.jpg)
កីឡាករម៉ន សាម៉េត កំពុងតែស្ថិតក្នុងរ៉ាដារបស់ក្លិបថៃ ក្រោយពីទទួលបានលទ្ធផលស្មើក្នុង Max Muay Thai កាលពីថ្ងៃអាទិត្យ។ រូប សហការី
ភ្នំពេញ: កីឡាករប្រដាល់មានល្អិតចិត្តធំ ម៉ន សាម៉េត មកពីក្លិបប្រដាល់កងចក្ររាជសីហ៍នៃសមាគមកីឡាប្រដាល់ក្រសួងមហាផ្ទៃ បានចេញទៅប្រកួតស្ងាត់ៗក្នុងកម្មវិធីប្រដាល់ពេញនិយមមួយនៅទីក្រុងផាតាយា ប្រទេសថៃ មានឈ្មោះថា Max Muay Thai កាលពីយប់ថ្ងៃអាទិត្យ និងទទួលបានលទ្ធផលត្រឹមស្មើ ទោះបីអ្នកទស្សនាមួយចំនួនមើលឃើញថា មានប្រៀបលើកីឡាករថៃ Sor Tragoon Petch ក៏ដោយ។
ម៉ន សាម៉េត បានវិលមកមាតុប្រទេសវិញភ្លាមបន្ទាប់ពីប្រកួត និងបាននិយាយថា៖ «ចំពោះលទ្ធផលបានត្រឹមស្មើនេះ ខ្ញុំគ្មានប្រតិកម្ម ឬអន់ចិត្តអ្វីទេ ពីព្រោះការប្រកួត យើងជាកីឡាករមិនអាចដាក់ពិន្ទុខ្លួនឯងបាននោះទេ គឺគេមានចៅក្រម និងគណៈកម្មការរបស់គេ ប៉ុន្តែយើងដឹងទាំងអស់គ្នាហើយថា នៅប្រទេសថៃ កីឡាករបរទេស ទៅវ៉ៃនៅថៃ បើមិនអាចផ្តួលគេឲ្យសន្លប់នោះ គឺមិនងាយបានឈ្នះឡើយ»។
ម៉ន សាម៉េត បានបន្ថែមថា៖ «រឿងចាញ់ ឬឈ្នះ ឬស្មើ ខ្ញុំគិតថាមិនទាក់ទងអ្វីធំដុំទេ ប៉ុន្តែអ្វីដែលខ្ញុំពេញចិត្តគឺតម្លៃខ្លួនប្រកួតសក្តិសម មានចំនួនអាចទទួលយកបានសម្រាប់ជួយជីវភាពរបស់ខ្ញុំ»។
ម៉ន សាម៉េត បានឲ្យដឹងថា៖ «ខ្ញុំបានមកប្រកួតនៅប្រទេសថៃ បានចំនួន២លើកមកហើយ។ កាលពីឆ្នាំមុន ខ្ញុំបានលទ្ធផលចាញ់ ហើយកាលពីយប់ថ្ងៃអាទិត្យ ខ្ញុំបានវ៉ៃស្មើជាមួយកីឡាករថៃ ហើយបើមានឱកាសថ្ងៃក្រោយ បានទៅប្រកួតទៀត ខ្ញុំជឿថាបានឈ្នះមិនខាន»។
សាម៉េទ បានមទម្លាយថា៖ «តម្លៃប្រកួតរបស់ខ្ញុំបើគិតជាដុល្លារបានប្រហែលជាង៤៥០ដុល្លារ ដោយមានការហូបចុកស្នាក់នៅ និងធ្វើដំណើរគេចេញឲ្យមួយចប់។ ជាមួយគ្នានេះ ក្រោយពេលប្រកួតមានក្លិបនៅស្រុកថៃ មកចរចារជាមួយខ្ញុំដើម្បីឲ្យទៅហ្វឹកហាត់ឡើងប្រកួតនៅថៃបន្ត ដោយមានតម្លៃខ្លួនប្រកួតកើនឡើងជាងមុន ប៉ុន្តែអ្វីៗគឺអាស្រ័យលើក្លិប និងឪពុករបស់ខ្ញុំ»។
លោកម៉ាង ម៉ន គ្រូបង្វឹក និងជាឪពុកបង្កើតបានប្រាប់ថា៖ «អាម៉េត វាមានប្រពន្ធមានកូនហើយ ហេតុនេះការសម្រេចចិត្តទៅហាត់ និងប្រកួតនៅស្រុកថៃជាជម្រើស និងការសម្រេចចិត្តរបស់វា ពីព្រោះបញ្ហាជីវភាព និងប្រាក់ចំណូលជារឿងសំខាន់»។
លោកបានបន្តថា៖ «ធម្មតាកីឡាករយើងសព្វថ្ងៃស្ម័គ្រចិត្ត គ្មានប្រាក់ខែ ឬប្រាក់ចំណូលឯណាជួយក្រៅពីការឡើងប្រកួតនោះឡើយ ហើយបើយើងជាកីឡាករជាប់ជម្រើសជាតិ ឬស៊ីប្រាក់ខែគេ យើងមិនអាចទៅបានទេត្រូវអនុញ្ញាតពីគេ»៕
