.jpg)
ណាម ម៉ូរ៉ាក់ រំពឹងអាចយកឈ្នះ វ៉ែន ហុងជីវ៉ុង ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។ រូប សហការី
ភ្នំពេញ៖ អ្នកលេងកណ្តាប់ដៃធ្ងន់ ណាម ម៉ូរ៉ាក់ មានការជឿជាក់ថា រូបគេអាចនឹងយកឈ្នះលើមិត្តរួមខេត្តបាត់ដំបងជាមួយគ្នា វ៉ែន ហុងជីវ៉ុង ដើម្បីបានឡើងទៅវគ្គពាក់កណ្តាលផ្តាច់ព្រ័ត្រ នៃព្រឹត្តិការណ៍ TV5 Boxing Knock Out Serie ចំណែកជើងខ្លាំងជំនាន់ថ្មី ខាំ សាបាន ក៏ត្រូវប្រជែងនឹង រិន សារ័ត្ន នៅវគ្គ ៨ នាក់ចុងក្រោយ នៅយប់ថ្ងៃសៅរ៍នេះដែរ។
ជាមួយនឹងឱកាសវគ្គកាន់តែសំខាន់នេះ ណាម ម៉ូរ៉ាក់ បានប្រាប់ថា៖ «ខ្ញុំហ្វឹកហាត់ត្រៀមបានល្អ ហើយខ្ញុំតាំងចិត្តយកឈ្នះ វ៉ែន ហុងជីវ៉ុង ឲ្យបាន ដើម្បីមានឱកាសឡើងទៅកៅអីពាក់កណ្តាលផ្តាច់ព្រ័ត្រឲ្យបាន ព្រោះដៃគូដែលត្រូវប្រជែងមិនជាឧបសគ្គធំប៉ុន្មាននោះទេ»។
តាមប្រវត្តិ និងបទពិសោធលើសង្វៀន ណាម ម៉ូរ៉ាក់ ធ្លាប់ឈ្នះខ្សែក្រវាត់មួយនៅ CTN ចំណែក វ៉ែន ហុងជីវ៉ុង មិនធ្លាប់ឈ្នះពាន ឬខ្សែក្រវាត់នោះឡើយ ហើយកាលពីឆ្នាំ ២០១៨ ពួកគេធ្លាប់ប៉ះគ្នា ក្នុងកម្មវិធីគូបូតា នៅខេត្តបាត់ដំបង ដោយបានស្មើគ្នា ប៉ុន្តែមកដល់ពេលនេះអ្នកទាំង ២ មានការរីកចម្រើនរៀងៗខ្លួន គឺ ណាម ម៉ូរ៉ាក់ ជំនាញកណ្តាប់ដៃ វ៉ៃលុកខ្លាំងគ្មានញញើត ចំណែក វ៉ែន ហុងជីវ៉ុង ជំនាញក្បាច់ជង្គង់ ភាគច្រើនទប់ទល់វ៉ៃតាមបច្ចេកទេស។
លោក វ៉ែន សុវណ្ណ ជាបងបង្កើតបានប្រាប់ថា៖ «ហុងជីវ៉ុង ហ្វឹកហាត់មិនសូវបានល្អដោយជាប់ការងារច្រើន មើលគោ និងការងារផ្ទះ ប៉ុន្តែធានាវ៉ៃបានល្អ ពិសេសស្នៀតជង្គង់នឹងធ្វើឲ្យ ណាម ម៉ូរ៉ាក់ លំបាកចូលកៀកណាស់»។
ចំណែក វ៉ែន ហុងជីវ៉ុង បាននិយាយថា៖ «បើខ្ញុំចាប់បានលេងក្បាច់ជង្គង់នោះ ណាម ម៉ូរ៉ាក់ អាចនឹងសន្លប់ ប៉ុន្តែវាស៊ីសងប្រកួតជាក់ស្តែង ព្រោះគេល្អកណ្តាប់ដៃមែន ដែលលំបាកក្នុងការបិទដែរ»។ ទោះជាយ៉ាងណាសម្រាប់ ណាម ម៉ូរ៉ាក់ និងគ្រូបង្វឹកលោក សៅ ប៊ុនធិន បានអះអាងថា សង្ឃឹមឈ្នះលើ វ៉ែន ហុងជីវ៉ុង ៨០ ភាគរយ ព្រមទាំងមានគោលដៅ ឈានឲ្យដល់វគ្គផ្តាច់ព្រ័ត្រទៀតផង។
គួររំឭកថា សម្រាប់ការប្រកួតជម្រុះចាញ់ធ្លាក់ ២ លើកកន្លងមកនេះ ណាម ម៉ូរ៉ាក់ បានឈ្នះ មាស សារ៉ាក់ ដោយពិន្ទុនៅជុំទី១ និងបន្តឈ្នះដោយស្វ័យប្រវត្តិលើ វេន សុភ័ក្រ ដោយមានបញ្ហាសុខភាព នៅជុំទី២ ចំណែក វ៉ែន ហុងជីវ៉ុង បានឈ្នះ សុខ សុវណ្ណ ដោយពិន្ទុនៅជុំទី១ និងបន្តឈ្នះ សោម ស៊ីថៃ ដោយពិន្ទុនៅជុំទី២។
ចំណែកការជួបគ្នារវាង ខាំ សាបាន និង រិន សារ័ត្ន ត្រូវបានគេផ្តល់ទំនុកចិត្តទៅលើ សារ័ត្ន ដោយកីឡាករម្នាក់នេះ មានបទពិសោធប្រកួតច្រើនជាង ខាំ សាបាន ប៉ុន្តែ សាបាន ក៏ធ្លាប់បានយកឈ្នះកីឡាករជើងចាស់ច្រើនផងដែរ ខណៈការប្រកួតជម្រុះ ២ លើកកន្លងមកនេះ ខាំសាបាន បានឈ្នះ ពុទ្ធ អ៊ុំអ៊័ន និង អៀប លីឆា ដោយពិន្ទុដូចគ្នា ចំណែក រិន សារ័ត្ន បានឈ្នះ សល់ ពិសិដ្ឋ ដែលរក្សាទម្ងន់មិនបាន និងជុំទី២ ឈ្នះ អ៊ុំ កំសត់ ដោយពិន្ទុ។
ដោយឡែក យុគ យក្សផ្លែ ដែលទើបចាញ់ Kamlayok នោះ ត្រូវដាក់ឲ្យប្រកួតមិត្តភាពអន្តរជាតិជាមួយអ្នកប្រដាល់ថៃ Khav Niev ក្នុងប្រភេទទម្ងន់ ៥៧ គីឡូក្រាម នៅយប់ថ្ងៃសៅរ៍នោះដែរ។
លោក ថៃ អ៊ូ ប្រតិភូនាំកីឡាករថៃមកប្រកួតបាននិយាយថា៖ «Khav Niev នេះ ជាជើងថ្មី មិនទាន់ដឹងសមត្ថភាពកម្រិតណា ឬជំនាញផ្នែកអីនោះទេ ប៉ុន្តែលទ្ធផលចាញ់ ឬឈ្នះពិតជាតឹងតែងល្អមើល»៕
