.jpg)
លោកអាជ្ញាកណ្តាលបានលើកដៃឲ្យ រិន សារ័ត្ន ឈ្នះពិន្ទុ ខាំ សាបាន កាលពីថ្ងៃសៅរ៍។ រូបថត យឺន ពន្លក
ភ្នំពេញៈ អ្នកលេងកណ្តាប់ដៃធ្ងន់ ណាម ម៉ូរ៉ាក់ មកក្លិបសាមគ្គីខេត្តបាត់ដំបង បានចាញ់មិត្តរួមខេត្ត វ៉ែន ហុងជីវ៉ុង ក្លិបកងកេងបាត់ដំបងដោយអស់ចិត្ត នៅក្នុងការប្រកួតជម្រុះដណ្តើមពាន TV5 Boxing Knock Out Serie ចំណែកជើងថ្មី ខាំ សាបាន ក៏បានទទួលស្គាល់ពីការធ្លាក់ចេញត្រឹមវគ្គ ៨ នាក់ចុងក្រោយនេះ ក្រោមស្នាដៃកីឡាករជើងចាស់ រិន សារ័ត្ន ផងដែរ។
សម្រាប់ការប្រកួតកាលពីថ្ងៃសៅរ៍នោះ ការចូលវាយសម្រុករបស់ ណាម ម៉ូរ៉ាក់ មិនសូវចំគោលដៅនោះទេ ព្រោះក្បាច់ទាត់របស់ វ៉ែន ហុងជីវ៉ុង វាយចំល្អ និងមានប្រសិទ្ធភាពជាង។ បន្ថែមពីលើនេះស្នៀតកែងរបស់ វ៉ែន ហុងជីវ៉ុង បានបន្សល់ស្នាមបែកហូរឈាមឲ្យ ណាម ម៉ូរ៉ាក់ តាំងពីទឹកទី ២ ដែលធ្វើឲ្យអាជ្ញាកណ្តាល រិទ្ធ ឌីណា ជូតឈាមនៅស្នាមបែកជាច្រើនលើក និងគ្រូពេទ្យដេរដល់ទៅ ៨ ថ្នេរឯណោះ។
ស្រដៀងគ្នានេះ កីឡាករ ខាំ សាបាន របស់ក្លិបរ៉ាហាប់ស្វាយប៉ាកត្រូវបានកីឡាករ រិនសារ័ត្ន ទាត់ស្កាត់បានល្អ គ្មានឱកាសបានវ៉ៃកណ្តាប់ដៃចូលគោលដៅនោះឡើយ ហើយ ណាម ម៉ូរ៉ាក់ និង ខាំ សាបាន សុទ្ធតែទទួលស្គាល់ថា ខ្លួនចាញ់ដោយអស់ចិត្ត ខណៈដែលស្នៀតកណ្តាប់ដៃវាយមិនចូលគោលដៅដូចគ្នាគឺធ្វើឲ្យ វ៉ែន ហុងជីវ៉ុង និង រិន សារ័ត្ន ទទួលបានឱកាសឡើងទៅជួបគ្នានៅវគ្គពាក់កណ្តាលផ្តាច់ព្រ័ត្រ ដើម្បីប្រជែងយកទឹកប្រាក់ ៤ ០០០ ដុល្លារ និងពានក្នុងទម្ងន់ ៦៣,៥ គីឡូក្រុមរដូវកាលទី ៧ ឆ្នាំ ២០២០ នេះ។
កីឡាករ ណាម ម៉ូរ៉ាក់ បាននិយាយក្រោយការប្រកួតថា៖ «មូលហេតុដែលនាំឲ្យខ្ញុំចាញ់ក្នុងការប្រកួតនេះ ដោយសារខ្ញុំចូលវាយមិនចុះ ព្រោះគាត់ទាត់ស្កាត់បានល្អ ហើយពេលឱបចាញ់ក្បាច់កាច់ឡើងជង្គង់ទៀត។ ខ្ញុំព្យាយាមចូលវាយពោះទឹក និងមុខ ប៉ុន្តែគេទាត់ស្កាត់ និងវាយកែងឲ្យខ្ញុំបែកឈាម គឺកាន់តែសម្រុកកាន់តែត្រូវធ្ងន់មកវិញ។ ខ្ញុំមិនអស់កម្លាំងទេ ប៉ុន្តែការប្រកួតមានតែចំនួន ៣ ទឹក ខ្ញុំអស់ឱកាសវ៉ៃគេឲ្យសន្លប់»។
ស្រដៀងគ្នានេះ កីឡាករ ខាំ សាបាន បានចាញ់ ដោយសារចាញ់ស្នៀតទាត់ស្កាត់ចូលគោលដៅពេញៗរបស់ រិន សារ័ត្ន ដូចគ្នា។ បឺត សំខាន់ ជាគ្រូបង្វឹក ដែលនៅឲ្យទឹក ខាំ សាបាន ផ្ទាល់បាននិយាយថា៖ «កូនសិស្សយើងនៅខ្ចីជាងគេ បទពិសោធតិចជាងគេ គឺយើងចាញ់មែនត្រង់ចំណុចទាត់ចេញរបស់គេល្អជាង និងបានពិន្ទុ ខណៈក្បាច់កណ្តាប់ដៃវាយចេញរបស់យើង មិនដល់គោលដៅ»។
ផ្ទុយពីនេះ រិន សារ័ត្ន និង វ៉ែន ហុងជីវ៉ុង ដែលត្រូវឡើងទៅជួបគ្នានៅវគ្គបន្តនោះបានប្រាប់ក្រោយប្រកួតថា នឹងខំហ្វឹកហាត់ឲ្យបានល្អ ប៉ុន្តែមិនហ៊ានអះអាងថាអាចយកឈ្នះគ្នាក្នុងលក្ខណៈបែបណាទេ ព្រោះពួកគេទាំង ២ នេះចាស់វស្សាដូចគ្នា និងធ្លាប់ស្គាល់រាប់អានគ្នា និងហ្វឹកហាត់ជាមួយគ្នាទៀតផង។ រិន សារ័ត្ន បញ្ជាក់ថា៖ «ខ្ញុំឡើងវ៉ៃអត់គិតពីមិត្តភក្តិអីទេ ព្រោះត្រូវការឈ្នះដូចគ្នា ដោយសារវគ្គទី ៤ នោះសំខាន់កិត្តិយស និងប្រាក់រង្វាន់ច្រើនផង»។
ចំណែកគូមិត្តភាពអន្តរជាតិវិញ យុគ យក្សផ្លែ នៅតែបន្តចាញ់កីឡាករជើងថ្មីរបស់ថៃ Khav Neav បន្ទាប់ពីប្រកួតគ្នាស្វិតស្វាញចំនួន ៥ ទឹកពេញ។ ទោះជាយ៉ាងណា លោក អូឡា ឡា ជំនួយការផ្គូផ្គងប្រចាំសង្វៀនប៉ុស្តិ៍លេខ ៥ បានហៅគូនេះថា ជាគូជក់ចិត្តបំផុត ហើយលោកបានសម្រេចដាក់ឲ្យពួកគេឡើងប្រកួតគ្នានៅប៉ុន្មានសប្តាហ៍ក្រោយនេះម្តងទៀត ព្រោះសមត្ថភាពរបស់អ្នកទាំង ២ គឺចាញ់ឈ្នះគ្នាក្នុងលក្ខណៈតឹងតែងណាស់ ដែលមហាជនអ្នកទស្សនាពេញចិត្ត សុំឲ្យសងសឹកគ្នាឡើងវិញ៕
