ប្រភេទកីឡាចំនួន ២ របស់កម្ពុជា គឺអត្តពលកម្ម និងហែលទឹក សុទ្ធតែទទួលបានសិទ្ធិអនុគ្រោះឱ្យទៅចូលរួមការប្រកួតកីឡាអូឡាំពិក ក្រុងតូក្យូ ឆ្នាំ ២០២០ ដែលបានលើកមកធ្វើនៅឆ្នាំ ២០២១ នេះ ដោយស្វ័យប្រវត្តិ ចំណែកក្រុមតេក្វាន់ដូ ត្រូវធ្វើការប្រកួតជម្រុះ ដណ្តើមកៅអីជាមួយបណ្តាប្រទេសផ្សេងទៀត ប៉ុន្តែបេក្ខភាពដែលត្រូវប្រកួតលើកនេះ មិនមែនជាវីរកីឡាការិនីតេក្វាន់ដូ ស៊ន សៀវម៉ី នោះទេ។
អគ្គលេខាធិការគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានប្រាប់ភ្នំពេញប៉ុស្តិ៍ នៅថ្ងៃអង្គារថា៖ «បេក្ខភាព ដែលត្រូវប្រកួតជម្រុះអូឡាំពិក ផ្នែកប្រភេទកីឡាតេក្វាន់ដូ លើកនេះ គឺកីឡាការិនីកូនកាត់ខ្មែរ-អាមេរិក Casandre Nicole និងកីឡាករ វ៉ា មិថុនា ដោយអ្នកទាំង ២ នេះនឹងត្រូវប្រកួតជម្រុះអូឡាំពិកនៅប្រទេសហ្ស៊កដានី»។
តាមការបញ្ជាក់របស់អ្នកជំនាញ លោក វ៉ាត់ ចំរើន បានបង្ហាញច្បាស់ថា វីរកីឡាការិនី ស៊ន សៀវម៉ី ដែលជាអត្តពលិកដំបូងគេរបស់កម្ពុជាធ្លាប់ដណ្តើមបានកៅអីទៅប្រកួតអូឡាំពិក ដោយពេញសិទ្ធិកន្លងមកនោះមិនបានចូលរួមការប្រកួតជម្រុះលើកនេះទេ។ យ៉ាងណាក៏ដោយ កីឡាការិនី Casandre Nicole ក៏ជាអត្តពលិក ដែលមានសមត្ថភាព និងធ្លាប់បានសាងស្នាដៃឱ្យកម្ពុជាផងដែរ ដោយធ្លាប់ឈ្នះបានមេដាយប្រាក់នៅស៊ីហ្គេមកន្លងមក។
ចំណែកប្រភេទកីឡាហែលទឹក និងអត្តពលកម្មត្រូវបានលោក វ៉ាត់ ចំរើន ប្រាប់ថា សុទ្ធតែបានសិទ្ធិអនុគ្រោះទៅចូលការប្រកួតកីឡាអូឡាំពិក ដោយស្វ័យប្រវត្តិ គឺមិនចាំបាច់ប្រកួតជម្រុះនោះទេ ហើយគិតមកដល់ពេលនេះខាងអត្តពលកម្មបានជ្រើសរើសបេក្ខភាពត្រៀមទៅចូលរួមការប្រកួតនេះរួចហើយ។
លោក ហ៊ុន បូរី អគ្គលេខាធិការសហព័ន្ធខ្មែរកីឡាអត្តពលកម្មស្ម័គ្រចិត្តបានប្រាប់ថា៖ «សហព័ន្ធនឹងបញ្ជូនលោកគ្រូបង្វឹក ពុធ បូរាត្រី និងកីឡាករឆ្នើមរបស់យើង ដែលសហព័ន្ធបានសម្រេចជាគោលការណ៍រួចហើយគឺ កីឡាករ ប៉ែន សុគង់ ឱ្យចូលរួមការប្រកួតកីឡាអូឡាំពិកនេះ»។
លោកបានបន្ថែមថា៖ «ចំពោះការជ្រើសរើសគ្រូបង្វឹក និងកីឡាករខាងលើនេះ គឺសមាជិកប្រតិបតិ្តរបស់សហព័ន្ធ ធ្វើការសម្រេចដោយតម្លាភាព និងយកចិត្តទុកដាក់យ៉ាងខ្លាំង ស្របតាមច្បាប់ និងបច្ចេកទេស ហើយសុទ្ធសឹងមានការសម្រេចពីថ្នាក់ដឹកនាំ។ ចំពោះ ប៉ែន សុគង់ នឹងប្រកួតលើវិញ្ញាសារត់ល្បឿន ១០០ ម៉ែត្រ ដោយសារការប្រកួតកីឡាអូឡាំពិក គេអនុញ្ញាតឱ្យប្រកួត តែ ១ វិញ្ញាសាប៉ុណ្ណោះ ក្នុងអត្តពលិក ១ នាក់»។
ប៉ុន្តែខាងហែលទឹកនៅមិនទាន់បានជ្រើសរើសបេក្ខភាព ត្រៀមទៅប្រកួតនៅឡើយទេ។ លោក ហែម គីរី ជាអគ្គលេខាធិការសហព័ន្ធខ្មែរកីឡាហែលទឹកបានប្រាប់ថា សហព័ន្ធខ្មែរហែលទឹកនឹងបញ្ជូនគ្រូបង្វឹក ១ រូប និងកីឡាករ កីឡាការិនី ២ រូបទៅចូលរួម ហើយអត្តពលិកទាំង ២ នាក់នេះ យើងនឹងធ្វើការជ្រើសរើសនាខែឧសភាខាងមុខនេះ»៕