ភ្នំពេញ: ក្រុមម្ចាស់ជើងឯកលីកកំពូលកម្ពុជា ណាហ្គាវើល នឹងត្រូវបើកទ្វារពហុកីឡដ្ឋានជាតិស្វាគមន៍ក្រុម Tampines Rovers របស់សិង្ហបុរីដើម្បីធ្វើការប្រកួតជាលើកទី ៣ នៃពានរង្វាន់ AFC Cup 2019 នាល្ងាចម៉ោង ៥:០០ នៅថ្ងៃអង្គារនេះ ចំណែកក្រុមខ្លាំង Hanoi FC របស់វៀតណាមក៏ត្រូវទទួលភ្ញៀវ Yangon United របស់មីយ៉ាន់ម៉ានៅយប់ថ្ងៃនេះនៅលើទឹកដីរបស់ខ្លួនផងដែរ។
នៅក្នុងការប្រកួតដ៏សំខាន់នេះលោក មាស ចាន់ណា គ្រូបង្វឹកក្រុមណាហ្គាវើល ហាក់មានការបារម្ភទៅលើចង្វាក់លេងបែបលឿនៗរបស់ក្រុម Tampines Rovers ពិសេសភាពមុតស្រួចរបស់ខ្សែបម្រើជាប្រធានក្រុមពាក់លេខ៨ Shahdan Sulaiman ខ្សែប្រយុទ្ធជនជាតិជប៉ុនពាក់លេខ ៩ Ryutaro Megumi និងខ្សែប្រយុទ្ធជនជាតិកាណាដាពាក់លេខ ១០ Jordan Webb ដែលលោកត្រូវតែធ្វើការកាត់ផ្តាច់ចង្វាក់លេងរបស់អ្នកទាំង ៣ នេះឲ្យបាន។
លោក មាស ចាន់ណា បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «Tampines Rovers គឺជាក្រុមល្អដែលមានភាពជោកជាំជាងយើងនៅក្នុងការប្រកួតពាន AFC Cup នេះ ប៉ុន្តែយើងនៅតែមានលទ្ធភាពប្រជែង ព្រោះការប្រកួតនេះធ្វើនៅលើទឹកដីរបស់យើង ហើយអ្វីដែលសំខាន់ យើងត្រូវកាត់ផ្តាច់ចង្វាក់លេងកីឡាករសំខាន់ៗរបស់គេនៅតំបន់បម្រើប្រយុទ្ធ និងតំបន់ប្រយុទ្ធ ព្រោះខ្សែបម្រើ និងប្រយុទ្ធរបស់ក្រុម Tampines Rovers ទាំង ៣ នេះមានភាពរហ័ស និងមានភាពវៃឆ្លាតក្នុងការលេង»។
ក្រុមណាហ្គាវើល ទើបតែចាញ់ក្រុមក្រសួងការពារជាតិ ៤-២ ក្នុងលីកកំពូលកម្ពុជាកាលពីថ្ងៃអាទិត្យថ្មីៗនេះ ប៉ុន្តែលោក មាស ចាន់ណា និយាយថា៖ «ខ្ញុំជឿថា បើសិនជាកីឡាកររបស់យើងប្រមូលអារម្មណ៍បានល្អ និងផ្តោតយកចិត្តទុកដាក់ខ្លាំង ពួកគាត់អាចនឹងកាត់ផ្តាច់ចង្វាក់លេងរបស់ក្រុម Tampines Rovers បាន ហើយយើងមិនមានការប៉ះពាល់ទៅលើកម្លាំងកីឡាករដែលត្រូវប្រើនោះទេ បើទោះបីជាយើងទើបប្រកួតជាមួយក្រសួងការពារជាតិក៏ដោយ ព្រោះការប្រកួតនោះយើងបានដាក់កីឡាករយុវជនឲ្យចូលលេងច្រើនដោយយើងបានត្រៀមកីឡាករសំខាន់ៗសម្រាប់ត្រៀមការប្រកួតលើកនេះ»។
គួរបញ្ជាក់ថាសម្រាប់ការប្រកួត ២ លើកកន្លងមកនេះក្រុមណាហ្គាវើលបានចាញ់ក្រុមម្ចាស់ផ្ទះ Hanoi FC រហូតដល់ ១០-០ ក្នុងការប្រកួតបើកឆាក មុនពេលពួកគេបានយកឈ្នះក្រុម Yangon United ២-១ ចំណែកក្រុម Tampines Rovers បានឈ្នះក្រុម Yangon United ៣-១ និងស្មើ ១-១ នឹងក្រុម Hanoi សម្រាប់ការប្រកួតនៅក្រៅទឹកដីរបស់ពួកគេ។
យ៉ាងណាក៏ដោយលោក Gavin Lee អ្នកចាត់ការក្រុម Tampines Rovers បាននិយាយនៅក្នុងសន្និសីទកាសែតកាលពីម្សិលមិញថា៖ «បើទោះបីជាក្រុមណាហ្គាវើលបានចាញ់ក្រុម Hanoi ដល់ ១០-០ ហើយយើងបានស្មើ Hanoi ប៉ុន្តែនេះជាការប្រកួត ២ ផ្សេងគ្នាហើយវាក៏អាស្រ័យទៅលើតាក់ទិក និងការរៀបចំរបស់គ្រូបង្វឹកផងដែរ។ ម្យ៉ាងទៀត ណាហ្គាវើល អាចនឹងមានការអភិវឌ្ឍអ្វីដែលថ្មី អ៊ីចឹងយើងត្រូវតែត្រៀមលេងឲ្យបាន ១០០ ភាគរយ សម្រាប់ការប្រកួតនេះ»។
ចំណែកលោក មាស ចាន់ណា ក៏មិនទាន់ហ៊ានសន្និដ្ឋានពីលទ្ធផលដូចគ្នា។ លោកបានបង្ហើបថា៖ «យើងមិនទាន់និយាយបានទេគឺការរំពឹង ៥០ ទល់នឹង ៥០ ភាគរយព្រោះគេក៏ល្អ ហើយយើងក៏មិនថាយើងជាក្រុមអន់នោះដែរ។ ចំណែកទម្រង់លេងរបស់ខ្ញុំ អត់លេងការពារនោះទេ គឺខ្ញុំប្រើទម្រង់លេងទាំងការពារ និងប្រយុទ្ធគឺប្រើទៅតាមស្ថានភាពប្រកួតជាក់ស្តែង»៕