ភ្នំពេញ៖ អ្នកប្រដាល់ ឌុម កែវដា របស់ក្លិបមកុដរាជសីហ៍នៃសមាគមប្រដាល់ក្រសួងមហាផ្ទៃពិតជាមិនធ្វើឲ្យក្ដីសង្ឃឹមរបស់ខ្លួន ក្លាយទៅជាអាសាបង់នោះទេ ខណៈរូបគេបានវាយសម្រុកផ្តួលអតីតមិត្តរួមក្លិប វ៉ែន ហុងជីវ៉ុង តាមបណ្តាំគ្រូ រួចបន្តម៉ាត់ឲ្យ សឿន ឆ្នើម សន្លប់ធំនៅវគ្គផ្តាច់ព្រ័ត្រ ដើម្បីក្លាយជាម្ចាស់ប្រាក់លានមានទឹកប្រាក់ ៣,៤ លានរៀល ក្នុងការប្រកួតម៉ារ៉ាតុងដណ្តើមប្រាក់លានទម្ងន់ ៦៣,៥ គីឡូក្រាម នៃកម្មវិធី Mas Fight Cambodia នៅលើសង្វៀនថោនកាលពីថ្ងៃអាទិត្យនោះ។
ការវាយកែង និងទាត់ឲ្យអតីតសិស្សរួមក្លិប ហុងជីវ៉ុង សន្លប់នៅចុងទឹកទី ២ ក្នុងការប្រកួតវគ្គជម្រុះតាមច្បាប់គុនខ្មែរមាន ៣ ទឹក និងការបន្តទៅម៉ាត់ឲ្យ សឿន ឆ្នើម សន្លប់ធំ ដោយប្រើពេល ១:៣១ នាទី ក្នុងការប្រកួតផ្តាច់ព្រ័ត្រ ដោយប្រើរូបមន្ត Mas Fight ១ ទឹកមាន ៩ នាទី វាបានក្លាយជាលទ្ធផលដ៏ល្អបំផុត ដែលស្របទៅតាមអ្វីដែល ឌុម កែវដា និងគ្រូបង្វឹករបស់គេបានរំពឹងទុកតាំងពីមុនប្រកួត។
បន្ថែមលើនេះ ការប្រកួតយ៉ាងស្រួចស្រាល់ វ៉ៃសម្រុកអស់ពីសមត្ថភាពនេះ វាក៏បានបង្ហាញនូវតម្លាភាព ឬជម្រះភាពមន្ទិល ពីទំនាក់ទំនងរវាង វ៉ែន ហុងជីវ៉ុង និង ឌុម កែវដា កាលពីអតីតកាលផងដែរ ព្រោះ វ៉ែន ហុងជីវ៉ុង ដែលធ្លាប់រឹងមាំ ហើយកម្រនឹងចាញ់ដោយសន្លប់នោះ មិនអាចគេចផុតពីស្នៀតកែង ជង្គង់ និងកណ្តាប់ដៃ វាយសន្ធាប់ឲ្យសន្លប់ត្រឹមទឹកទី២ ដែលគ្មានបន្ធូរដៃរបស់ ឌុម កែវដា បាននោះទេ។
ឌុម កែវដា បានប្រាប់ភ្នំពេញប៉ុស្តិ៍ ក្រោយការប្រកួតថា៖ «គម្រោងប្លង់វ៉ៃ គឺបានពិភាក្សាជាមួយលោកគ្រូ គង់ ចាន់ធីណា និងសិស្សច្បង រឿង សោភ័ណ្ឌ ថា ត្រូវចូលវាយសម្រុកគ្មានបន្ធូរដៃ និងគ្មានសំចៃកម្លាំងទេ គឺអស់ថាមពលពេលណា ចាំរកកលល្បិចបន្ត។ ហេតុនេះហើយការប្រកួតវគ្គជម្រុះជាមួយ វ៉ែន ហុងជីវ៉ុង គឺគាត់រឹងមាំណាស់ បើវាយមិនកាច មិនប្រើកែង និងជង្គង់យ៉ាងស្រួចស្រាល់ទេនោះ មិនអាចបង្ខំគាត់ឲ្យសន្លប់បានឡើយ»។
ម្ចាស់ប្រាក់លានរូបនេះ បានបន្តថា៖ «នៅក្នុងការប្រកួតកំណត់ត្រឹម ៣ ទឹកនេះ ខ្ញុំរំពឹងឈ្នះត្រឹមពិន្ទុទេ ប៉ុន្តែគ្រូបង្វឹកបានប្រាប់ថា ត្រូវតែវ៉ៃប្តូរកែង ទើបអាចផ្តួលដៃគូឲ្យសន្លប់បាន ហេតុនេះខ្ញុំមិនអាចចំណាយពេលស្ទាបស្ទង់គ្នាបានទេ។ ចំណែកនៅវគ្គផ្តាច់ព្រ័ត្រ ខ្ញុំរំពឹងផ្តួល សឿន ឆ្នើមបានតាំងពីមុនឡើងសង្វៀនម្ល៉េះ ព្រោះគាត់នៅក្មេងមានបទពិសោធខ្ចីជាងខ្ញុំ ហើយសូម្បីតែឈ្នះលើ រឿង វណ្ណៈ ក៏លំបាកលំបិនដែរ។ ខ្ញុំគិតថា សឿន ឆ្នើម គ្មានឧបសគ្គធំទេ គឺមិនអាចគេចពីសន្លប់បានឡើយ»។
ចំណែកកីឡាករ សឿន ឆ្នើម មិនអាចទាក់ទងសុំសម្ភាសបានទេ ពីបញ្ហាចាញ់នេះ។ ប៉ុន្តែកីឡាករ វ៉ែន ហុងជីវ៉ុង បាននិយាយក្រោយប្រកួតចាញ់ថា៖ «ខ្ញុំលំបាកទប់ទល់ ព្រោះ កែវដា វ៉ៃកាច សម្រុកភ្លាមៗ ធ្វើឲ្យខ្ញុំទទួលរងធ្ងន់ៗផ្នែកជង្គង់ និងកែងវង្វេងវង្វាន់ បាត់បង់ស្នៀតការពារអស់រលីង ដែលមិននឹកស្មានដល់។ ខ្ញុំចាញ់នេះអស់ចិត្ត ប៉ុន្តែបើប្រកួត ៥ ទឹកវិញ ឌុម កែវដា មិនហ៊ានវាយសម្រុកកាចអ៊ីចឹងនោះទេ ព្រោះខ្លាចអស់កម្លាំងចុងទឹក»។
ជាមួយគ្នានេះ រឿង វណ្ណៈ ដែលបានចាញ់ពិន្ទុ សឿន ឆ្នើម ដោយលទ្ធផល ២-១ នៅក្នុងវគ្គជម្រុះមាន ៣ ទឹកនោះ មិនអស់ចិត្តនោះទេ។ វណ្ណៈ បាននិយាយថា៖ «ខ្ញុំចាញ់មិនអស់ចិត្តទេ គឺសូម្បីពិន្ទុពីចៅក្រម ក៏មិនឯកច្ឆន្ទដែរ ហេតុនេះបើមានឱកាសសងសឹក ខ្ញុំសុំប្រកួតម្តងទៀតព្រោះខ្ញុំចាញ់នេះ ពិតជាគួរឲ្យស្តាយណាស់»៕