ភ្នំពេញ: សមាគមកីឡាតេក្វាន់ដូនគរបាលជាតិ បានបញ្ជាក់ក្នុងសេចក្តីប្រកាសរបស់ខ្លួនថា ខ្លួនគ្រោងបើកសិក្ខាសាលាបង្ហាញក្បាច់គុនដល់ កងកម្លាំងប្រដាប់អាវុធទាំង ៣ ប្រភេទ មានមន្ត្រីនគរបាលជាតិ មន្ត្រីកងរាជអាវុធហត្ថ និងមន្ត្រីក្នុងកងយោធពលខេមរភូមិន្ទ ដើម្បីពង្រឹងសមត្ថភាពក្បាច់គុន ព្រមទាំងសិក្សាអំពីទ្រឹស្តីកីឡាប្រយុទ្ធ។
សិក្ខាសាលាមួយនេះ មានគ្រូឧទ្ទេសនាមក្បាច់គុនខ្សែក្រវាត់ខ្មៅចំនួន ៨ ដាន់គឺលោក Kim Hanju គ្រូតេក្វាន់ដូ និងជាសិស្សច្បងលោកគ្រូឆយ យ៉ុងសុក ខណៈលោកម៉ក់ សំអុល ទីប្រឹក្សាជាន់ខ្ពស់គណៈកម្មាធិការជាតិអូឡាំពិកកម្ពុជា និងជាប្រធានសមាគមកីឡា តេក្វាន់ដូនគរបាលជាតិក្រសួងមហាផ្ទៃ ក៏ជាគ្រូឧទ្ទេសនាមផ្នែកទ្រឹស្តីកីឡាប្រយុទ្ធផងដែរ។
ក្នុងសន្និសីទសារព័ត៌មានកាលពីព្រឹកម្សិលមិញ នៅទីស្នាក់ការគណៈកម្មាធិការជាតិអូឡាំពិកកម្ពុជា លោកម៉ក់ សំអុល បានថ្លែងថា៖ «សិក្ខាសាលាក្បាច់គុននេះត្រៀមបើកយ៉ាងទូលំទូលាយដល់មន្ត្រីកងកម្លាំងប្រដាប់អាវុធទាំងអស់ ពោលគឺអាចដាក់ពាក្យចូលរួមបានទាំង ២ ភេទ ចាប់ពីអាយុ ១៨ ឆ្នាំ ដល់ ៥៥ ឆ្នាំ ដោយមិនបង់ប្រាក់ឡើយ»។
លោកម៉ក់ សំអុល បានបន្តថា៖ «លក្ខខណ្ឌនៃការចូលរួមជាសិក្ខាកាមបាន គឺត្រូវតែជាកីឡាករ កីឡាការិនី និងគ្រូបង្វឹកកីឡាប្រយុទ្ធ មិនសំដៅតែកីឡាតេក្វាន់ដូនោះទេ ទោះជាកីឡាហាប់គីដូ ឬប្រភេទកីឡាប្រយុទ្ធដទៃក៏អាចចូលរួមបាន ប៉ុន្តែមានកម្រិតថ្នាក់មធ្យមឡើងទៅគឺចាប់ពីខ្សែក្រវាត់ខ្មៅ ១ ដាន់ទៅ»។
លោកម៉ក់ សំអុល បានបន្ថែមថា៖ «ខ្ញុំបានជូនដំណឹងទៅកងកម្លាំងប្រដាប់អាវុធទាំងអស់ មានអគ្គមេបញ្ជាការកងយោធពលខេមរភូមិន្ទ កងរាជអាវុធហត្ថលើផ្ទៃប្រទេស អង្គភាពកីឡានគរបាលជាតិ និងសាលាបណ្ឌិត្យសភានគរបាល មជ្ឈមណ្ឌលកីឡាកងយោធពលខេមរភូមិន្ទ និងអង្គភាពសមត្ថកិច្ចដទៃទៀតដែលមានមន្ត្រីនិយមចូលចិត្តហ្វឹកហាត់កីឡាប្រយុទ្ធ ដែលសុទ្ធតែអាចមក ចុះឈ្មោះជាសិក្ខាកាមបាន»។
លោកម៉ក់ សំអុល បានលម្អិតថា៖ «នៅលើពិភពលោកយើង មានកីឡាខ្សែបណ្តោយជាប៉ូលិស និងកីឡាក្នុងកងទ័ព ដែលប្រទេសនីមួយៗបានចូលជាសមាជិក ប៉ុន្តែសម្រាប់សិក្ខា សាលានេះគឺមិនប្រកាន់ទេ ទាំងប៉ូលិស ទាំងទាហាន និងសមត្ថកិច្ចដទៃ ក៏អាចចូលរួមបានទាំងអស់ដោយមិនបង់លុយឡើយ»។
កម្មវិធីសិក្ខាសាលាក្បាច់គុនកីឡាប្រយុទ្ធនេះនឹងធ្វើឡើងចំនួន៥លើករៀងរាល់ថ្ងៃសុក្រ ចាប់ពីថ្ងៃទី ៩ ខែវិច្ឆិកា ឆ្នាំ ២០១៨ និងបិទសិក្ខាសាលា និងចែកលិខិតបញ្ជាក់ការសិក្សានៅថ្ងៃទី ២ ខែធ្នូ ឆ្នាំ ២០១៨។
លោក Kim Hanju ដែលជាគ្រូតេក្វាន់ដូមានខ្សែក្រវាត់ខ្មៅ ៨ ដាន់ ជាគ្រូស្ម័គ្រចិត្តមកជួយកីឡាតាំងពីឆ្នាំ ១៩៩៣ និងជាគ្រូទី ១ មុនលោកគ្រូឆយ យ៉ុងសុក នោះ បានប្រាប់ភ្នំពេញប៉ុស្តិ៍ ថា៖ «សិក្សាសាលានេះ សិក្ខាកាមអាចមកចុះឈ្មោះនៅរដ្ឋបាលគណៈកម្មាធិការជាតិអូឡាំពិកកម្ពុជាបាន ហើយពេលបើកកម្មវិធីសិក្សា យើងធ្វើនៅទីតាំងតេក្វាន់ដូមាននៅសែនសុខ ខុនដូឈ្មោះ Begoniya ជិតកាំកូស៊ីធី ផ្លូវលេខ ៥៩៨ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ»។
លោកបានបន្តថា៖ «ក្រោយសិក្ខាសាលាចំនួន ៥ លើក សិក្ខាកាមដែលមកចូលរួមយ៉ាងតិចបំផុតចំនួន ៤ លើកពេញទៅ ៥ លើក នឹងទទួលបានលិខិតបញ្ជាក់ដែលផ្តល់ជូនដោយលោកគ្រូធំ Kiseon Kim ប្រធានសហព័ន្ធតេក្វាន់ដូប៉ូលិសពិភពលោក មានខ្សែក្រវាត់ខ្មៅ ១២ ដាន់។ សិក្ខាកាមអាចនឹងក្លាយទៅជាគ្រូបង្វឹក ឬសិស្សច្បង និងមានសិទ្ធិទៅចូលរួមក្នុងព្រឹត្តិការណ៍កីឡាប្រយុទ្ធនានាលើពិភពលោក៕