ភ្នំពេញ៖ ក្រុមខ្លាំង វិសាខា នឹងត្រូវប្រឈមជាមួយក្រុមកំពុងឈរនៅលើកំពូលតារាង ភ្នំពេញក្រោន សម្រាប់ការបើកឲ្យដំណើការវិញនៃការប្រកួតលីកកំពូលកម្ពុជាឆ្នាំ ២០២០ នៅថ្ងៃសៅរ៍ និងថ្ងៃអាទិត្យនេះ ចំណែកណាហ្គាវើល ត្រូវប្រជែងនឹងក្រុម Tiffy Army FC (ទ័ព) ខណៈក្រុមទាំង ២ នេះ សុទ្ធតែរំពឹងទទួលបានលទ្ធផលល្អ ប៉ុន្តែក្រុមម្ចាស់ជើងឯក ព្រះខ័នរាជស្វាយរៀង នឹងលេងដោយគ្មានសម្ពាធសម្រាប់ការវិលមកកាន់វាលស្មៅជាថ្មីនេះ។
ការវិលមកជួបគ្នារវាងក្រុមម្ចាស់ផ្ទះ ភ្នំពេញក្រោន និងវិសាខា នៅថ្ងៃអាទិត្យនេះ វាបានក្លាយជាការប្រកួតធំជាងគេ ខណៈក្រុមទាំង ២ សុទ្ធតែត្រូវការឈ្នះ ដើម្បីដោះស្រាយសម្ពាធនៅជុំវិញខ្លួន។ ភ្នំពេញក្រោន ត្រូវការឈ្នះ ដើម្បីរក្សាតំបន់កំពូលតារាងរបស់ខ្លួនពីការប្រជែងរបស់ក្រុមស្វាយរៀង ដែលនឹងលេងដោយគ្មានសម្ពាធ ហើយអាចនឹងឈ្នះបាន ៣ ពិន្ទុ ខណៈពួកគេត្រូវជួបក្រុមមានបទពិសោធក្មេងខ្ចី យុវជនបាទីអាយុក្រោម ១៨ ឆ្នាំនោះ។
ប៉ុន្តែខ្សែប្រយុទ្ធភ្នំពេញក្រោន Paul Omogba និយាយថា៖ «អ្វីដែលយើងរៀបចំនៅពេលនេះ គឺដើម្បីឈ្នះការប្រកួត និងធ្វើឲ្យបានល្អ សម្រាប់ក្រុមអ្នកគាំទ្ររបស់ពួកយើង។ ពួកយើងធ្វើការខ្លាំងណាស់ សម្រាប់ការត្រលប់មកវិញនេះ គឺពួកយើងយកចិត្តទុកដាក់ទាំងកម្លាំង និងស្មារតី ចាប់តាំងពីយើងបានឈរនៅកំពូលតារាងមក អ៊ីចឹងយើងត្រូវតែរក្សាតំណែងនេះ និងបន្តវារហូតដល់អ្វីៗបានបញ្ចប់»។
យ៉ាងណាក៏ដោយ លទ្ធផលនៅមិនទាន់ដឹងច្បាស់នោះទេ ព្រោះក្រុមវិសាខា ក៏ត្រូវការឈ្នះខ្លាំងបំផុតដូចគ្នា ដើម្បីរក្សាទីតាំងលេខ ៣ ដូចគ្នា ព្រោះបើពួកគេចាញ់ ក្រោន លើកនេះ វិសាខា អាចនឹងធ្លាក់ចេញពីតំបន់ Top6 បាន ដ្បិតអីអង្គរថាយហ្គឺរ បឹងកេត ណាហ្គាវើល និងក្រុមទ័ព សុទ្ធតែមាន ៨ ពិន្ទុស្មើវិសាខា ខណៈការប្រកួតសប្តាហ៍ទី៦ នេះ បឹងកេត និងអង្គរថាយហ្គឺរ សុទ្ធតែមានលទ្ធភាពខ្ពស់ឈ្នះ ៣ ពិន្ទុ។
