.jpg)
ភ្នំពេញ៖ អ្នកគ្រប់គ្រង ឌុម កែវដា ហាក់មានទំនុកចិត្តខ្ពស់ថា កីឡាកររូបនេះមានភាគរយខ្ពស់ក្នុងការក្លាយជាជើងឯកប្រាក់លាន ក្នុងកម្មវិធីប្រកួតម៉ារ៉ាតុងដណ្តើមប្រាក់លានទម្ងន់ ៦៣,៥ គ.ក្រ នៃកម្មវិធី Mas Fight Cambodia នៅលើសង្វៀនថោន នាល្ងាចថ្ងៃអាទិត្យ ចុងសប្តាហ៍នេះ។
នៅក្នុងការប្រកួតដ៏គួរឲ្យចាប់អារម្មណ៍នេះ នាយកគ្រប់គ្រងកម្មវិធី Mas Fight Cambodia លោក គឹម ស្រ៊ុនកុសល បានសហការជាមួយសហព័ន្ធកីឡាប្រដាល់គុនខ្មែរ ជ្រើសរើសអ្នកប្រដាល់មានសមត្ថភាពកម្រិតល្អចំនួន ៤ នាក់ រួមមាន ឌុម កែវដា, វ៉ែន ហុងជីវ៉ុង, សឿន ឆ្នើម និង រឿម វណ្ណៈ ដើម្បីឲ្យប្រកួតប្រជែងគ្នា ដោយប្រើច្បាប់ប្រកួត ២ បញ្ចូលគ្នា ហើយអ្នកទាំង ៤ នេះតម្រូវឲ្យធ្វើការចាប់ឆ្នោតមុនការប្រកួតតែម្តង។
លោក គឹម ស្រ៊ុនកុសល បានប្រាប់ថា៖ «ការប្រកួតម៉ារ៉ាតុងដណ្តើមប្រាក់លាននេះ យើងបានយកច្បាប់ប្រកួត ២ លាយចូលគ្នា គឺច្បាប់គុនខ្មែរ និងច្បាប់ Mas Fight។ មានន័យថា នៅក្នុងការប្រកួតវគ្គជម្រុះ យើងកំណត់ឲ្យប្រកួត ៣ ទឹក យកតាមច្បាប់គុនខ្មែរ ដើម្បីរកអ្នកឈ្នះ ឡើងទៅវគ្គផ្តាច់ព្រ័ត្រ ហើយនៅក្នុងវគ្គនេះ យើងប្រើច្បាប់ Mas Fight វិញ គឺប្រកួត ១ ទឹក មាន ៩ នាទីពេញ ដើម្បីរកម្ចាស់ជើងឯក ដោយបានផ្តួលគូប្រកួតឲ្យសន្លប់ ប៉ុន្តែបើពួកគេមិនអាចផ្តួលដៃគូឲ្យសន្លប់ទេ គឺបានលទ្ធផលស្មើ យើងនឹងចែកលុយរង្វាន់ស្មើគ្នា»។
បន្ថែមលើនេះ លោក MC Vutha ផលិតករ និងជាអ្នកអត្ថាធិប្បាយក្នុងកម្មវិធីនេះបានប្រាប់ឲ្យដឹងទៀតថា៖ «នៅក្នុងការប្រកួតផ្តាច់ព្រ័ត្រ បើក្នុងករណីគ្មានអ្នកសន្លប់ គឺពួកគាត់ឈ្នះបានទឹកប្រាក់ចំនួន ១,៨ លានរៀល ប៉ុន្តែបើពួកគាត់ផ្តួលដៃគូឲ្យសន្លប់ គាត់នឹងទទួលបានជាជើងឯក Mas Fight Winner Championship នូវទឹកប្រាក់ ៣,៤ លានរៀល រួមជាមួយប្រាក់រង្វាន់ផ្សេងទៀត»។
ទាក់ទងទៅនឹងសមត្ថភាពកីឡាករទាំង ៤ រូបនេះវិញ ត្រូវបានគេកត់សម្គាល់ឃើញថា សឿន ឆ្នើម មានបទពិសោធតិចជាងគេ ខណៈ រឿម វណ្ណៈ ឌុម កែវដា និងវ៉ែន ហុងជីវ៉ុង សុទ្ធតែចាស់វស្សា ហើយយោងតាមប្រវត្តិប្រកួតនៅក្នុងចំណោមកីឡាករឆ្នើមទាំង ៤ នេះ មានតែ ឌុម កែវដា ម្នាក់គត់ធ្លាប់ឈ្នះខ្សែក្រវាត់ចំនួន ២ និងជើងឯករង ក្រៅពីនេះពុំទាន់មានអ្នកណាធ្លាប់គ្រងខ្សែក្រវាត់នោះទេ។
លោក គង់ ចាន់ធីណា ដែលជាគ្រូបង្វឹក និងអ្នកគ្រប់គ្រង ឌុម កែវដា បាននិយាយថា៖ «ឌុម កែវដា អាចនឹងមានទំនុកចិត្ត និងភាគរយខ្ពស់ ក្នុងការឈ្នះប្រាក់លាននេះ ប៉ុន្តែឧបសគ្គធំគឺមានតែ វ៉ែន ហុងជីវ៉ុង ម្នាក់ប៉ុណ្ណោះ ចំណែក រឿម វណ្ណៈ និង សឿន ឆ្នើម ជាឧបសគ្គតូចតាច។ ខ្ញុំជឿជាក់ថា កែវដា មានសមត្ថភាពដល់ទៅ ៩០ ភាគរយ ដែលឈ្នះប្រាក់លាន ព្រោះរាល់ថ្ងៃកំពុងហ្វឹកហាត់ខ្លាំងជាមួយ រឿង សោភ័ណ្ឌ ដែលជាសិស្សច្បង»។
ចំណែក វ៉ែន ហុងជីវ៉ុង និយាយថា៖ «ខ្ញុំមិនដឹងថា យ៉ាងដូចម្តេចទេ គឺដឹងតែឡើងប្រកួតអស់ពីសមត្ថភាព ចំណែកបញ្ហាចាញ់ ឬឈ្នះ មិនហ៊ាននិយាយមុនប្រកួតទេ។ ខ្ញុំសង្ឃឹមឈ្នះត្រឹម ៧០ ភាគរយ»៕
