ភ្នំពេញ៖ អ្នកប្រដាល់ តាញ់ មករា ដែលធ្លាប់ចាញ់ក្រោមស្នៀតជង្គង់ កែង និងកណ្តាប់ដៃរបស់ ឡុង ជិន កន្លងមកនោះ គឺបែរជាអាចបង្កើតនូវរឿងដែលខ្លួនគេនឹកស្មានមិនដល់ គឺការផ្តួល ឡុង ជិន ឱ្យសន្លប់វិញ នៅក្នុងការប្រកួតដណ្តើមប្រាក់លានវគ្គផ្តាច់ព្រ័ត្រ ដើម្បីឈ្នះបានប្រាក់រង្វាន់ធំ ចំនួន ៣,៤ លានរៀល នៅសង្វៀនថោន ជាលើកទី១ សម្រាប់ការចូលរួមជាលើកដំបូងរបស់ តាញ់ មករា។
សម្រាប់ការប្រកួតកាលពីថ្ងៃអាទិត្យកន្លងមកនេះ ឡុង ជិន ដែលបានឈ្នះ ធី វ៉ារិទ្ធ ដោយពិន្ទុ នៅក្នុងវគ្គជម្រុះ ៣ ទឹកនោះ ត្រូវបាន តាញ់ មករា បុកជង្គង់ស្តាំចូលឆ្អឹងជំនីរ បណ្តាលឱ្យចុករមួល និងដួលដេក ប្រកួតលែងកើតនៅចុងទឹកទី២ ខណៈការចាញ់នេះ ត្រូវបាន ឡុង ជិន ប្រាប់ថា ជាការភ្លាត់ស្នៀត។ រីឯ អេលីត សាន់ ដែលបានបង្ហាញទំនុកចិត្តខ្ពស់ក្នុងការឈ្នះបានប្រាក់លាននៅសប្តាហ៍នេះ បានជួបការខកចិត្តដូចគ្នា ព្រោះរូបគេបានចាញ់ តាញ់ មករា នៅវគ្គជម្រុះ ដោយពិន្ទុដាច់ ៥ ទល់ ០។
ចំពោះការឈ្នះប្រាក់រង្វាន់ធំនេះ តាញ់ មករា បានប្រាប់ក្រោយប្រកួតថា៖ «ទោះបីជាសង្វៀនថោននេះ រៀបចំការប្រកួតម៉ារ៉ាតុងបាន ៦២ សប្តាហ៍មកហើយក្តី ប៉ុន្តែខ្ញុំទើបតែបានប្រកួតក្នុងកម្មវិធីនេះ ជាលើកដំបូង ហើយខ្ញុំពិតជាសប្បាយមែនទែន ចំពោះជ័យជម្នះនេះ ព្រោះការប្រកួតនេះ ខ្ញុំគិតថា លំបាកតឹងតែងបំផុត តែខ្ញុំបែរជាអាចផ្តួលជើងខ្លាំង ឡុង ជិន ឱ្យសន្លប់បាន»។
តាញ់ មករា បន្ថែមថា៖ «មុនពេលប្រកួត ខ្ញុំហាក់ខ្លាចចាញ់ដែរ ហើយពេលប្រកួតក៏ខ្ញុំមិនរំពឹងឈ្នះ ដោយផ្តួលឱ្យ ឡុង ជិន សន្លប់នោះដែរ ព្រោះគាត់ល្អឱបឡើងជង្គង់ និងមានកម្លាំងរឹងមាំ មិនងាយនរណាផ្តួលគាត់ឱ្យសន្លប់នោះទេ។ ចំណុច និងក្បាច់ ដែលធ្វើឱ្យ ឡុង ជិន សន្លប់បាននោះ គឺខ្ញុំបោះជង្គង់ស្តាំស្របគ្នា តែខ្ញុំបោះចូលគោលដៅបានមុន និងធ្ងន់ គឺសិចតែម្តង ធ្វើឱ្យគាត់ដួលលើរេញ បន្ទាប់មកគាត់ប្រឹងប្រែងងើបមិនរួចក្នុងទឹកទី២ តែបើសិនវ៉ៃគ្នារហូតដល់ចប់ទឹក ខ្ញុំក៏មិនប្រាកដថា បានលទ្ធផលឈ្នះ ឬចាញ់គាត់នោះដែរ»។
ចំណែក លោក ធន់ សុភា គ្រូបង្វឹក តាញ់ មករា បាននិយាយថា៖ «ខ្ញុំសូមកោតសរសើរ ព្រោះ មករា ធ្វើបានល្អហួសពីក្តីរំពឹង ហើយឥឡូវខ្ញុំបានឱ្យ មករា មកហាត់ជាប់លាប់ជាមួយខ្ញុំ ដើម្បីស្តារកម្លាំង និងបច្ចេកទេសឡើងវិញ ព្រោះមួយរយៈកន្លងមកនេះ វាមានទម្ងន់ឡើងលើស ៦០ គ.ក្រប្រកួតមិនសូវបានផលល្អ»។
គ្រូបង្វឹករូបនេះ បានប្រាប់បន្ថែមថា៖ «បន្ទាប់ពីឈ្នះបានប្រាក់រង្វាន់ធំនេះ ខ្ញុំកំពុងបំប៉នកម្លាំងបន្ថែមដល់ តាញ់ មករា ព្រោះ មករា ជាប់កិច្ចសន្យាប្រកួតឱ្យកម្មវិធីខារាប៉ាវ នៅសង្វៀនបាយ័ន នាចុងខែកុម្ភនេះ ដោយត្រូវប៉ះជាមួយ អេលីត សាន់ ម្តងទៀត ហើយ អេលីត សាន់ នេះមិនមែនស្រួលឈ្នះនោះទេ»។
ចំណែក ឡុង ជិន បាននិយាយថា៖ «ពីដំបូង ខ្ញុំរំពឹងឈ្នះត្រឹមពិន្ទុ ប៉ុន្តែមិននឹកស្មានដល់ថា ខ្ញុំបានភ្លាត់ ចូលជង្គង់ស្តាំរបស់គេចំឆ្អឹងជំនីរខ្ចី ដែលជារបួសចាស់របស់ខ្ញុំ នាំឱ្យចុក។ ខ្ញុំប្រឹងងើបឈរបានហើយ តែពេលខ្ញុំខំបត់ខ្លួន សម្រួលចលនា បែរជាជាប់ និងឈឺឡើងវិញ មិនអាចឱ្យខ្ញុំប្រកួតទៀតបាន។ ទោះយ៉ាងណា ខ្ញុំចង់សុំទៅគណៈកម្មការផ្គូផ្គង ដើម្បីបានប្រកួតសងសឹកម្តងទៀតព្រោះការចាញ់លើកនេះ ខ្ញុំពិតជាមិនអស់ចិត្តសោះ»៕