ដោយឡែកគ្រូក្រុមណាហ្គាវើល លោក មាស ចាន់ណា បាននិងកំពុងលៃលករៀបចំយុទ្ធសាស្រ្ត និងកលល្បិច ដើម្បីប្រជែងយក ៣ ពិន្ទុជាមួយក្រុមទ័ព ដែលកំពុងដាក់គោលដៅខ្ពស់ ខណៈជំនួបនេះខ្សែប្រយុទ្ធជប៉ុន Naruse Yuta មិនអាចជួយណាហ្គាវើលបានទេ ដោយសារមានរបួសជាប់ខ្លួន ហើយកីឡាករខ្មែរ ២ នាក់ទៀត ក៏មានរបួសមិនអាចចូលលេងបានដូចគ្នា។
លោក មាស ចាន់ណា បានប្រាប់ថា៖ «យើងត្រៀមបានល្អដែរ គ្រាន់តែយើងមានកីឡាកររបួស ៣ នាក់ ប៉ុន្តែសម្រាប់ខ្ញុំ ទោះបីអត់កីឡាករ ៣ នាក់នេះ ក៏មិនទាន់អីដែរ ដោយសារយើងមានការប្រែប្រួលរបៀបលេង ហើយជាទូទៅពេលក្រុមខ្លាំងប៉ះគ្នា មិនស្រួលរៀងខ្លួន គឺវាអាស្រ័យទៅលើកលល្បិចផ្ទាល់ខ្លួនពេលប្រកួតជាក់ស្តែង។ អ៊ីចឹងយើងមិនអាចនិយាយមុនថា ជួបក្រុមនេះ ឬក្រុមនោះ ដឹងតែឈ្នះទេ ចំណែកក្រុមទ័ព ក៏មិនអាចនិយាយថា ដឹងតែឈ្នះក្រុមខ្ញុំដូចគ្នា គឺមិនអាចទេ ទោះបីជាក្រុមខ្ញុំបាត់កីឡាករអស់ ៥ នាក់ក៏ដោយ ព្រោះក្រុម ១ ដែលស្ថិតនៅ Top4 ឬ Top5 សុទ្ធតែមានកីឡាករបម្រុងល្អៗ ដើម្បីត្រៀមដាក់ជំនួស»។
ចំណែកលោក តែម ម៉ឺន អនុប្រធានសមាគមកីឡាបាល់ទាត់កងយោធពលខេមរភូមិន្ទ បានប្រាប់ថា៖ «យើងបានហ្វឹកហាត់រហូត និងប្រកួតសម ដើម្បីពង្រឹងសមត្ថភាព ត្រៀមការប្រកួតនេះ ហើយគោលដៅរបស់យើង គឺត្រូវតែប្រឹងប្រែង ធ្វើម៉េចជួយក្រុមឲ្យឡើងទៅដល់កម្រិតខ្ពស់ គឺបើទទួលបានលេខ ១ កាន់តែទទួលបានជោគជ័យថែមទៀត»៕
កម្មវិធីប្រកួតនៅថ្ងៃសៅរ៍
-បឹងកេត v សូលទីឡូអង្គរ កីឡដ្ឋានខេមបូឌាអ៊ែរវ៉េ ៣:៣០
-យុវជនបាទី v ស្វាយរៀង កីឡដ្ឋានមជ្ឈ.បាល់ទាត់ជាតិបាទី ៣:៣០
-នគរបាលជាតិ v គិរីវង់ កីឡដ្ឋានគិរីវង់សុខសែនជ័យ ៣:៣០
៣ ប្រកួតនៅថ្ងៃអាទិត្យ
-អគ្គិសនីកម្ពុជា v អង្គរថាយហ្គឺរ កីឡដ្ឋានអគ្គិសនីកម្ពុជា ៣:៣០
-ណាហ្គាវើល v ទ័ព កីឡដ្ឋាន ស្តាតចាស់ ៦:០០
-ភ្នំពេញក្រោន v វិសាខា កីឡដ្ឋាន RSN ៦:០០