ភ្នំពេញ៖ ព្រះរាជាណាចក្រកម្ពុជានឹងធ្វើជាម្ចាស់ផ្ទះរៀបចំការប្រកួតកីឡាអាស៊ីអាគ្នេយ៍ ឬស៊ីហ្គេមលើកទី ៣២ នៅឆ្នាំ ២០២៣ ជាប្រវត្តិសាស្ត្រលើកដំបូង ដោយមានប្រទេសចំនួន ១១ ចូលរួម។ ជាមួយព្រឹត្តិការណ៍ដ៏ធំនេះ មជ្ឈដ្ឋាននានាមួយចំនួនចង់ដឹងពីការចំណាយ ថាតើកញ្ចប់ថវិការៀបចំការប្រកួតកីឡាស៊ីហ្គេម លើកទី ៣២ នោះត្រូវចំណាយប៉ុន្មាន និងមានកីឡាអ្វីខ្លះ?
គិតមកដល់ពេលនេះ រាជរដ្ឋាភិបាលនៅមិនទាន់អនុម័តជាផ្លូវការទេ ចំណែកអគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី ៣២ ឆ្នាំ ២០២៣ (CAMSOC) លោក វ៉ាត់ ចំរើន ក៏មិនហ៊ានអះអាង ដោយលោកថ្លែងថា វាអាស្រ័យទៅលើចំនួនប្រភេទកីឡា ដែលសម្រេចដាក់ឱ្យប្រកួតប្រជែងពោលគឺមានន័យថា បើប្រភេទកីឡាច្រើនចំណាយច្រើន។ យ៉ាងណាក៏ដោយ គិតជាមធ្យមនៅក្នុងព្រឹត្តិការណ៍ស៊ីហ្គេមមានប្រភេទកីឡាចន្លោះពី ២២ ទៅជាង ៤០ ប្រភេទ ហើយម្ចាស់ផ្ទះមានអាទិភាពក្នុងការជ្រើសរើសប្រភេទកីឡា និងកំណត់ចំនួន។
នៅក្នុងជំហានដំបូងៗដូចជាមហាសន្និបាត ឬកិច្ចប្រជុំ CAMSOC កន្លងមក កម្ពុជាបានលើកគម្រោង ដោយប៉ាន់ប្រមាណថា អាចនឹងចំណាយថវិកាប្រមាណ ៣០ លានដុល្លារសហរដ្ឋអាមេរិកក្នុងការប្រកួតកីឡាចំនួន ៣០ ប្រភេទ ដោយចំនួននេះនៅមិនទាន់គិតពីពិធីបើក ពិធីបិទ និងចំណាយផ្សេងៗផង ហើយគម្រោងនេះគឺអនុលោមតាមអ្នកជំនាញការស៊ីហ្គេមដែល CAMSOC អញ្ជើញមកធ្វើជាវាគ្មិនកន្លងមក។
លោក វ៉ាត់ ចំរើន បានប្រាប់ថា៖ «គម្រោងចំណាយលើការរៀបចំការប្រកួតកីឡាស៊ីហ្គេមលើកទី ៣២ នៅមិនទាន់អនុម័តជាផ្លូវការនៅឡើយទេ ព្រោះជាសមត្ថកិច្ចរបស់រាជរដ្ឋាភិបាល ដោយអនុលោមតាមបច្ចេកទេស ឬការប្រែប្រួលនៃចំនួនប្រភេទកីឡាជាក់ស្តែង ប៉ុន្តែតាមការប៉ាន់ប្រមាណរបស់អ្នកជំនាញស៊ីហ្គេមនៅក្នុងកិច្ចប្រជុំកន្លងមក បានឱ្យដឹងថា កម្ពុជាអាចនឹងចំណាយថវិកាប្រមាណ ១ លានដុល្លារក្នុង ១ ប្រភេទកីឡា ដូច្នេះ កម្ពុជា នឹងចំណាយថវិកាជាង ៣០ លានដុល្លារអាមេរិក ដ្បិតអី កម្ពុជា នឹងដាក់ពី ៣០ ទៅ ៣៥ ប្រភេទកីឡា ដើម្បីប្រកួតប្រជែង ប៉ុន្តែការចំណាយនេះ នៅមិនទាន់រាប់បញ្ចូលលើការចំណាយមុន និងក្រោយការប្រកួតនោះទេ ពោលគឺ គិតតែក្នុងអំឡុងពេលនៃការរៀបចំការប្រកួតប៉ុណ្ណោះ»។
