.jpg)
សកម្មភាពរត់ប្រណាំងបែបលក្ខណៈមហាជន ដែល NOCC បានរៀបចំឲ្យមានកន្លងមក។ ស្រេង ម៉េងស្រ៊ុន
ភ្នំពេញៈ ព្រឹត្តិការណ៍ប្រកួតកីឡាថ្មីមួយឈ្មោះថា «ថ្មើរជើងប្រវត្តិសាស្ត្រ» ត្រូវបានក្រសួងទេសចរណ៍ គណៈកម្មាធិការជាតិអូឡាំពិកកម្ពុជា (NOCC) រដ្ឋបាលខេត្តឧត្តរមានជ័យ សាលាស្រុកអន្លង់វែង និងមជ្ឈមណ្ឌលសន្តិភាពអន្លង់វែង នៃមជ្ឈមណ្ឌល ឯកសារកម្ពុជា រួមគ្នាបង្កើតឲ្យមានឡើងជាលើកដំបូងនៅកម្ពុជា ដើម្បី ជាការចាប់ផ្តើមថ្មីសម្រាប់ស្រុកអន្លង់វែង ដើម្បីគាំទ្រដល់សន្តិភាព សន្តិសុខ និងវិបុលភាព នៅក្នុងតំបន់តស៊ូចុងក្រោយនៃចលនាខ្មែរក្រហម។
ព្រឹត្តិការណ៍ថ្មីមួយនេះ នឹងត្រូវធ្វើនៅសារមន្ទីរអតីតផ្ទះតាម៉ុក និងលើភ្នំដងរែក ក្នុងស្រុកអន្លង់វែង ខេត្តឧត្តរមានជ័យ នាព្រឹកថ្ងៃសៅរ៍ ចុងសប្តាហ៍នេះ ហើយតាមមន្ត្រីជំនាញកីឡារបស់ NOCC បានដឹងថា «ថ្មើរជើងប្រវត្តិសាស្ត្រ» បានឆ្លុះបញ្ចាំងឲ្យឃើញនូវអត្ថន័យធំៗចំនួន ៣ ដើម្បីជួយជំរុញឲ្យទីតាំងសមរភូមិមួយដ៏ខ្មៅងងឹតមួយនេះ ប្រែក្លាយជាតំបន់ទេសចរណ៍ដ៏គួរចាប់អារម្មណ៍ និងក្លាយជាទីប្រជុំជន ដែលគ្មានការភ័យខ្លាចដោយអតីតកាល។
លោក វ៉ាត់ ចំរើន អគ្គលេខាធិការ NOCC និងជារដ្ឋលេខាធិការក្រសួងទេសចរណ៍ បានថ្លែងប្រាប់ភ្នំពេញ ប៉ុស្តិ៍ កាលពីម្សិលមិញថា៖ «នេះជាព្រឹត្តិការណ៍បែបទេសចរណ៍ ដែលមានគោលបំណងសំខាន់ ៣ ទី ១ ទាក់ទាញភ្ញៀវទេសចរជាតិ និងអន្តរជាតិឲ្យចាប់អារម្មណ៍ តំបន់ប្រវត្តិសាស្ត្រ ដែលជាតំបន់បញ្ចប់សង្គ្រាមចុងក្រោយរបស់ខ្មែរក្រហម ដើម្បីដឹងពីអត្ថន័យពិតនៃការរស់នៅរបស់ខ្មែរក្រហមនៅលើភ្នំដងរែក និងមូលហេតុចម្បងដែលនាំ ឲ្យខ្មែរក្រហម បែកបាក់គ្នា និងត្រូវបានផ្តួលរំលំ»។
