ភ្នំពេញ៖ ក្រុមម្ចាស់ជើងឯកលីកកំពូលកម្ពុជា ឆ្នាំ ២០១៨ ណាហ្គាវើល បានជួបការបរាជ័យដ៏ជូរចត់ជាងក្រុមណាៗ ទាំងអស់ នៅក្នុងការប្រកួតបើកឆាកពានរង្វាន់ AFC Cup 2019 ខណៈពួកគេ បានចាញ់ក្រុមម្ចាស់ផ្ទះវៀតណាម Hanoi FC រហូតដល់ ១០ គ្រាប់នោះ។
វាស្ទើរជារឿងដែលមិនគួរឲ្យជឿ នៅពេលក្រុមជើងឯកលីកកំពូលកម្ពុជា ណាហ្គាវើល បានទៅចាញ់ក្រុមជើងឯកលីកកំពូលវៀតណាម Hanoi FC រហូតដល់ ១០-០ នោះ ប៉ុន្តែលទ្ធផលដ៏គួរឲ្យភ្ញាក់ផ្អើលនេះ ពិតជាបានកើតមានឡើង នៅពហុកីឡដ្ឋាន Hang Day Stadium ក្នុងទីក្រុងហាណូយ កាលពីយប់ថ្ងៃអង្គារ ខណៈក្រុមណាហ្គាវើល មិនអាចទប់ទល់ជាមួយទម្រង់លេងដ៏ល្អរបស់ក្រុម Hanoi បាននោះ។
លោក មាស ចាន់ណា គ្រូបង្វឹកក្រុមណាហ្គាវើល បានបង្ហាញការបារម្ភតាំងពីមុនការប្រកួត ព្រោះការលេងក្រៅទឹកដីនេះ ណាហ្គាវើល ត្រូវជម្នះទាំងអាកាសធាតុត្រជាក់ និងបញ្ហាប្រឈមផ្សេងៗទៀត នៅលើទឹកដីក្រុងហាណូយ ពិសេសទម្រង់លេងដ៏ល្អរបស់ក្រុម Hanoi ដែលមានសមាជិកក្រុមជម្រើសជាតិវៀតណាម រហូតដល់ ៨ នាក់ ហើយអ្នកទាំងនេះ ទើបតែបានរួមចំណែកជួយក្រុមវៀតណាម ឲ្យឡើងទៅដល់វគ្គ ៨ ក្រុម នៃពានជើងឯកទ្វីបអាស៊ី AFC Asian Cup 2019។
បន្ថែមលើនេះ ក្រុម Hanoi មានកីឡាកបរទេសមានគុណភាពចំនួន ៤ នាក់ ចូលរួមជួយផដែរ មានខ្សែប្រយុទ្ធនីហ្សេរីយ៉ាពាក់លេខ ៩០ Ganiyu Oseni ខ្សែប្រយុទ្ធសេនីហ្គាល់ពាក់លេខ ២០ Pape Omar ខ្សែបម្រើអូហ្គង់ដាពាក់លេខ ៨ Moses Oloya និងខ្សែការពារជនជាតិហ្កាមពាក់លេខ ១៤ Brandon McDonald ហើយអ្នកទាំងនេះ បានបំពេញតួនាទីយ៉ាងល្អ នៅក្នយងការយកឈ្នះក្រុមណាហ្គាវើល ១០-០ លើកនេះ។
ការនាំមុខក្រុមណាហ្គាវើល ចំនួន ៤ គ្រាប់ នៅតង់ទី១ និងការបន្ថែម៦គ្រាប់ទៀត នៅតង់ទី២ នេះ ខ្សែប្រយុទ្ធ Ganiyu Oseni រកបាន៤គ្រាប់តែម្នាក់ឯង នៅនាទី ទី ១៣ ៦៨ ៧៥ និង ៨១ ខណៈ Do Duy Manh រកបានគ្រាប់បាល់បើកឆាកនៅនាទី ទី ៦ មុនពេល Nguyen Van Quyet ជាប្រធានក្រុម ស៊ុតបាល់ពិន័យ ១១ ម៉ែត្របានសម្រេច នៅនាទី ទី ៤៤ ឯ Do Hung Dung រកបាន ១ គ្រាប់ នៅនាទីទី ៤៨ Nguyen Van Dung នៅនាទី ទី ៧២ Ngan Van Dai នៅនាទី ទី ៨៨ ហើយ ១ គ្រាប់ទៀត ជាការភ្លាត់ធ្វើឲ្យចូលទីខ្លួនឯងរបស់កីឡាករ ឡេង មករា នៅនាទី ទី ១៨។
ជាមួយការចាញ់ក្រុម Hanoi FC រហូតដល់ ១០-០ នេះ វាបានក្លាយជាលទ្ធផលដ៏អាក្រក់ ដែលក្រុមណាហ្គាវើល របស់កម្ពុជា មិនធ្លាប់ជួបប្រទះកន្លងមកនោះទេ ហើយការបូត ១០ គ្រាប់នេះ វាជាលទ្ធផល ដែលមានគម្លាតឆ្ងាយពីលទ្ធផលនៃការប្រកួតបើកឆាករវាងក្រុមឈរនៅពូលផ្សេងៗទៀត នាថ្ងៃបើកឆាកពាន AFC Cup 2019 នេះដែរ។
នៅក្នុងការប្រកួតកាលពីថ្ងៃអង្គារនោះដែរ ក្រុមលេខ ៤ លីកកំពូលសិង្ហបុរី Tampines Rovers Tampines បានយកឈ្នះក្រុមម្ចាស់ជើងលីកកំពូលមីយ៉ាន់ម៉ា Yangon United ៣-១ ដើម្បីឈរនៅលេខ ២ ប្រចាំពូលFនេះ ដោយមាន៣ ពិន្ទុស្មើក្រុមឈរនៅលេខ ១ Hanoi FC ខណៈ Yongon United និងណាហ្គាវើល ដែលត្រូវជួបគ្នា នៅថ្ងៃទី ១២ ខែមីនា គឺមានសូន្យពិន្ទុដូចគ្នា។
,លទ្ធផលការប្រកួតបើកឆាកពូលផ្សេងៗទៀត
ពូលA
-ក្រុម Al-Wehdat (ហ្ស៊កដានី) ១-០ Nejmeh (លីបង់)
- Al-Jaish (ស៊ីរី) ១-១ Hilal Al-Quds (ប៉ាឡេស្ទីន)
ពូលB
- Al-Kuwait (កូវ៉ែត) ០-០ Al-Lttihad (ស៊ីរី)
- Al-Najma (បារ៉ែន) ១-១ Al-Jazeera (ហ្ស៊ក់ដានី)
ពូលC
- Malkiya (បារ៉ែន) ២-១ Al-Suwaiq (អូមេន)
- Al-Ahed (លីបង់) ០-០ Al-Qadsia (កូវ៉ែត)
ពូលG
-Ceres-Negros (ហ្វីលីពីន) ៣-២ Shan United (មីយ៉ាន់ម៉ា)
- Persiga Jakarta (ឥណ្ឌូនេស៊ី) ០-០ Becamex Binh Duong (វៀតណាម)