.jpg)
ឃីម ឌីម៉ា បានម៉ាត់ទៅលើគូប្រកួត ដើម្បីឈ្នះមេដាយមាសស៊ីហ្គេមឲ្យកម្ពុជាកាលឆ្នាំ ២០១៧។ រូប ភ្នំពេញប៉ុស្តិ៍
ភ្នំពេញៈ ម្ចាស់មេដាយមាសស៊ីហ្គេម ឆ្នាំ ២០១៧ ឃីម ឌីម៉ា (ឃុន ឌីម៉ា) បាននិងកំពុងជួបប្រទះនូវការខ្វះខាតក្នុងការព្យាបាលជំងឺវះកាត់ ហើយលោក ហេង ប៊ុនឃីម ដែលជាឪពុកបានប្រាប់កាលពីថ្ងៃចន្ទថា ឌីម៉ា បានត្រឡប់មកពីប្រទេសថៃ បន្ទាប់ពីស្វែងរកការព្យាបាលមានតម្លៃខ្ពស់ពេកដោយត្រូវវះកាត់នូវជំងឺធ្ងន់ចំនួន ៣ ប្រភេទមានដាច់សរសៃពួរក្បាលជង្គង់, ដុះសាច់ដុំកំភួនជើង និងប្រេះឆ្អឹងស្មងជើង ហើយបញ្ហានេះត្រូវបានលោក ប៊ុនឃីម បង្ហើបថា ឌីម៉ា អាចនឹងមិនបានទៅចូលការប្រកួតស៊ីហ្គេមនៅហ្វីលីពីនចុងឆ្នាំ ២០១៩ នេះទេ។
លោក ហេង ប៊ុនឃីម បានថា៖ «ក្រោយពេលពិនិត្យរួចហើយខាងគ្រួសារខ្ញុំ បានសម្រេចនាំ ឌីម៉ា វិលត្រឡប់ពីប្រទេសថៃមកមកផ្ទះវិញសិន ដើម្បីស្វែងរកប្រាក់ព្យាបាលបន្ថែម ព្រោះតម្លៃព្យាបាលនៅពេទ្យមួយកន្លែងក្នុងប្រទេសថៃគេយកថ្លៃព្យាបាល ១៥ ០០០ ដុល្លារ ហើយនៅថ្ងៃស្អែក (ថ្ងៃអង្គារនេះ) មានគេនាំទៅមន្ទីរពេទ្យប្រទេសថៃមួយកន្លែងទៀត ដែលគេប្រាប់ថា មានតម្លៃព្យាបាលប្រហែល ៥ ០០០ ទៅ ៧ ០០០ ដុល្លារ»។
លោកឪពុករូបនេះបានបន្ថែមថា៖ «ការសម្រេចចិត្តនាំ ឌីម៉ា ទៅព្យាបាលនៅប្រទេសថៃនេះ ដោយសារជំងឺទាំងនេះធ្វើទុក្ខ វាទ្រាំលែងបាន ហើយការវិលមកវិញនេះគឺខ្ញុំមកលក់ដីមួយកន្លែងបានប្រាក់ត្រឹម ៣ ០០០ ដុល្លារ ដើម្បីមើលកូន និងផ្សែផ្សំខ្លះដើម្បីបង្គ្រប់ការព្យាបាល ហើយខ្ញុំគិតថានៅក្នុងឆ្នាំនេះ ឌីម៉ា ដែលត្រៀមទៅប្រកួតស៊ីហ្គេមនៅហ្វីលីពីនខែកញ្ញា ឆ្នាំ ២០១៩ អាចនឹងខកខាន ព្រោះក្រោយការវះកាត់មិនអាចជាសះស្បើយទាន់ទេ»។
ចំណែកលោក ជឹម ផល្លា គ្រូពេទ្យប្រចាំការក្រុមជម្រើសជាតិបានប្រាប់ថា៖ «ក្រុមគ្រូពេទ្យយើងបានសម្របសម្រួលឲ្យ ឌីម៉ា សម្រាកនៅមន្ទីរពេទ្យក្នុងស្រុក មានកាល់ម៉ែត,ព្រះអង្គឌួង,ពេទ្យរុស្ស៊ី និងពេទ្យលោកសង្ឃដែលមានការជួយព្យាបាលមិនយកប្រាក់ទេ ព្រោះមានលិខិតពីក្រសួងសុខាភិបាលអន្តរាគមន៍ផង»។
