.jpg)
លោក ជ័យ ចាប (កណ្តាល) ជាប់ជាប្រធាន។ យឺន ពន្លក
ភ្នំពេញ: សមាគមតេក្វាន់ដូរាជធានីភ្នំពេញដែលបានចាប់កំណើតតាំងពីថ្ងៃទី ៥ ខែកក្កដា ឆ្នាំ ២០១១ នោះបានឈានចូលដល់អាណត្តិទី ៣ បន្ទាប់ពីបញ្ចប់អាណត្តិទី ២ កាលពីព្រឹកថ្ងៃទី ១០ ខែមករា ឆ្នាំ ២០១៩ ដោយបានធ្វើមហាសន្និបាត បោះឆ្នោត ដើម្បីជ្រើសរើសសមាជិកប្រតិបត្តិថ្មីមានចំនួន ១៣ រូបក្នុងនោះលោក ជ័យ ចាប បន្តធ្វើជាប្រធានសមាគមកីឡាតេក្វាន់ដូ WT រាជធានីភ្នំពេញ ហើយលោក សំ សុខយី ជាអគ្គលេខាធិការ។
តាមរបាយការណ៍ពីលោក សំ សុខយី កាលពីអាណត្តិទី ២ មានចំនួន ១៧ ក្លិប និងមានថ្នាក់ដឹកនាំជាសមាជិកប្រតិបត្តិ ១៣ នាក់។
លោកបន្តថា៖ «គ្រូបង្វឹកគ្រូជំនួយកម្រិតខ្សែក្រវាត់ខ្មៅ ១ ដាន់រហូតដល់ ៥ ដាន់មានចំនួន ២៦ នាក់ មន្ត្រីបច្ចេកទេសចំនួន ៨ នាក់ កីឡាករ-កីឡាការិនីចំនួន ៥៩៧ នាក់ក្នុងនោះមានកីឡាការិនី ២៨០ នាក់ផងដែរ»។
តាមរយៈមហាសន្និបាតពេញមួយព្រឹក គណៈកម្មាធិការប្រតិបត្តិចំនួន ១៣ រូបនោះមានលោក ជ័យ ចាប ទីប្រឹក្សាក្រសួងព្រះបរមរាជវាំងជាប្រធានសមាគម លោក សំ សុខយី នាយករងមជ្ឈមណ្ឌលជាតិហ្វឹកហ្វឺនកីឡាជាអគ្គលេខាធិការ និងលោក ហែម ស៊ីរ៉េត លោក កែវ សំណាង លោក តួ រិទ្ធាយ៉ា និងលោក អ៊ុក ចន្ថា ជាអនុប្រធានព្រមទាំងសមាជិកប្រតិបត្តិមួយចំនួនទៀតសរុប ១៣ នាក់។
លោក ជ័យ ចាប ក្រោយពេលទទួលបានសំឡេងគាំទ្រជាប្រធានសមាគមតេក្វាន់ដូ WT ក្នុងអាណត្តិថ្មីបន្តមានប្រសាសន៍ក្នុងមហាសន្និបាតកាលពីថ្ងៃម្សិលមិញថា៖ «វិស័យកីឡាប្រភេទតេក្វាន់ដូ WT នាពេលបច្ចុប្បន្ននេះជាកីឡារបស់ពិភពលោកដែលមានប្រទេសចំនួន ២១០ កំពុងធ្វើការហ្វឹកហាត់ និងមានសកម្មភាពយ៉ាងសកម្ម និងយកចិត្តទុកដាក់បំផុត ហេតុនេះនៅកម្ពុជា យើងក៏បានបង្កើតក្លិបកីឡាតេក្វាន់ដូ WT ជាច្រើននៅតាមរាជធានី-ខេត្ត»៕
