ភ្នំពេញ៖ អតីតកីឡាកររបស់ក្លិបឃ្លាំងមឿងកីឡា ខេត្តពោធិ៍សាត់ ថុល មករា បានសម្រេចប្តូរឈ្មោះមកជា អេលីត មករា ក្រោយពេលរូបគេបានផ្ទេរមកនៅក្នុងក្លិបនាយកដ្ឋានអង្គរក្ស។
តាមរយៈការខិតខំហ្វឹកហាត់រយៈពេល ២ ខែ នៅទ្រនំថ្មីនេះ មករា បានឡើងប្រកួត ៣ លើក ឈ្នះទាំងអស់ ហើយបើបូកសរុបទាំងតម្លៃខ្លួន និងប្រាក់ឧបត្ថម្ភពីថ្នាក់ដឹកនាំជាអគ្គស្នងការរងនគរបាលជាតិចំនួន ៣ រូបផងនោះ អេលីត មករា ទទួលបានប្រាក់សរុប ២ ២០០ ដុល្លារ ក្នុងមោទនភាព ដែលមិនធ្លាប់ដណ្តើមបានជោគជ័យបែបនេះសោះ។ នេះតាមការឱ្យដឹងពីលោក ស៊ន អេលីត ជាអ្នកគ្រប់គ្រងក្លិបនាយកដ្ឋានអង្គរក្ស។
អេលីត មករា ជាអ្នកប្រដាល់ជំនាញកណ្តាប់ដៃ និងទាត់ធ្ងន់ ធ្លាប់ចូលប្រឡូកក្នុងមុខរបរប្រដាល់គុនខ្មែរ អស់រយៈពេលជិត ១០ ឆ្នាំមកហើយ តែមិនធ្លាប់ទទួលបាន ឈ្នះជយលាភីខ្សែក្រវាត់ ឬពានរង្វាន់ធំដុំនៅឡើយ។ ទោះយ៉ាងណា បន្ទាប់ពីការខិតខំប្រឹងប្រែងសាជាថ្មី ពេលមករួមរស់ក្នុងក្លិបថ្មី ដោយមានការយកចិត្តទុកដាក់លើការហូបចុក ស្នាក់នៅ ព្រមទាំងមានផ្តល់ប្រាក់រង្វាន់បន្ថែមទៀតនោះ បានធ្វើឱ្យវិជ្ជាគុន អេលីត មករា មានការប្រែប្រួល និងរីកចម្រើនជាងមុន ដោយប្រកួតឈ្នះ ៣ លើកជាប់ៗគ្នា។
លោក ស៊ន អេលីត អ្នកគ្រប់គ្រងក្លិបផ្ទាល់បាននិយាយថា ទស្សនវិស័យរបស់ក្លិបនាយកដ្ឋានអង្គរក្ស គឺលើកស្ទួយកីឡាករឱ្យមានសមត្ថភាពគុណភាពល្អ ប្រកួតទទួលបានលទ្ធផលល្អ និងផ្តល់ជូនកីឡាករនូវកម្លាំងចិត្ត ខណៈដែលថ្នាក់ដឹកនាំ មានចិត្តសប្បុរស មិនស្វែងរកប្រាក់ពីកីឡានោះឡើយ តែបានលះបង់ជួយកីឡាក្នុងទឹកចិត្ត ជួយលើកស្ទួយកីឡាករក្នុងក្លិបនាយកដ្ឋានអង្គរក្សឱ្យល្បីល្បាញ សម្រាប់អង្គភាព និងជាតិទាំងមូល។
ស៊ន អេលីត បានបន្ថែមថា៖ «ខ្ញុំមិនអាចអត់សរសើរបានទេ ចំពោះ អេលីត មករា ក្នុងនោះថ្នាក់ដឹកនាំ គឺពេញចិត្ត និងផ្ដល់ប្រាក់រង្វាន់ ដូចការសន្យាតាមកម្រិត និងទៅតាមជ័យជម្នះរបស់ពួកគេ ដោយក្នុងនោះថ្នាក់ដឹកនាំរបស់យើងទាំង ៣ រូប មាននាយឧត្តមសេនីយ៍ ឆៃ ស៊ីណារិទ្ធ ឧត្តមសេនីយ៍ ឌី វិជ្ជា និងឧត្តមសេនីយ៍ យឹម លាង បានកំណត់លើកទឹកចិត្តចំពោះកីឡាករដែលប្រកួតឈ្នះជើងខ្លាំង លំដាប់ជួរមុខ ដោយផ្តួលដៃគូឱ្យសន្លប់ ១ លើក ចំនួន ៥០០ ដុល្លារ រីឯគូកម្រិតខ្លាំងមធ្យម ផ្តួលដៃគូឱ្យសន្លប់បាន ៣០០ និងគូថ្មីថ្មោងផ្តួលដៃគូឱ្យសន្លប់បាន ១៥០ ដុល្លារ។ បន្ថែមពីលើនេះ បើកីឡាករឈ្នះដៃគូដោយពិន្ទុ ក៏មានប្រាក់រង្វាន់លើកទឹកចិត្តផងដែរ ដើម្បីឱ្យខំប្រឹង»។
គ្រូបង្វឹកវ័យក្មេងរូបនេះ បានលម្អិតថា ចំពោះ អេលីត មករា ដែល ៣ ប្រកួតនេះ ឈ្នះពិន្ទុ ២ និងឈ្នះសន្លប់ ១ ដងនោះ គឺទទួលបានប្រាក់ឧបត្ថម្ភពីថ្នាក់ដឹកនាំក្លិបចំនួន ១ ១០០ ដុល្លារ និងបន្ថែមប្រាក់តម្លៃខ្លួននៅ CNC ២ ប្រកួត និង ១ ប្រកួត នៅបាយ័នបានសរុប ១ ០០០ ដុល្លារទៀត។
ទោះយ៉ាងណា ស៊ន អេលីត បានបញ្ជាក់ថា៖ «កូនសិស្សខ្ញុំ ល្បីល្បាញ និងខ្លាំងនៅលើសង្វៀនជាច្រើននាក់ ប៉ុន្តែនៅមិនទាន់មានកីឡាករណាម្នាក់ បានជាប់ជាក្របខ័ណ្ឌប៉ូលិស តាមរយៈកីឡានៅឡើយទេ ខណៈដែលកីឡាករ កីឡាការិនី បានចូលជាប៉ូលិស ក្នុងរយៈពេល ៣ ឆ្នាំនេះ មានជាង ៤០០ នាក់ឯណោះ តែខាងក្លិបខ្ញុំ មិនទាន់ទទួលបានសោះ ទោះបីជាសិស្សរបស់ខ្ញុំបានឈ្នះខ្សែក្រវាត់ច្រើនក៏ដោយ»៕