.jpg)
កីឡាការិនី Polly Swann ពេលហ្វឹកហាត់ទូករ៉ូអីុង នាពេលថ្មីៗនេះ។ រូបថត AFP
ក្រុងឡុងដ៍: កីឡាការិនីប្រណាំងទូករ៉ូអុីង (rowing) Polly Swann បានធ្វើការរាប់ថយក្រោយសម្រាប់ព្រឹត្តិការណ៍អូឡាំពិកក្រុងតូក្យូ ឆ្នាំ ២០២០ រយៈពេលប៉ុន្មានថ្ងៃកន្លងទៅនេះ តែពេលនេះនាងចាប់ផ្ដើមគិតគូរពីអាជីពជាគ្រូពេទ្យ ដើម្បីចូលរួមជួយប្រយុទ្ធប្រឆាំង និងទប់ស្កាត់ការរាតត្បាតពីវីរុសកូរ៉ូណា ក្រោយមានការប្រកាសផ្លូវការពន្យារ ព្រឹត្តិ្កការណ៍នេះរហូតដល់ឆ្នាំ ២០២១។
កីឡាការិនីសញ្ជាតិអង់គ្លេស វ័យ ៣១ ឆ្នាំ ដែលបានឈ្នះមេដាយប្រាក់ ក្នុងព្រឹត្តិការណ៍អូឡាំពិក ឆ្នាំ ២០១៦ នាក្រុងរីយ៉ូ ប្រទេសប្រេស៊ីល Polly Swann កំពុងត្រូវបានគេចាត់ថាជាអត្តពលិកប្រសើរ១រូប សម្រាប់ជ្រើសរើសទៅប្រកួតអូឡាំពិក នៅជប៉ុន មុននាងចាប់ផ្ដើមជីវិតថ្មី ជាផ្នែកមួយនៃមន្ទីរពេទ្យ។
កីឡាការិនី Swann បាននិយាយថា ការសម្រេចក្នុងសប្ដាហ៍នេះ ក្នុងការផ្អាកការប្រកួតកីឡាអូឡាំពិក យ៉ាងហោច-ណាស់ ក៏បានធ្វើឲ្យអត្តពលិកទាំងអស់ប្រាកដក្នុងចិត្ត ក្រោយមានភាពមិនច្បាស់លាស់ អស់ជាច្រើនសប្ដាហ៍មកនេះ។
អតីតនិស្សិតនៃសាកលវិទ្យាល័យ Edinburgh University បានកំពុងត្រៀមចាប់ផ្ដើមកម្មវិធីមូលនិធិរបស់ខ្លួន ក្នុងនាមជាពេទ្យម្នាក់ ក្រោយបញ្ចប់ការប្រកួតប្រជែងនៅជប៉ុន តែនាងបាននិយាយថា មានពាក្យលេចឮថា ប្រធានពេទ្យ នៅប្រទេសស្កុតឡេន អាចនឹងកំពុងស្វែងរកអ្នកជួយ ក្នុងប៉ុន្មានសប្ដាហ៍ខាងមុខ ពេលជំងឺកូវីដ ១៩ រាតត្បាត។
កីឡាការិនីវ័យ៣១ឆ្នាំ រូបនេះបាននិយាយឲ្យដឹងថា៖ «ខ្ញុំគិតថា ខ្ញុំត្រូវធ្វើការជ្រើសរើសដ៏ពិបាក។ អូឡាំពិកជាក្ដីស្រមៃរបស់ខ្ញុំ ហើយវាជាអ្វីគ្រប់យ៉ាងសម្រាប់ខ្ញុំ។ ខ្ញុំចង់ទៅធ្វើការប្រកួតប្រជែង ដើម្បីឈ្នះមេដាយមាស តែសម្ពាធជាសកលពេលនេះ គឺសំខាន់ជាងកីឡាទៅទៀត»។
