ភ្នំពេញ៖ វត្តមានរបស់កីឡាករវ័យក្មេង ថៃ រ៉េត មកពីក្លិបបញ្ជាការដ្ឋានទ័ពពិសេសនៅលើសង្វៀនថោន កាលពីយប់ថ្ងៃអាទិត្យ បានបង្ហាញឱ្យឃើញពីសមត្ថភាព និងបច្ចេកទេសជំនាញប្រើកណ្តាប់ដៃវ៉ៃចេញដ៏អស្ចារ្យ ក្នុងការប្រកួតលក្ខណៈម៉ារ៉ាតុងគុនខ្មែរទម្ងន់ ៦៣,៥ គីឡូក្រាម ដើម្បីក្លាយជាម្ចាស់ជើងឯក អមដោយប្រាក់រង្វាន់ចំនួន ៣,៤ លានរៀល។
បើទោះបីជាការប្រកួតនេះ មាន ២ ដំណាក់កាល ហើយត្រូវប្រើពេលប្រកួតសរុបចំនួន ៦ ទឹក ស្មើនឹង ១៨ នាទី ប៉ុន្តែតាមរយៈការប្រកួតជាក់ស្តែងកាលពីថ្ងៃអាទិត្យនោះ ថៃ រ៉េត បានផ្តួលរៀមច្បង អ៊ុង កំសត់ នៅវគ្គជម្រុះត្រឹមទឹកទី១ រួចបានបន្តទៅផ្តួល រិន សារ័ត្ន នៅវគ្គផ្តាច់ព្រ័ត្រក្នុងទឹកទី១ ដូចគ្នា គឺសម្រាប់ការប្រកួតទាំង ២ លើកនេះ ថៃ រ៉េត បានប្រើពេលសរុបប្រមាណ ៥ នាទី ដើម្បីផ្តួលរៀមច្បងទាំង ២ នាក់ ឱ្យសន្លប់។
ភាពរឹងមាំ និងក្បាច់ជង្គង់របស់ រិន សារ័ត្ន ដែលមិនងាយនឹងសន្លប់កន្លងមកនោះ គឺមិនអាចទប់ទល់ ឬទ្រាំទ្រការវាយលុកផ្ទួនៗ ពីកីឡាករ ថៃ រ៉េត បាននោះឡើយគឺសូម្បីតែស្នៀតការពារធាក់ទប់ដកថយ ឬដោះខ្លួនចេញពីការវាយសន្ធាប់ ក៏គ្មានឱកាសឡើយ ព្រោះ ថៃ រ៉េត បានវាយសម្រុកគ្មានបង្អង់នូវកណ្តាប់ដៃឆ្វេងស្តាំរបស់គេ ដោយក្នុងនោះ សារ័ត្ន ត្រូវបាន ថៃ រ៉េត ម៉ាត់ឱ្យរាប់ចំនួន ២ ដង រួចឈានដល់អាជ្ញាកណ្តាលបញ្ឈប់ការប្រកួតតែម្តង បន្ទាប់ពី ថៃ រ៉េត បានម៉ាត់ថែមផ្តួនៗជាង ១០ ដៃ បណ្តាលឱ្យដួលជាលើកទី៣ នោះ។
ថៃ រ៉េត ដែលសាងឈ្មោះល្បីលឿនបំផុត និងបានជាប់ជាកីឡាករជម្រើសជាតិគុនខ្មែរផងនោះ បាននិយាយក្រោយការប្រកួតថា៖ «ខ្ញុំធ្លាប់ប្រកួតនៅសង្វៀនថោនចំនួន ៤ លើកមកហើយ ប៉ុន្តែសម្រាប់ការប្រកួតបែបម៉ារ៉ាតុងនេះ វាជាលើកទី១ ហើយក៏ជាលើកដំបូង ដែលខ្ញុំទទួលបានប្រាក់ច្រើនយ៉ាងនេះ ខណៈការប្រកួតនេះ ខ្ញុំគិតថា ដៃគូខ្ញុំរឹងមាំ និងជាជើងចាស់ គឺមិនអាចប្រកួតរបៀបស្រង់យកពិន្ទុតាមបច្ចេកទេស ឬពន្យារពេលបានទេ គឺដាច់ខាតត្រូវតែវាយសម្រុកគ្មានមេត្តា ដើម្បីឱ្យសន្លប់តែម្តង»។
យ៉ាងណាក៏ដោយ នៅក្រោយការឈ្នះជើងឯកនេះ ថៃ រ៉េត បានសារភាពថា រូបគេបានគេចផុតពីការភ័យខ្លាច គឺការជួប លី ភា ដែលបានចាញ់ពិន្ទុ រិន សារ័ត្ន នៅក្នុងវគ្គជម្រុះ។ ថៃ រ៉េត បានបញ្ជាក់ថា៖ «ឃើញគាត់ ចាញ់នៅវគ្គជម្រុះ ខ្ញុំមានអារម្មណ៍សប្បាយ ព្រោះបើជួប លី ភា ខ្ញុំដឹងតែយ៉ាប់ទៀតហើយ ព្រោះកាលជួបគ្នា នៅលើសង្វៀន CTN គាត់ធ្វើបាបខ្ញុំណាស់ គឺគាត់ក្រឡុកខ្ញុំ ដោយចូលឡាំជង្គង់ ឡើងខ្ញុំអស់ និងខ្សោះកម្លាំងពីខ្លួនតែម្តង»។
ចំណែក រិន សារ័ត្ន ដែលទទួលបានប្រាក់រង្វាន់ចំនួន ១,៨ លានរៀល ក្នុងនាមជាអ្នកចាញ់នោះនិយាយថា៖ «ខ្ញុំចាញ់ដោយអស់ចិត្ត ព្រោះគេចមិនផុតពីកណ្តាប់ដៃរបស់គេហើយខ្ញុំវង្វេងវង្វាន់រកលេងក្បាច់ជង្គង់ មិនទាន់ផង គឺគេវាយស្រោចមកចូលមុខ និងគុម្ពត្រចៀករបស់ខ្ញុំ មិនអាចតបតបានសោះ»។
យ៉ាងណាក៏ដោយសិស្សគណក្លិបប្រដាល់បញ្ជាការដ្ឋានកងទ័ពជើងទឹក រិន សារ័ត្ន បាននិយាយបន្ថែមថា៖ «ប្រសិនបើខ្ញុំបានជួប ថៃ រ៉េត លើកក្រោយ ខ្ញុំដឹងពីស្នៀតការពារ គឺសង្ឃឹមថា មិនអាចចាញ់ ដោយសន្លប់បាននោះទេ ហើយខ្ញុំរំពឹងថា អាចសងសឹកបានវិញមិនខាន ព្រោះគេល្អបានតែទឹកដំបូងប៉ុណ្ណោះ អ៊ីចឹងបើ ការប្រកួតឆ្លងផុតចូលទឹកទី៣ ទៅ គឺកម្លាំងគេថយចុះ ខ្ញុំអាចវាយក្បាច់ជង្គង់បានល្អវិញ»៕