.jpg)
លោក តែម ម៉ឺន និងក្រុមម្ចាស់ជយលាភីរបស់ក្រសួងការពារជាតិ។ ពន្លក
ភ្នំពេញ៖ លទ្ធផលនៃការប្រកួតកីឡាប្រដាល់គុនខ្មែរជ្រើសរើសជើងឯកថ្នាក់ជាតិ ២០២០ ដែលបានបញ្ចប់កាលពីថ្ងៃទី ២៩ ខែ មករា ឆ្នាំ ២០២១ គឺនៅក្នុងចំណោមប្រតិភូកីឡាសរុបចំនួន ១៦ ដែលបានចូលរួមការប្រកួតនេះ មានតែ ១៣ ប្រតិភូ កីឡាប៉ុណ្ណោះ បានជាប់ជាចំណាត់ថ្នាក់ ចំណែកខេត្តចំនួន ៣ ទៀត មាន ខេត្តត្បូងឃ្មុំ ខេត្តព្រៃវែង និងកំពង់ឆ្នាំង គ្មានចំណាត់ថ្នាក់ ឬមិនដណ្តើមបានមេដាយនោះទេ។
យោងតាមលទ្ធផលនោះ ក្រុមកីឡាកររបស់ក្រសួងការពារជាតិឈ្នះបានលេខ ១ ដាច់ ដោយទទួលបានមេដាយមាស ៥ និងប្រាក់ ២ តាមពីក្រោយដោយក្រសួងមហាផ្ទៃ ឈ្នះមេដាយមាស ២ ប្រាក់ ១ សំរឹទ្ធ ២ ហើយខេត្តស្វាយរៀង ឈរនៅលេខ ៣ ដោយឈ្នះបានមេដាយមាស ១ ប្រាក់ ២ សំរឹទ្ធ ១ រីឯលេខ ៤ បានទៅខេត្តកោះកុង ដោយឈ្នះមេដាយមាស ១ ប្រាក់ ១ ហើយប្រតិភូ មកពីខេត្តផ្សេងៗទៀត បានត្រឹមមេដាយប្រាក់ និងសំរឹទ្ធទេ។
ចំពោះស្ថានភាពពិតក្នុងការប្រកួតថ្នាក់ជាតិឆ្នាំនេះ គឺកីឡាករឆ្នើមៗមួយចំនួនគ្មានវត្តមានចូលប្រកួតទេ ពិសេសកីឡាករមកពីក្រសួងមហាផ្ទៃ ដែលមានធនធានសំបូរបែបជាជើងចាស់ឆ្នើមៗ និងខ្លាំងៗមួយចំនួន មិនចូលប្រកួត ដែលធ្វើឱ្យក្រសួងការពារជាតិឈ្នះដាច់ទាំងអស់ពីគូប្រជែង។
ទោះយ៉ាងណា ច្រើនឆ្នាំកន្លងមក អ្នកឈ្នះជើងឯកជាតិប្រចាំឆ្នាំមួយចំនួនមិនត្រូវបានជ្រើសរើសយកមកប្រមូលផ្តុំទេ ហើយវត្តមានរបស់កីឡាករដែលជាប់ប្រមូលផ្តុំជម្រើសជាតិមួយចំនួន គឺល្បីល្បាញមកពីក្រៅក្របខ័ណ្ឌ គឺសង្វៀនឯកជនតែប៉ុណ្ណោះ ហើយជុំវិញបញ្ហានេះ ទើបធ្វើឱ្យមជ្ឈដ្ឋានអ្នកស្នេហាប្រដាល់បានចោទជាសំណួរថា តើសមាសភាពអ្នកឈ្នះជើងឯកជាតិឆ្នាំនេះ គួរត្រូវជ្រើសរើសឱ្យជាប់ជាជម្រើសជាតិគុនខ្មែរ របស់ក្រសួងអប់រំ ដើម្បីមានប្រាក់ខែទាំងអស់ ឬយ៉ាងណា?
ទាក់ទងនឹងរឿងនេះ លោកឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានថ្លែងថា៖ «កីឡាករ ដែលឈ្នះជយលាភីក្នុងការប្រកួតជើងឯកថ្នាក់ជាតិ ឆ្នាំ ២០២០ នេះ សុទ្ធតែជាបេក្ខភាព ដែលត្រូវជ្រើសរើសប្រមូលផ្តុំ ជាកីឡាករជម្រើសជាតិ ដើម្បីហ្វឹកហាត់ ត្រៀមចូលរួមប្រកួត ក្នុងព្រឹត្តិការណ៍កីឡាស៊ីហ្គេម លើកទី៣១ នៅប្រទេសវៀតណាម នាឆ្នាំ ២០២១ និងលើកទី៣២ នៅឆ្នាំ ២០២៣ ដែលកម្ពុជាធ្វើជាម្ចាស់ផ្ទះ»។
លោកបន្ថែមថា៖ «ជាគោលការណ៍ យើងនឹងអនុវត្តតាមច្បាប់ឱ្យបានល្អ គឺទី១ អ្នកឈ្នះជើងឯកជាតិ ត្រូវតែទទួលយក ទី២ បេក្ខភាពដែលជាជើងឯក ពីការប្រកួតសង្វៀនផ្សេងៗមានសមត្ថភាពល្អ ក៏ត្រូវយកទី៣ ការប្រកួតលក្ខណៈអន្តរជាតិធំៗ យើងក៏ពិនិត្យលើសមត្ថភាពឱ្យល្អដើម្បីឈ្នះមេដាយជូនជាតិ។ សហព័ន្ធនឹងមិនផ្តល់អាទ្ធិភាពណាមួយដល់កីឡាករល្អ និងឆ្នើមៗណា ដែលមិនបានបំពេញកាត្វកិច្ច គឺមិនមកចូលរួមការប្រកួតរបស់ជាតិនោះទេ មានន័យថា បើសិនសមត្ថភាពប៉ុនគ្នា គឺអ្នកធ្លាប់ចូលរួមប្រកួតថ្នាក់ជាតិត្រូវបានផ្តល់ជូនមុនគេ»។
ចំណែកកីឡាករ រិន ដាវីត មកពីក្រសួងមហាផ្ទៃ និងជាជម្រើសជាតិឆ្នាំចាស់បាននិយាយថា៖ «ឆ្នាំនេះ ខ្ញុំមិនបានចូលប្រកួតជើងឯកថ្នាក់ជាតិទេ ដោយសារឈឺខ្លួន និងរងរបួសពេលប្រកួតនៅសង្វៀនផ្សេង អ៊ីចឹងខ្ញុំព្រួយបារម្ភខ្លាចមិនបានជាប់ជាជម្រើសជាតិ នៅឆ្នាំថ្មី ២០២១ នេះដែរ។ ទោះយ៉ាងណា នៅក្នុងទម្ងន់ ៥៤ គីឡូក្រាមនេះ មិត្តរួមសមាគមគឺកីឡាករ កាន់ ម៉េងហុង របស់មហាផ្ទៃដូចគ្នា ជាអ្នកដណ្តើមបានមេដាយមាស»៕