លោកបន្ថែមថា៖ «គ្រូពេទ្យជម្រើសជាតិប្រចាំការចំនួន ៦ នាក់បានជួយតាមដាន ប៉ុន្តែ ឃីម ឌីម៉ា មានជម្រើសផ្ទាល់ខ្លួនចង់ទៅពេទ្យក្រៅប្រទេស ហើយនេះជាសិទ្ធិរបស់គាត់ផ្ទាល់ខ្លួន។ កាលពីម្សិលមិញខ្ញុំបានទូរស័ព្ទហៅគាត់ឲ្យមកភ្នំពេញវិញគឺមានពេទ្យជំនាញរង់ចាំព្យាបាលដោយមិនបង់ប្រាក់ តែគាត់ចង់ទៅព្យាបាលនៅក្រៅប្រទេស»។
លោក ប៉ុន សុខ នាយកមជ្ឈមណ្ឌលជាតិហ្វឹកហ្វឺនកីឡាបានប្រាប់ថា៖ «យើងយកចិត្តទុកដាក់មើល ឌីម៉ា ព្រោះគាត់ជាកីឡាករឆ្នើមជម្រើសជាតិ និងបានឈ្នះមេដាយមាស ស៊ីហ្គេមជូនជាតិកាលពីឆ្នាំ ២០១៧។ ទោះជា ឃីម ឌីម៉ា បានជ្រើសយកការព្យាបាលនៅក្រៅប្រទេសក៏យើងនៅតែតាមជួយឧបត្ថម្ភគាត់ ព្រោះក្រោមការយកចិត្តទុកដាក់របស់ក្រសួងអប់រំដែលមានឯកឧត្តម ស សុខា ជារដ្ឋលេខាធិការទទួលបន្ទុកផ្នែកកីឡាគឺយកចិត្តទុកដាក់គ្រប់កីឡាករ កីឡាករជម្រើសជាតិទាំងអស់មិនយកលុយនោះទេ»។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានថ្លែងថា៖ «បើ ឌីម៉ា ជ្រើសយកពេទ្យក្រៅប្រទេសក៏សហព័ន្ធនៅតែប្រឹងប្រែងជួយឧបត្ថម្ភ ហើយក៏សូមស្នើសប្បុរសជនចូលរួមជួយដល់គាត់តាមសទ្ធា ដើម្បីជួយគ្នា។ ពីដំបូង ឌីម៉ា ត្រូវបានក្រុមគ្រូពេទ្យបញ្ជូនទៅព្យាបាលក្នុងស្រុក តែបន្ទាប់មកបានចេញទៅប្រទេសថៃដោយជម្រើសរបស់គាត់»។
តាមការអះអាងរបស់លោក ប៊ុនឃីម ជាឪពុកបានឲ្យដឹងថា ឃីម ឌីម៉ា រងរបួសដាច់សរសៃជង្គង់ធ្ងន់ ២ កន្លែង បន្ទាប់ពីប្រកួតជាមួយជើងខ្លាំងថៃ Kev kangvan នៅសង្វៀនអាស៊ីអាគ្នេយ៍ដោយបានលទ្ធផលស្មើគ្នាកាលពីខែមុន បន្ទាប់មកក្រោយពេលថតឆ្លុះរកឃើញមានប្រេះឆ្អឹងស្មង និងដុះសាច់កំភួនជើងទៀត។ បើតាមគ្រូពេទ្យប្រាប់ក្រោយពេលព្យាបាលគឺអាចចំណាយពេលសម្រាកប្រហែល ៦ ខែទៅ ១២ ខែ ហេតុនេះការប្រកួតស៊ីហ្គេម នៅហ្វីលីពីនក្នុងខែកញ្ញា ឆ្នាំ ២០១៩ នេះគឺអាចខកខាន៕