Swann បាននិយាយបន្តថា៖«ដោយជាក់ស្ដែង វិជ្ជាពេទ្យជាបំណងប្រាថ្នាដ៏ធំសម្រាប់ខ្ញុំ ដូច្នេះ ខ្ញុំមានអារម្មណ៍ថា ចង់បានការងារខ្លាំងណាស់ដើម្បីបានក្លាយ-ជាចំណែករួមតូចមួយនៃសេវាសុខភាពជាតិរបស់ប្រទេសស្កុតឡែន»។
ជាមួយគ្នានេះដែរ អតីតកីឡារិនីជើងឯកប្រចាំទ្វីបអឺរ៉ុប និងពិភពលោករូបនេះ ក៏បានធ្វើការអធិប្បាយដែរពីការផ្អាកព្រឹត្តិការណ៍កីឡាដ៏ធំរបស់ពិភពលោក ដែលតែងប្រារព្វធ្វើ ៤ ឆ្នាំម្ដងនេះថា ជាការរារាំងក្ដីស្រមៃរបស់នាង ប៉ុន្តែនាងក៏ទទួលស្គាល់ថា វាចំណេញសម្រាប់អត្តពលិកគ្រប់រូប ដែលពេលនេះ មានពេលវេលាបន្ថែម ក្នុងការត្រៀមខ្លួនឲ្យដល់កម្រិតកំពូល។
តែកីឡាការិនីប្រណាំងទូករ៉ូអុីង Polly Swann ក៏បាននិយាយបន្ថែមដែរថា៖«ខ្ញុំមិនបោះបង់ក្ដីស្រមៃរបស់ខ្ញុំឡើយ។ ខ្ញុំដឹងថា វាពិបាក តែខ្ញុំមានដំណោះស្រាយល្អបំផុតហើយ»។
ចំណែកឯ និស្សិតពេទ្យមា្នក់ទៀត Imogen Grant ដែលជាកីឡាការិនីប្រណាំងទូកកានូ ក៏ចាប់ផ្ដើមផែនការថ្មីឡើងវិញដែរ តែការបានទៅអូឡាំពិកនាក្រុងតូក្យូ ឆ្នាំក្រោយ នៅតែជារឿងចម្បងរបស់ខ្លួនដដែល។
កីឡាការិនី Grant វ័យ ២៤ឆ្នាំ ដែលជាអត្តពលិករបស់ចក្រភពអង់គ្លេស ១រូបដែរ បាននិយាយថា៖ «ខ្ញុំមានពេលជាច្រើនម៉ោង ដែលខ្ញុំបានបោះចោលឧបករណ៍ពីរទេះរុញ តែហេតុផលចុង-ក្រោយដែលខ្ញុំចង់មានឈ្មោះក្នុងក្រុមរបស់ចក្រភពអង់គ្លេស គឺខ្ញុំចង់ទៅអូឡាំពិក ហើយឈ្នះមេដាយ។ ខ្ញុំមិនផ្លាស់ប្ដូរក្តីស្រមៃរបស់ខ្ញុំឡើយ»។
តែទោះបីជាយ៉ាងណា កីឡាការិនី Swann និង Grant កំពុងតែធ្វើការហ្វឹក-ហាត់នៅផ្ទះដូចគ្នា ក្រោយពីមានការបិទ Caversham កន្លែងហាត់សម សម្រាប់ក្រុមអត្តពលិកផ្នែកវិញ្ញាសាប្រណាំងទូករបស់ចក្រភពអង់គ្លេស ដែលមានទីតាំងក្បែរក្រុងឡុងដ៍ ហើយការបិទនេះ គ្មានហេតុផលអ្វីក្រៅពីការរាតត្បាតនៃវីរុសកូរ៉ូណា ដែលកំពុងធ្វើទុក្ខបុកម្នេញពិភពលោកនោះឡើយ ជាពិសេសកំពុងប៉ះពាល់វិស័យកីឡានានា រហូតធ្វើឲ្យព្រឹត្តិការណ៍អូឡាំពិក ក្នុងឆ្នាំនេះ ត្រូវបានប្រកាសលើកទៅឆ្នាំ ២០២១៕
