ប៉ារីស៖ នឹងគ្មានចំណាត់ការអ្វីទាំងអស់ចំពោះខ្សែប្រយុទ្ធ Neymar របស់ក្រុម Paris Saint-Germain (PSG) ឬខ្សែការពារ Alvaro Gonzalez របស់ក្រុម Olympique de Marseille (Marseille) ជុំវិញការចោទប្រកាន់ពីការប្រើពាក្យរើសអើងជាតិសាសន៍ អំឡុងការប្រកួតក្របខ័ណ្ឌ Ligue 1 នាពេលកន្លងមក។ នេះបើតាមការប្រកាសរបស់គណៈកម្មការវិន័យលីកអាជីពបារាំង (LFP) នៅថ្ងៃពុធ។
កីឡាករទាំង ២ ប្រឈមជាមួយនឹងការពិន័យរហូតដល់ទៅ ១០ ប្រកួត ពាក់ព័ន្ធនឹងពាក្យសម្តីនោះ ដែលបាននិយាយនៅឯចុងបញ្ចប់នៃការប្រកួតដែលក្រុម Marseille ឈ្នះ ១-០ លើក្រុម PSG។
គណៈកម្មការបានឱ្យដឹងក្នុងសេចក្ដីប្រកាសថា៖ «ក្រោយពិនិត្យវីដេអូឯកសារ ដែលមានចូលរួមពីកីឡាករ និងតំណាងនៃក្លិប គណៈកម្មការបានកត់សម្គាល់ថា អត់មានភ័ស្តុតាងគ្រប់គ្រាន់ ដែលបង្ហាញពីការប្រើសម្តីរើសអើងពូជសាសន៍ដោយ Gonzalez ចំពោះ Neymar ឬដោយ Neymar ចំពោះ Gonzalez ឡើយ»។
កីឡាករអន្តរជាតិប្រេស៊ីល Neymar និយាយថា រូបគេត្រូវបានប្រើពាក្យសម្តីប្រកាន់ពូជសាសន៍ អំឡុងការប្រកួតកាលពីថ្ងៃទី ១៣ ខែកញ្ញា ហើយ PSG ស្នើសុំឱ្យ LFP ស៊ើបអង្កេតករណីនេះ។ Neymar ក៏ស្ថិតក្រោមការអង្កេតដែរ ពីការចោទប្រកាន់ថា បាននិយាយពាក្យស្រឡាញ់ភេទដូចគ្នាចំពោះ Gonzalez។
ជម្លោះមួយបានផ្ទុះឡើងនៅចុងបញ្ចប់នៃការប្រកួត ហើយកីឡាករ ៥ រូបរបស់ក្រុមទាំង ២ ត្រូវបានផ្ដល់កាតក្រហមក្នុងនោះក៏មាន Neymar ផងដែរ ដោយសារបានវាយក្បាលរបស់ Gonzalez ពីក្រោយ។
ក្រោយមានសេចក្ដីប្រកាសនេះ ក្រុម Marseille សរសេរអបអរតាមរយៈបណ្ដាញសង្គម Twitter របស់ខ្លួនថា៖ «Olympique de Marseille រីករាយជាមួយនឹងការសម្រេចរបស់គណៈកម្មការនៅយប់នេះ ចំពោះករណីរបស់ Alvaro Gonzalez។ Gonzalez មិនមែនជាជនប្រកាន់ពូជសាសន៍ឡើយ។ រាល់ការចោទប្រកាន់ណាមួយចំពោះរូបគេពាក់ព័ន្ធនឹងបញ្ហាបែបនេះ គឺអយុត្តិធម៌ និងគ្មានមូលដ្ឋានច្បាស់លាស់ឡើយ។ ក្រុម Olympique de Marseille គឺជាក្លិបហើយនឹងនៅតែជាក្លិប ១ ដែលប្រឆាំងដាច់ខាតនឹងការនិយាយរើសអើងពណ៌សម្បុរ»៕ AFP/VN