.jpg)
អ្នកចាំទី Manuel Neuer (ឆ្វេង) និង Andre Ter Stegen កំពុងហ្វឹកហាត់ជាមួយគ្នា កំលុងពេលក្រុមជម្រើសជាតិអាល្លឺម៉ង់ ត្រៀមប្រកួតមិត្តភាពជាមួយអាហ្សង់ទីន នាពេលកន្លងមក។
ក្រុងប៊ែរឡាំង: Marc-Andre Ter Stegen អ្នកចាំទីរបស់ក្រុមអ្នកបុណ្យ Barcelona កំពុងមានឱកាសក្នុងការអភិវឌ្ឍខ្លួន ដើម្បីដណ្ដើមអាវលេខ ១ របស់ក្រុមជម្រើសជាតអាល្លឺម៉ង់ ពេលរូបគេត្រូវប្រឈមជាមួយមិត្តរួមជាតិ Manuel Neuer អ្នកចាំបង្គោលទីដៃស្អិតរបស់ក្រុម Bayern Munich អំឡុងការប្រកួតក្របខ័ណ្ឌ Champions League វគ្គ ៨ ក្រុម នៅយប់ថ្ងៃសុក្រនេះ។
កីឡាករ Neuer វ័យ ៣៤ ឆ្នាំ មិនត្រឹមតែជាអ្នកចាំទីដៃទី១ ប៉ុណ្ណោះទេ ថែមទាំងជាប្រធានក្រុមជម្រើសជាតិឥន្ទ្រីដែកអាល្លឺម៉ង់ទៀតផង តាំងពីកីឡាករ Bastian Schweinsteiger ចូលនិវត្តន៍ក្នុងឆ្នាំ ២០១៦ តែកីឡាករ Ter Stegen កំពុងមានមហិច្ឆតាដណ្ដើមតួនាទីជាជម្រើសទី ១ ម្ដង ខណៈទាំង ២ នាក់មានទម្រង់ប្រហែលៗគ្នា។
ពាក់ព័ន្ធនឹងកីឡាករទាំង ២ នាក់ លោក Bodo Illgner ដែលជាអ្នកចាំទី ពេលក្រុមជម្រើសជាតិអាល្លឺម៉ង់លើកពាន World Cup 1990 នៅអ៊ីតាលី បាននិយាយថា៖ «ដោយគិតលើចំណុចជាច្រើន ដែលបង្ហាញពីគុណសម្បត្តិរបស់អ្នកចាំទីសម័យថ្មី ខ្ញុំយល់ថា ពួកគេសឹងតែដូចគ្នាបេះបិទ»។
អតីតអ្នកចាំទីវ័យ ៥៣ ឆ្នាំ បានលើកឡើងបន្តថា៖ «ពួកគេទាំង ២ នាក់ មានទម្រង់ស្រដៀងគ្នា ទាំងការឈរចាំក្នុងប្រអប់ទី, ពេលត្រូវប្រឈម ១ ទល់នឹង ១, លក្ខណៈសម្បត្តិផ្ទាល់ខ្លួនរបស់ពួកគេ និងសូម្បីតែការរារាំងបាល់វគ្គប៉េណាល់ទី»។
ក្រោយត្រឹមជាជម្រើសទី ២ រាប់ឆ្នាំ ក្នុងក្រុមជម្រើសជាតិអាល្លឺម៉ង់ កីឡាករ Ter Stegen វ័យ ២៨ ឆ្នាំ ដែលបានបង្ហាញខ្លួន ២៤ លើក ក្នុងការប្រកួតអន្តរជាតិ ទីបំផុតក៏អស់ភាពអត់ធ្មត់ កាលពីខែកញ្ញា កន្លងទៅ ដោយបានបង្កើតជាសំណួរថា ហេតុអ្វីកីឡាករ Neuer ដែលជាអ្នកចាំទីរបស់អាល្លឺម៉ង់ តាំងពីឆ្នាំ ២០១០ នៅតែជាជម្រើសដំបូងយ៉ាងទៀងទាត់ ក្រោមការដឹកនាំរបស់លោក Joachim Loew។
ជាមួយគ្នានេះ ពួកគេ ក៏ត្រូវបានប្រៀបប្រដូចទៅនឹងខ្សែប្រយុទ្ធឆ្នើម ២ រូប គឺកីឡាករព័រទុយហ្គាល់ Cristiano Ronaldo និងកីឡាករអាហ្សង់ទីន Lionel Messi ដោយសារទម្រង់លេងល្អដូចគ្នា ហើយក៏អាចពាក់ព័ន្ធនឹងកម្ពស់នៃអ្នកទាំង ២ ផងដែរ។ កីឡាករ Neuer មានផលចំណេញខាងរាងកាយ ដោយសារមានកម្ពស់ ១,៩២ ម៉ែត្រ ខណៈ Ter Stegen មាន ១,៨៧ ម៉ែត្រ។
អតីតខ្សែការពារ Benedikt Howedes ដែលមានចំណែកជាមួយកីឡាករ Neuer ជួយឲ្យអាល្លឺម៉ង់លើកពាន World Cup 2014 នៅប្រេស៊ីល បានធ្វើការប្រដូចថា ពួកគេប្រៀបដូចជាកំពូលអ្នកចាំទី ២ រូប នៃការប្រកួតអ៊ីចឹង ដោយកីឡាករចូលនិវត្តន៍រូបនេះ បាននិយាយយ៉ាងខ្លីថា៖ «វាប្រៀបដូចជាការប្រឈមជាមួយគ្នារវាងកីឡាករ Ronaldo និង Messi អ៊ីចឹង។ ពួកគេសុទ្ធតែឆ្នើមដូចគ្នា»៕ AFP/VN
