ភ្នំពេញ: ការប្រកួតប្រដាល់គុនខ្មែរបច្ចុប្បន្ន ដែលកំពុងតែមានសកម្មភាពរីកចម្រើនទាំងគុណភាព និងបរិមាណនោះ ធ្វើឲ្យទីផ្សារប្រកួតរបស់កីឡាករល្បីៗ និងឆ្នើមៗរបស់កម្ពុជា កំពុងតែមានតម្លៃកើនខ្ពស់ទៅៗ ជាពិសេសសម្រាប់ការប្រកួតលក្ខណៈមិត្តភាពអន្តរជាតិ។
កីឡាករកម្ពុជាទទួលបានតម្លៃខ្លួនប្រកួតជិត ១០០០ ដុល្លារ ខណៈដែលតម្រូវការប្រកួតតាមសង្វៀនទូរទស្សន៍ឯកជនមិនតិចជាង ៥ ស្ថានីយ នោះឡើយ ហើយមានគូប្រកួតលក្ខណៈអន្តរជាតិក៏មិនតិចជាង ២០ គូ ក្នុង ១ សប្តាហ៍ផងដែរ។
តម្រូវការបែបនេះនាំឲ្យការផ្គូផ្គងអ្នកប្រដាល់ឲ្យប្រកួតរវាងស្ថានីយមួយទៅស្ថានីយមួយមានភាពប្រកួតប្រជែងហាក់បីដូចដណ្តើមកីឡាករល្បីរៀងៗខ្លួនដោយគ្មានតម្លាភាព មិនស្មើភាពគ្នា ក្នុងនោះធ្វើឲ្យតម្លៃខ្លួនកីឡាករកាន់តែឡើងខ្ពស់ និងបន្ថែមឲ្យលុយក្រៅក្រោមតុចាយទៀតផង ឬគេហៅថា មានប្រាក់ប្រចាំខែដើម្បីចងជើងកីឡាករមិនឲ្យចេញទៅសង្វៀនដទៃ។ កីឡករលំដាប់ខ្លាំងៗ និងល្បីៗមួយចំនួនសឹងតែរកពេលសម្រាកមិនបានផង ស្របពេលដែលទីផ្សារប្រកួតទាំងនៅក្នុងរាជធានីភ្នំពេញ និងតាមខេត្តមួយចំនួនដែលគាំទ្រថវិកាដោយវិស័យឯកជន មានសកម្មភាពផុលផុសរីកចម្រើនគួរឲ្យកត់សម្គាល់។ ប៉ុន្តែសង្វៀនប្រដាល់មួយចំនួននៅតែរើសអើងចំពោះវត្តមានកីឡាករប្រដាល់មានកម្រិតថ្នាក់មធ្យម ឬមិនទាន់ល្បីដោយមិនផ្តល់ឱកាស ឬមានគំនិតលើកស្ទួយសម្រាប់កីឡាករប្រដាល់វ័យក្មេង និងថ្មីៗនោះឡើយ។
ប្រភពច្បាស់ការពីមន្ត្រីរៀបចំប្រកួតរបស់សហព័ន្ធប្រដាល់គុនខ្មែរ សុំមិនបញ្ចេញឈ្មោះ បានឲ្យដឹងថា៖ «គិតត្រឹមខែមេសា ឆ្នាំ ២០១៨ កីឡាករលំដាប់ឆ្នើមជួរមុខដែលមានសមត្ថភាពប្រកួតលក្ខណៈមិត្តភាពអន្តរជាតិនោះ មានតម្លៃខ្លួនចាប់ពី ២៥០ ដុល្លារឡើងដល់ ៥០០ ដុល្លារ ក្នុងការប្រកួតមួយលើកៗ ប៉ុន្តែមានកីឡាករខ្លះដែលគេចងជើងជាប់មិនឲ្យប្រកួតដូចជាកែវ រំចង់ សម្រាប់តែសង្វៀនបាយ័នតែមួយគឺឡើងដល់ ៨០០ ដុល្លារក្នុងមួយលើក»។
