់មានការងារក្នុងក្របខ័ណ្ឌ ដើម្បីមានពេលហាត់ប្រដាល់ផង»។
ការលើកឡើងរបស់ជើងខ្លាំងវ័យក្មេង ទូច ដាវីដ ត្រូវបានធ្វើឡើង បន្ទាប់ពីរូបគេ បានក្លាយជាម្ចាស់ជើងឯកនៅក្នុងការប្រកួតម៉ារ៉ាតុងដណ្តើមជើងឯក នៅលើសង្វៀន PNN ក្នុងទម្ងន់ ៦០ គីឡូក្រាម កាលពីថ្ងៃអាទិត្យ ដោយក្នុងការប្រកួតយ៉ាងស្វិតស្វាញនោះ ទូច ដាវីដ បានទាត់ឲ្យកីឡាករ ប៉ិល សេងហេង ខូចជើង និងសុំចុះចាញ់ នៅចុងទឹកទី៣ សម្រាប់ការប្រកួតវគ្គជម្រុះ មុនពេលរូបគេបានបន្តយកឈ្នះ លើ មាស សារ៉ាក់ នៅវគ្គផ្តាច់ព្រ័ត្រដោយពិន្ទុ។
នៅពេលសួរដល់ការប្រកួតផ្តាច់ព្រ័ត្រជាមួយ មាស សារ៉ាក់ ដែលបានឈ្នះ លាស់ យីន នៅវគ្គជម្រុះនោះ ដាវីដ ប្រាប់ថា៖ «គាត់ជាកីឡាករចូលចិត្តដើរបុក ក៏ប៉ុន្តែដោយសារតែគាត់ប្រើកម្លាំងអស់នៅក្នុងការប្រកួតវគ្គជម្រុះ អ៊ីចឹងវាធ្វើឲ្យមានភាពអំណោយផលដល់យើង ដោយគាត់រាងអស់ស៊ុហ្វជាងយើង»។
ដាវីដ បានបន្ថែមថា៖ «នៅពេលគាត់រាងអស់ស៊ុហ្វ យើងអាចវាយបុកទៅគាត់នៅទឹកទី១ ប៉ុន្តែចូលទឹកទី២ គាត់វាយបុកយើងវិញ ហើយចូលទឹកទី៣ ខ្ញុំវាយយកៗតែម្តង។ យ៉ាងណាក៏ដោយ ទឹកទី៣ រាងពិបាកជាងគេ ព្រោះគាត់ចូលចាប់ឡាំ ធ្វើឲ្យយើងរាងអស់ដែរ គឺរាងចាញ់ឡាំគាត់បន្តិច តែការបុកជង្គង់របស់គាត់ អត់យកជាសាច់ការទេ ដោយសារភាគច្រើនវាយពីក្រោយ»។
តាមរយៈការឈ្នះតំណែងជើងឯកសម្រាប់ការប្រកួតម៉ារ៉ាតុង នៅលើសង្វៀន PNN នេះ ទូច ដាវីដ ទទួលបានប្រាក់រង្វាន់ ២,៦ លានរៀល ខណៈ មាស សារ៉ាក់ ទទួលបាន ១,២ លានរៀល ហើយបន្ថែមលើនេះ ទូច ដាវីដ ក៏នឹងមានឱកាសច្រើន បានប្រកួតលក្ខណៈអន្តរជាតិ លើសង្វៀននេះ នៅពេលដែលមានការបើកឲ្យប្រកួតអន្តរជាតិវិញផងដែរ៕
