ភ្នំពេញៈ ក្រុមអត្តពលិកកីឡាតេក្វាន់ដូ ITF បានធ្វើឲ្យថ្នាក់ដឹកនាំ និងអ្នកចូលរួមរាប់ពាន់នាក់ នៅក្នុងទិវាសិទ្ធិមនុស្សអន្តរជាតិ ១០ ធ្នូ នៅសាលកោះពេជ្រ កាលពីព្រឹកថ្ងៃចន្ទ មានការភ្ញាក់ផ្អើលខ្លាំង ទៅនឹងទេពកោសល្យនៃការបង្ហាញបច្ចេកទេសសម្តែង និងសមត្ថភាព លក្ខណៈទ្រង់ទ្រាយធំដ៏ល្អរបស់ពួកគេ ហើយក្រុមល្បុក្កតោ ក៏បានសម្តែងសមត្ថភាព នៅក្នុងពិធីដ៏ធំនោះផងដែរ។
នៅក្នុងពិធីដ៏ឱឡារិកនោះ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជាបានលើកឡើងពីគុណតម្លៃរបស់វិស័យកីឡាថា បានរួមចំណែកលើកកម្ពស់សិទ្ធិមនុស្ស និងបានបង្ហាញពីកិត្យានុភាពរបស់កម្ពុជា នៅលើឆាកអន្តរជាតិ ស្របពេលដែលប្រទេសជាតិមានសុខសន្តិភាព ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន។
លោក កែវ រ៉េមី ជាប្រធានសហព័ន្ធកីឡាតេក្វាន់ដូអាយធីអែហ្វកម្ពុជា ផងនោះ បានថ្លែងថា៖ «ដោយសារសន្តិភាព ធ្វើឲ្យវិស័យកីឡារីកចម្រើន ហើយកីឡានេះ បានរួមចំណែកនៅក្នុងបញ្ហាសិទ្ធិមនុស្ស។ កីឡាបច្ចុប្បន្ន បានបង្ហោះទង់ជាតិកម្ពុជា នៅលើឆាកអន្តរជាតិ ដែលធ្វើឲ្យគេស្គាល់កម្ពុជា និងកិត្យានុភាពកម្ពុជា ហើយកីឡាគឺធ្វើឲ្យហេដ្ឋារចនាសម្ព័ន្ធ មានការរីកចម្រើន ផ្លូវថ្នល់ ស្ពាន រីកស្គុសស្គាយ ដែលបងប្អូនយើង បានកាត់បន្ថយការចំណាយទៅលើការធ្វើដំណើរ ព្រោះកាលពីដើម ការធ្វើដំណើរមានការលំបាកណាស់»។
ចំណែកកីឡាករម្ចាស់មេដាយមាស ប៉ាល់ ជីវ័ន ជាគ្រូបង្វឹកក្រុមជម្រើសជាតិកម្ពុជា បានប្រាប់ថា នេះជាលើកទី ២ ហើយ ដែលសហព័ន្ធកីឡាតេក្វាន់ដូអាយធីអែហ្វកម្ពុជា បាន ចូលរួមបង្ហាញសមត្ថភាព ក្នុងទិវាសិទ្ធិមនុស្សអន្តរជាតិ ប៉ុន្តែលើកនេះ មានចំនួនច្រើន គឺរហូតដល់ ៣៨ នាក់ ខណៈឆ្នាំមុនមានតែជិត ២០ នាក់។
ប៉ាល់ ជីវ័ន បានប្រាប់ភ្នំពេញប៉ុស្តិ៍ ក្រោយបញ្ចប់ការសម្តែងសមត្ថភាព ក្នុងទិវាសិទ្ធិមនុស្សអន្តរជាតិ កាលពីថ្ងៃចន្ទនោះថា៖ «សម្រាប់ការចូលរួម លើកនេះមានទ្រង់ទ្រាយធំ ព្រោះចំនួនអ្នកសម្តែងបង្ហាញសមត្ថភាពក៏ច្រើន និងបច្ចេកទេសសម្តែងក៏មានច្រើនដែរ ដែលធ្វើឲ្យអ្នកចូលរួម បានទះដៃអបអរដល់ពួកយើង»។
ជីវ័ន បន្ថែមថា៖ «បើប្រៀបធៀបការសម្តែងលើកនេះ នឹងលើកមុនវិញ គឺលើកនេះធ្វើបានល្អច្រើន ដោយសារកីឡាករក្មេងៗរបស់យើង មានសមត្ថភាពធ្វើបានល្អ ហើយនេះជាកិត្តិយស និង មោទនភាពរបស់សហព័ន្ធយើង ដែលបានបង្ហាញពីសក្តានុពលរបស់ខ្លួន ក្រោមវត្តមានអង្គុយទស្សនា ជាលើកទី ១ របស់សម្តេច សាយ ឈុំ អ៊ីចឹងសហព័ន្ធយើង ក៏មានការប្រឹងប្រែងខ្លាំង និងសង្ឃឹមថា យើងនឹងបានចូលរួមសម្តែងឲ្យថ្នាក់ដឹងនាំបានទស្សនា នៅក្នុងកម្មវិធីធំៗបែបនេះ ជាបន្តទៀត»៕