ប្រភពដដែលបន្តថា៖«ភាគីខាងម្ចាស់សង្វៀននិងម្ចាស់ឧបត្ថម្ភកម្មវិធីជាអ្នកស្នើយកឈ្មោះកីឡាករដោយខ្លួនឯង ចំណែកខាងសហព័ន្ធប្រដាល់គុនខ្មែរចាំតែសម្របសម្រួល និងគ្រប់គ្រងផ្នែកបច្ចេកទេស មានថ្លឹងទម្ងន់ ពិនិត្យសុខភាព និងផ្តល់មន្ត្រីបច្ចេកទេស»។
ប្រភពនេះបានបញ្ជាក់ថា៖ «ទន្ទឹមគ្នានេះ ការទិញទឹកចិត្ត ឬផ្តល់ប្រាក់ប្រចាំខែឲ្យកីឡាករណាមួយដើម្បីរារាំងមិនឲ្យចេញទៅប្រកួតសង្វៀនដទៃ ឬជាប់កុងត្រាណាមួយនោះជារឿង ឯកជនរវាងកីឡាករ និងម្ចាស់សង្វៀនផ្ទាល់តែម្តងដែលយើងគ្មានសិទ្ធិអំណាចអ្វីទៅហាមឃាត់គេបានឡើយ»។
លោកអ៊ុំ សាន ជាអ្នករៀបចំការប្រកួតប្រដាល់គុនខ្មែរនៅតាមបណ្តាខេត្ត បានប្រាប់ភ្នំពេញប៉ុស្តិ៍ កាលពីម្សិលមិញថា កម្មវិធីប្រកួតរបស់លោកដែលកំពុងមានសកម្មភាពប្រចាំខែ ផ្តល់តម្លៃខ្លួនឲ្យកីឡាករខ្មែរដែលមានសមត្ថភាពល្អ និងឆ្នើមៗប្រចាំកម្ពុជាប្រកួតជាមួយកីឡាករថៃគឺមួយលើកៗពី ៨០០ ទៅ ១០០០ ដុល្លារទៅតាមខេត្តជិត ឬឆ្ងាយ។
តម្លៃខ្លួនប្រកួតរបស់កីឡាករកម្ពុជានេះ បានអនុវត្តចាប់តាំងពីថ្ងៃទី ៥ ខែឧសភា ឆ្នាំ ២០១៨ មកម្ល៉េះ ហើយនឹងបន្តបន្ទាប់ទៅខេត្តផ្សេងៗទៀត។ លោកបានបន្ថែមថា៖ «កម្មវិធីប្រកួតរបស់ខ្ញុំដែលមានផ្សាយផ្ទាល់ពីទូរទស្សន៍ PNN មិនប្រកាន់បក្ខពួក ឬក្លិបសមាគមណានោះទេ ឲ្យតែកីឡាករមានសមត្ថភាព មានប្រិយភាពល្អ និងមានឯកភាពពីម្ចាស់ឧបត្ថម្ភកម្មវិធីនោះ នឹងផ្តល់ឱកាសឲ្យជានិច្ច»។
ជាមួយគ្នានេះដែរលោកបានចាត់ទុកអ្នកគ្រប់គ្រងការប្រកួតសង្វៀនខ្លះដែលនិយមចូលចិត្តចងជើងកីឡាករមិនឲ្យមានសិទ្ធិចេញទៅប្រកួតសង្វៀនដទៃបាននោះ ជាការរៀបចំប្រកួតមិនស្មើភាព មិនបម្រើផលប្រយោជន៍កីឡាករ ប៉ុន្តែ វាគ្រាន់តែជាគំនិតចង្អៀតចង្អល់ មិនបម្រើកីឡាសង្គម ដោយផ្តោតទៅលើអាត្មានិយមជាធំ៕