ក្រុងមីឡាន៖ ក្រុម AC Milan ស៊ុត ៣ គ្រាប់ផ្ទួនៗគួរឲ្យភ្ញាក់ផ្អើលរយៈពេល ៥ នាទី អំឡុងការប្រកួតដែលពួកគេត្រូវក្រុមភ្ញៀវ Juventus នាំមុខ ២-០ ហើយអាចវាយបកយកឈ្នះវិញបាន ៤-២ ខណៈនេះជាការជ្រុះបាត់ពិន្ទុលើកដំបូងរបស់ក្រុមទៅពីក្រុងទួរីន ដែលកំពុងឈរនៅកំពូលតារាងក្របខ័ណ្ឌ Serie A ចាប់តាំងពីរដូវកាលចាប់ផ្ដើមវិញកាលពីខែមុន។
សម្រាប់ការប្រកួតនេះ ក្រុម Juve ហាក់ធ្វើដំណើរទៅរកជ័យជម្នះ ១ លើកទៀត ពេលខ្សែបម្រើ Adrien Rabiot ជួយឲ្យមានគ្រាប់បាល់នាំមុខ ត្រឹមតែ ២ នាទី ក្រោយវិលពីសម្រាក ១៥ នាទី ហើយខ្សែបម្រើប្រយុទ្ធ Cristiano Ronaldo ធ្វើឲ្យក្រុមការពារជើងឯកមានសង្ឃឹមកាន់តែខ្ពស់ ដោយបន្ថែមការនាំមុខ ២-០ នៅនាទីទី ៥៣ ខណៈនេះ ក៏ជាគ្រាប់ក្នុងលីកទី ២៦ របស់កីឡាករអន្តរជាតិព័រទុយហ្គាល់នៅរដូវកាលនេះផងដែរ។
តែក្រុមម្ចាស់ផ្ទះ Milan ផ្ដើមមានកម្លាំងចិត្តវិញបន្តិច ក្រោយខ្សែប្រយុទ្ធចាស់វស្សា Zlatan Ibrahimovic ទម្លុះសំណាញ់ទីបាន ដោយបាល់ប៉េណាល់ទីនៅនាទីទី ៦២ ខណៈក្រោយហ្នឹង ៤ នាទី ខ្សែបម្រើ Franck Kessie ជាអ្នកជួយឲ្យក្រុមតាមស្មើ ២-២។ អ្វីដែលមិនគួរឲ្យជឿត្រឹម ១ នាទី បន្ទាប់ពីស្មើគ្នា ខ្សែប្រយុទ្ធវ័យក្មេង Rafael Leao ដែលទើបប្ដូរចូល ក៏អាចជួយឲ្យក្រុមខ្លួន នាំមុខវិញម្ដង ៣-២។
ស្របពេលដែលក្រុម Juve ព្យាយាមវាយសម្រុក ដើម្បីតាមស្មើវិញនោះ ស្រាប់តែនៅនាទីទី ៨០ ខ្សែប្រយុទ្ធ Ante Rebic បានបង្ហើយគ្រាប់ជ័យជម្នះចុងក្រោយឲ្យក្រុម Milan ឈ្នះក្រុម Juve ជាផ្លូវការ ៤-២ ហើយ ៣ ពិន្ទុនេះ ធ្វើឲ្យក្រុមរបស់លោក Stefano Pioli ហក់ឡើងមកលេខ ៥ ក្នុងតារាងលីកកំពូលរបស់អ៊ីតាលី ដោយមាន ៤៩ ពិន្ទុ តែក្រុមមានទីតាំងនៅក្រុងមីឡានមួយនេះ មានគម្លាតដល់ទៅ ១៤ ពិន្ទុពីក្រុមនៅទីកំពូលទាំង ៤ (Top4)។
ក្រោយបញ្ចប់ការប្រកួត គ្រូបង្វឹករបស់ក្រុម លោក Pioli ក៏ត្រូវបានអ្នកសារព័ត៌មានសួរទាក់ទងនឹងអនាគតរបស់លោក ក្រោយមានពាក្យរហិចរហៀងថា ក្លិប Milan ព្រមព្រៀងឲ្យគ្រូបង្វឹកសញ្ជាតិអាល្លឺម៉ង់ Ralf Rangnick មកដឹកនាំក្រុមជាមួយនឹងកិច្ចសន្យារយៈពេលវែង ចាប់ពីរដូវកាលក្រោយតទៅ។
ពាក់ព័ន្ធនឹងរឿងនេះ លោក Pioli ឆ្លើយថា៖ «ខ្ញុំមិនបានគិតដល់រឿងដែលនឹងកើតឡើង ក្នុងសីហាទេ។ ខ្ញុំគ្រាន់តែគិតដល់ការប្រកួតបន្ទាប់ ដែលត្រូវតទល់ជាមួយក្រុម Napoli ប៉ុណ្ណោះ។ ខ្ញុំពេញចិត្តជាមួយនឹងក្រុមនាពេលនេះ ហើយអ្វីដែលប្រុងនឹងកើតឡើង ឲ្យវាកើតទៅចុះ។ ខ្ញុំមិនខ្វល់ពីរឿងអនាគតរបស់ខ្ញុំនោះទេ។ ខ្ញុំគ្រាន់តែចង់បញ្ចប់រដូវកាលជាមួយនឹងលទ្ធផលល្អតែប៉ុណ្ណោះ»។
សម្រាប់ក្រុម Juve បើទោះជាបរាជ័យលើកនេះ ក៏នៅតែឈរលេខ ១ ក្នុងតារាងដដែល ដោយមាន ៧៥ ពិន្ទុ ពោលគឺនាំមុខដាច់ ៧ ពិន្ទុ លើក្រុមលេខ ២ Lazio ដែលភ្លាត់ស្នៀតទៅប្រកួតចាញ់ក្រុមក្បែរបាតតារាង Lecce ២-១ ខណៈការប្រកួតសល់ ៧ លើកទៀត នឹងបញ្ចប់រដូវកាលនៃក្របខ័ណ្ឌ Serie A ជាស្ថាពរហើយ៕ AFP/VN