ភ្នំពេញៈ កីឡាករជើងខ្លាំង ឃីម ឌីម៉ា (ឃុន ឌីម៉ា) ត្រូវបានគណៈកម្មការផ្គូផ្គង ដាក់ឲ្យប្រកួតសងសឹកជាមួយអ្នកប្រដាល់ជើងខ្លាំងរបស់ថៃ Fonluong នៅលើសង្វៀន CNC នាព្រលប់ថ្ងៃសៅរ៍នេះ ចំណែកមិត្តរួមជាតិរបស់គេ ថា សារុន និង ប៊ុនសុធា ក៏ត្រូវដាក់ប្រកួតជាមួយថៃថ្ងៃសៅរ៍នោះផងដែរ។
ការវិលមកជួបគ្នារបស់ម្ចាស់មេដាយស៊ីហ្គេមឆ្នាំ ២០១៧ ឃីម ឌីម៉ា និងកីឡាករមិនធ្លាប់ស្គាល់រសជាតិចាញ់លើសង្វៀនប្រដាល់នៅស្រុកខ្មែរ Fonluong ជាលើកទី ២ នេះបានក្លាយជាការប្រកួតដែលមានការចាប់អារម្មណ៍ខ្លាំងបំផុត ព្រោះអ្នកទស្សនាចង់ដឹងថា តើ ឌីម៉ា អាចយកឈ្នះ Fonluong ដើម្បីលុបលាងភាពហ្មងសៅចំពោះការចាញ់ថៃម្នាក់នេះវិញបានទេ?
យ៉ាងណាក៏ដោយនៅពេលរំឭកពីការចាញ់ Fonluong ក្នុងការប្រកួតវគ្គផ្តាច់ព្រ័ត្រដណ្តើមពានគោជល់កាលពីថ្ងៃទី ២០ ខែមករា ឆ្នាំ ២០១៨ នៅលើសង្វៀន CNC នោះ ឃីម ឌីម៉ា មិនបានទទួលស្គាល់ថារូបគេចាញ់នោះទេ ហើយ ឌីម៉ា បានចាត់ទុកការជួប Fonluong វាមិនមែនជាការប្រកួតដែលមានភាពលំបាកចំពោះរូបគេនោះទេ។
សិស្សគណក្លិបកងរាជអាវុធហត្ថរាជធានីភ្នំពេញ ឃីម ឌីម៉ា បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «ខ្ញុំមិនគិតថាការជួប Fonluong វាជាការប្រកួតដែលមានការពិបាកចំពោះខ្ញុំនោះទេ ហើយការជួបគ្នាលើកមុន ខ្ញុំក៏មើលឃើញថាខ្ញុំមិនត្រូវចាញ់គេនោះដែរ តែវាជាការសម្រេចរបស់ចៅក្រម»។
តាមរយៈការប្រកួតវគ្គផ្តាច់ព្រ័ត្រដណ្តើមពានគោជល់កាលពីថ្ងៃទី ២០ ខែមករា ឆ្នាំ ២០១៨ នោះ ឃីម ឌីម៉ា និង Fonluong បានប្រកួតគ្នាយ៉ាងស្វិតស្វាញបំផុត ហើយតាមរយៈការប្រកួត ៥ ទឹកពេញពិសេស ៣ ទឹកចុងក្រោយត្រូវបានគេមើលឃើញថា ឌីម៉ា ហាក់មានប្រៀបលើការបុកជង្គង់ ព្រមទាំងការតាមម៉ាត់ និងវាយកែងទៅលើ Fonluong ប៉ុន្តែលទ្ធផលផ្លូវការគឺចៅក្រមបានផ្តល់ជ័យជម្នះទៅឲ្យ Fonluong ដោយពិន្ទុមិនឯកច្ឆន្ទ ៤-១។
យ៉ាងណាក៏ដោយការវិលមកជួប Fonluong ជាលើកទី ២ នេះ ឃីម ឌីម៉ា ហាក់នៅតែមានភាពស្រពេចស្រពិលក្នុងការបញ្ជាក់ពីមហិច្ឆតាក្នុងការយកឈ្នះលើថៃម្នាក់នេះ ព្រោះ Fonluong ជាជើងខ្លាំងដែលមិនធ្លាប់ចាញ់កីឡាករកម្ពុជានោះទេ ព្រោះក្រៅពីការយកឈ្នះ ឃីម ឌីម៉ា ថៃម្នាក់នេះបានឈ្នះ ផល សោភ័ណ្ឌ ដោយពិន្ទុ ២ លើកឈ្នះ ផាន់ គ្រាន់ និងឈ្នះ ឡុង សំណាង ផងដែរ។
ឃីម ឌីម៉ា បាននិយាយថា៖ «ខ្ញុំមិនអាចនិយាយថាខ្ញុំនឹងវ៉ៃផ្តាច់ ដើម្បីយកឈ្នះ Fonluong ដើម្បីកុំឲ្យមានភាពសង្ស័យក្នុងការកាត់សេចក្តីរបស់ចៅក្រមនោះទេ ព្រោះគេក៏ហាត់ដូចយើងដែរ ហេតុនេះអ្វីៗវាអាស្រ័យនៅពេលប្រកួតជាក់ស្តែង ប៉ុន្តែខ្ញុំនឹងព្យាយាមយកឈ្នះថៃម្នាក់នេះវិញ ហើយខ្ញុំក៏បានត្រៀមខ្លួនបានល្អផងដែរ»។
ចំណែកកីឡាករកម្ពុជា ថា សារុន និង ប៊ុន សុធា ក៏ត្រូវដាក់ឲ្យប្រកួតមិត្តភាពអន្តរជាតិនៅលើសង្វៀន CNC ថ្ងៃសៅរ៍នោះផងដែរដោយក្នុងនោះ សារុន ត្រូវជួបថៃ Ly Shin ក្នុងទម្ងន់ ៦០ គីឡូក្រាម ហើយ ប៊ុន សុធា ត្រូវប្រកួតក្នុងទម្ងន់ ៥៤ គីឡូក្រាមជាមួយអ្នកប្រដាល់របស់ថៃ Phit Petsaen៕