.jpg)
កីឡាករ ថៃ រ៉េត និង ធី វ៉ារិទ្ធ ពេលឡើងទទួលប្រាក់រង្វាន់ ក្រោយប្រកួតរួច។ សហការី
ភ្នំពេញ៖ អ្នកប្រដាល់ចិត្តធំវ័យក្មេង កំពុងបង្ហាញសមត្ថភាពខ្លាំង មកពីក្លិបបញ្ជាការដ្ឋានទ័ពពិសេស ថៃ រ៉េត បានបន្តឈ្នះប្រាក់រង្វាន់ចំនួន ៣,៤ លានរៀល ពីកម្មវិធីប្រដាល់ដណ្តើមប្រាក់លានប្រចាំសប្តាហ៍ទី៦១ នៃសង្វៀនថោន កាលពីយប់ថ្ងៃអាទិត្យ ហើយវាក៏ជាលើកទី៥ ផងដែរ ដែល ថៃ រ៉េត ដណ្តើមបានប្រាក់រង្វាន់ធំពីសង្វៀនមួយនេះ។
យ៉ាងណាក៏ដោយ សម្រាប់ការប្រកួតផ្តាច់ព្រ័ត្រ ជាមួយជើងខ្លាំងមិនសូវមានគេស្គាល់ ធី វ៉ារិទ្ធ កាលពីថ្ងៃអាទិត្យនោះ គឺ ថៃ រ៉េត ដែលបានផ្តួល រិន សារ័ត្ន ឱ្យសន្លប់នៅទឹកទី២ ក្នុងការប្រកួតជម្រុះនោះ ជួបឧបសគ្គធំណាស់ ព្រោះក្បាច់ជង្គង់ និងកណ្តាប់ដៃល្អរបស់ ធី វ៉ារិទ្ធ បានធ្វើឱ្យរូបគេយកឈ្នះដោយពិន្ទុយ៉ាងគ្រាំគ្រាខ្លួន ហើយ ថៃ រ៉េត ក៏សុំឈប់សម្រាកមិនប្រកួតមួយរយៈផងដែរ។
ថៃ រ៉េត បាននិយាយថា៖ «នៅសង្វៀនថោននេះ ខ្ញុំបានឡើងប្រកួតញឹកញាប់ ហើយមិនដែលចាញ់ឡើយ គឺការប្រកួតក្នុងព្រឹត្តិការណ៍សំខាន់ៗ នៅសង្វៀននេះ ខ្ញុំធ្លាប់ឈ្នះប្រាក់រង្វាន់ធំៗចំនួន ៥ លើក ក្នុងនោះឈ្នះប្រាក់រង្វាន់ពីកម្មវិធីម៉ាសហ្វៃចំនួន ៣ លើក និងឈ្នះប្រាក់រង្វាន់ពីការប្រកួតម៉ារ៉ាតុងដណ្តើមប្រាក់លានចំនួន ២ លើក ប៉ុន្តែការឈ្នះលើកនេះ ខ្ញុំឈឺខ្លួន ព្រមទាំងមានរបួសដៃ និងឈឺជើង អាចថា សុំសម្រាកប្រកួតឱ្យបានសុខភាពរឹងមាំបន្តិចសិន ព្រោះប្រកួតជាប់ៗគ្នាពេក»។
ទាក់ទងទៅនឹងចាប់យកអាជីពប្រដាល់គុនខ្មែរនេះ ថៃ រ៉េត បានទម្លាយថា៖ «ខ្ញុំជាកូនកសិករមានបងប្អូន ៤ នាក់ ហើយខ្ញុំជាកូនពៅ ដែលរកប្រាក់ពីប្រដាល់ជូនអ្នកម្តាយបានច្រើនជាងគេ។ ខ្ញុំចាប់ផ្តើមវ៉ៃល្បីល្បាញ ក្នុងឆ្នាំ ២០២០ ដោយប្រកួតឈ្នះជើងចាស់ល្បីៗមួយចំនួនឱ្យសន្លប់ បន្ទាប់មកខ្ញុំបានជាប់ជម្រើសជាតិ ហើយនៅឆ្នាំ ២០២១ នេះ មិនទាន់ដឹងថា ជាប់ជម្រើសជាតិទៀត ឬយ៉ាងណាទេ។ ខ្ញុំមិនធ្លាប់បានចូលរួមប្រកួតដណ្តើមខ្សែក្រវាត់ម្តងឡើយ ចំណែកការដណ្តើមប្រាក់រង្វាន់ចំនួន ៥ លើកនេះ ខ្ញុំបានយកថវិកានេះ ទៅឱ្យម្តាយខ្ញុំ ដើម្បីទ្រទ្រង់ជីវភាព ព្រោះខ្ញុំនៅលីវ»។
ចំណែកលោក ជួប វុត្ថា ជាពិធីករប្រដាល់ នៅសង្វៀនថោនបាននិយាយថា៖ «វត្តមានប្រកួតរបស់ ថៃ រ៉េត នៅលើសង្វៀនថោននេះ គឺពិតជាមិនដែលចាញ់សោះ។ សមត្ថភាពរបស់គេក្នុងទម្ងន់ ៦៣,៥ គីឡូក្រាមនេះ ពិតជាលំបាករកដៃគូប្រកួតណាស់ ហើយខ្ញុំទទួលបានការរិះគន់ពីកីឡាករ និងក្លិបមួយចំនួន ដោយពួកគេភាគច្រើន សុទ្ធតែបដិសេធ និងមិនចង់ឡើងប្រកួតជាមួយ ថៃ រ៉េត ព្រោះពិតជាលំបាកទប់ទល់ ឬគេចផុតពីការចាញ់ដោយសន្លប់ណាស់ អ៊ីចឹងបើផ្គូផ្គងលើកក្រោយ អាចរក ឃីម ឌីម៉ា ឬ យ៉េន ឌីណា ទើបអាចស័ក្តិសមគ្នា»៕