ជាមួយគ្នានេះ អ្នកជំនាញការស៊ីហ្គេមមកពីប្រទេសម៉ាឡេស៊ី លោក ស៊ែ កុកជី បានធ្វើបទបង្ហាញក្នុងមហាសន្និបាត នៅអូឡាំពិកកន្លងមកថា ការប៉ាន់ស្មានក្នុង ១ ប្រភេទកីឡា គិតជាមធ្យមត្រូវចំណាយប្រហែល ១ លានដុល្លារអាមេរិក ដោយមិនទាន់គិតពីការចំណាយផ្សេងៗនៅឡើយ។
លោក ស៊ែ កុកជី បាននិយាយថា៖ «តាមស្តង់ដារបស់ប្រទេស ដែលធ្លាប់រៀបចំព្រឹត្តិការណ៍ស៊ីហ្គេមនេះ គេត្រូវចំណាយយ៉ាងតិច ១ លានដុល្លារលើ ១ ប្រភេទកីឡា ដូច្នេះបើកម្ពុជាដាក់ ៣០ ប្រភេទកីឡា ឱ្យប្រកួតប្រជែងគ្នា នោះកម្ពុជាត្រូវចំណាយថវិកាប្រមាណជា ៣០ លាន ទៅ ៣៥ លានដុល្លារអាមេរិក។ តែយ៉ាងណាក៏ដោយ CAMSOC នៅមិនទាន់កំណត់ពីគម្រោងចំណាយសរុបនៅឡើយទេ គឺក្នុងការព្រាងចំនួនច្រើនបំផុត ៣៥ ប្រភេទប៉ុណ្ណោះ»។
កន្លងមកលោកឧបនាយករដ្ឋមន្ត្រី ទៀ បាញ់ ជាប្រធាន CAMSOC បានជំរុញមន្ត្រីក្រោមឱវាទប្រើប្រាស់ថវិកាឱ្យបានត្រឹមត្រូវមានភាពជាក់លាក់ និងស្របតាមផែនការហិរញ្ញវត្ថុ ដែលបានកំណត់ក្នុងផែនការមេរបស់គណៈកម្មាធិការ CAMSOC ប៉ុន្តែជាមួយគ្នានេះ បញ្ហាកូវីដ១៩ បានវាយលុកខ្លាំងធ្វើឱ្យសកម្មភាពរបស់ CAMSOC ត្រូវបានគេមើលឃើញថា មានសកម្មភាពធ្លាក់ចុះ។
ចំណែកគណៈកម្មការជំនាញចំនួន ១៥ របស់ CAMSOC ហាក់ដូចជាមិនទាន់ឃើញចេញសកម្មភាពខ្លាំងក្លានៅឡើយ។ តែទោះបីជាយ៉ាងណា លោក វ៉ាត់ ចំរើន បានអះអាងថា CAMSOC នៅតែប្រជុំតាមអនឡាញ និងធ្វើសកម្មភាពតាមស្ថានភាពជាក់ស្តែង។
គួររំឭកថា កម្ពុជាធ្លាប់បានធ្វើជាម្ចាស់ផ្ទះម្តងក្នុងការរៀបចំការប្រកួតកីឡាអាស៊ីហ្គាណាហ្វូលើកទី ១ នៅឆ្នាំ ១៩៦៦ ក្នុងសម័យសង្គមរាស្ត្រនិយម ដោយកាលនោះធ្វើឡើងនៅពហុកីឡដ្ឋានជាតិ ប៉ុន្តែវាមិនពេញលេញជាស៊ីហ្គេមនោះទេ។ ហេតុនេះ ការធ្វើជាម្ចាស់ផ្ទះ ស៊ីហ្គេម លើកទី ៣២ ឆ្នាំ ២០២៣ ខាងមុខនេះ វាប្រវត្តិសាស្ត្ររបស់កម្ពុជា ហើយពហុកីឡដ្ឋានជាតិមរតកតេជោ ដែលជាជំនួយរបស់រដ្ឋាភិបាលចិននឹងក្លាយជាទីកន្លែងបើកព្រឹត្តិការណ៍ដ៏ធំជាលើកដំបូងនៅកម្ពុជានេះ៕