លោកបានបន្តថា៖ «ទី ២ យើងចង់អប់រំដល់ប្រជាពលរដ្ឋឲ្យយល់ដឹងអំពីសម័យកាលដ៏ខ្មៅងងឹតនៃសោកនាដកម្មសម័យប៉ុល ពត ហើយរំឭកឲ្យពួកគាត់ រួមគ្នាការពារទឹកដី សន្តិភាព ចៀសវាងអំពើអាក្រក់ និងប្រល័យពូជសាសន៍។ រីឯទី ៣ យើងចង់ឲ្យតំបន់ទល់ដែន ក្លាយទៅជាតំបន់អ៊ូអរ ដើម្បីជាការលើកទឹកចិត្តដល់អ្នករស់នៅទល់ដែន អភិវឌ្ឍនៅទល់ដែន និងឲ្យពួកគាត់ មើលឃើញពីសក្តានុពលនៃវិស័យសេដ្ឋកិច្ច ក៏ដូចជាទេសចរណ៍ និងវិស័យការពារផ្សេងៗទៀត ជាពិសេសធ្វើឲ្យបរទេសដឹងថា ទីតាំងភ្នំដងរែកជាដែនដីរបស់ខ្មែរគឺមិនមែនជាតំបន់សនោះទេ»។
លោកវ៉ាត់ ចំរើន បានឲ្យដឹងថា ព្រឹត្តិការណ៍ថ្មើរជើងប្រវត្តិសាស្ត្រនេះ គឺមានការប្រកួត ២ ផ្នែក ទី ១ គឺរត់ចម្ងាយ ៣ គីឡូម៉ែត្រ ដោយចេញដំណើរនៅសារមន្ទីរអតីតផ្ទះតាម៉ុក ឆ្ពោះទៅកាន់រង្វង់មូលផ្សារអន្លង់វែង រួចត្រឡប់មកអតីតផ្ទះតាម៉ុកវិញ ហើយមានសិស្សសាលាចូលរួម ៨០០ នាក់ និងមហាជនជាង ២០០ នាក់ទៀត។
ចំណែកទី ២ គឺការដើរឆ្ពោះទៅកាន់តំបន់ប្រវត្តិសាស្ត្រ មានចម្ងាយជាង ៥ គីឡូម៉ែត្រ ដោយចេញដំណើរពីច្រកអន្តរជាតិជាំ នៅលើភ្នំដងរែក ឆ្ពោះទៅកាន់ពយតាម៉ុក ដោយមានអ្នកចូលរួមជាង ១០០ នាក់ ហើយពេលដល់ទីតាំងនោះ និងការសម្តែងរបាំជំនាន់ខ្មែរក្រហម ឲ្យអ្នកចូលរួមបានទស្សនា។ បន្ថែមលើនេះ ក្រុមមជ្ឈមណ្ឌលសន្តិភាពអន្លង់វែងនៃមជ្ឈមណ្ឌលឯកសារកម្ពុជា នឹងរៀបរាប់ពីប្រវត្តិខ្មែរក្រហម និងមូលហេតុនៃការដួលរលំនៃរបបដ៏ឃោរឃៅ ដែលមានអាយុកាល ៣ ឆ្នាំ ៨ ខែ និង ២០ ថ្ងៃមួយនេះដើម្បីឲ្យអ្នកចូលរួម និងភ្ញៀវទេសចរបានដឹងផងដែរ។
នៅពេលសួរពីសុវត្ថិភាព នៅតំបន់អន្លង់វែង លោក វ៉ាត់ ចំរើន បានបញ្ជាក់ថា៖ «ការរៀបចំរបស់អាជ្ញាធរនៅទីនោះ មានសន្តិសុខ និងសុវត្ថិភាព ១០០ ភាគរយ គ្មានបញ្ហាអ្វីទាំងអស់ គឺសូម្បីគ្រាប់មីន ក៏ខាង CMAC បានដោះរួចអស់ហើយដែរ ហើយព្រឹត្តិការណ៍កីឡា បែបទេសចរណ៍នេះនឹងធ្វើឲ្យប្រជាពលរដ្ឋនៅទីនោះមានការភ្ញាក់ផ្អើល ព្រោះជាតំបន់ដាច់ស្រយោល ដែលពួកគាត់មិនធ្លាប់គិតថា នឹងមានព្រឹត្តិការណ៍កីឡា ឬការប្រគំតន្ត្រីតូចមួយ ទៅលេង ឬសម្តែង នៅទីនោះទេ»៕
