ភ្នំពេញ៖ វត្តសន្ធរ ស្ថិតនៅភូមិសន្ធរ ឃុំសន្ធរ ស្រុកខ្សាច់កណ្តាល ខេត្តកណ្តាល ដែលមានចម្ងាយឆ្ងាយជាងវត្តវិហារសួគ៌ជិត ៥ គីឡូម៉ែត្រនោះ គឺជាទីតាំង ដែលមានការរៀបចំការប្រណាំងក្របី ធំជាងនៅវិហារសួគ៌ទៅទៀត ហើយតាមគណៈកម្មការរៀបចំការប្រកួតកីឡាប្រពៃណី នៅទីនោះបានប្រាប់ថា ភ្ញុំបិណ្ឌធំ ថ្ងៃសៅរ៍ ទី ២៨ ខែ កញ្ញា ឆ្នាំនេះ ចំនួនក្របីអាចកើនឡើងដល់ជាង ៣០ គូ។ ចំណែកការប្រណាំងសេះ និងប្រកួតចំបាប់បុរាណ ក៏ត្រូវបានរៀបចំឲ្យមានការប្រកួតនៅទីនោះផងដែរ។
បើទោះបីជាការប្រកួតកីឡាប្រពៃណីនៅសន្ធរ ហាក់មិនសូវមានភាពល្បីល្បាញ ដូចការប្រកួតកីឡាប្រពៃណីនៅវិហារសួគ៌ ប៉ុន្តែលោក ស៊ឹម សេស បានអះអាងថា ការប្រកួតកីឡាប្រពៃណីនៅសន្ធរ គឺមានទ្រង់ទ្រាយធំប្រហាក់ប្រហែលនៅវិហារសួគ៌ ហើយក៏មានអាយុកាល យូរឆ្នាំដូចគ្នា គ្រាន់តែនៅសន្ធរ មិនមានការផ្សព្វផ្សាយឲ្យបានទូលំទូលាយដូចនៅវិហារសួគ៌។
លោក ស៊ឹម សេស ដែលជាគណៈកម្មការមួយរូប ក្នុងការប្រកួតកីឡាប្រពៃណីនៅសន្ធរ បានប្រាប់ភ្នំពេញប៉ុស្តិ៍ កាលពីថ្ងៃពុធថា៖ «ការប្រណាំងក្របី សេះ និងការប្រកួតចំបាប់បុរាណនៅសន្ធរនេះ គឺជាការរួមគ្នាធ្វើ ដោយការស្ម័គ្រចិត្តពីសំណាក់ប្រជាពលរដ្ឋ មេភូមិ មេឃុំ មេប៉ុស្តិ៍ និងព្រះចៅអធិការវត្តសន្ធរ ហើយការប្រកួតកីឡាប្រពៃណីនេះ មានអាយុកាលយូរលង់ណាស់មកហើយ ដោយយើងបាននាំគ្នាធ្វើបន្តពីជីដូនជីតារបស់យើង ហើយទំហំនៃការរៀបចំ និងចំនួនអ្នកចូលរួមទស្សនា គឺប្រហាក់ប្រហែលនៅវិហារសួរដែរ គ្រាន់តែថា នៅវិហារសួគ៌មានការផ្សព្វផ្សាយបានទូលំទូលាយ ជាងនៅសន្ធររបស់យើង»។
តាមលោក ស៊ឹម សេស បានឲ្យដឹងដែរថា សម្រាប់ការប្រកួតកីឡាប្រពៃណីនៅសន្ធរ កាលថ្ងៃភ្ជុំបិណ្ឌធំ កាលពីឆ្នាំ ២០១៨ គឺមានការប្រណាំងក្របីជិត ៣០ គូ ប្រណាំងសេះជិត ៣០ គូ និងមានការប្រកួតចំបាប់បុរាណជិត ៤០ គូ ហើយចំនួននេះ គឺច្រើនជាងការប្រណាំងក្របី និងសេះ នៅវិហារសួគ៌ ដែលមានក្របីត្រឹម ១៩ គូ សេះចំនួន ២៥ គូ ខណៈចំនួនក្របី នៅវិហារសួគ៌ ឆ្នាំនេះ មានការថយចុះជាងឆ្នាំមុនតែនៅសន្ធរ អាចកើនឡើងជាងឆ្នាំមុន។
លោក ស៊ឹម សេស បានបញ្ជាក់ថា៖ «សម្រាប់ការប្រណាំងក្របី សេះ និងប្រកួតចំបាប់បុរាណ ថ្ងៃភ្ជុំបិណ្ឌធំឆ្នាំនេះ យើងនៅមិនទាន់ដឹងចំនួនច្បាស់នៅឡើយទេ គឺដល់ថ្ងៃនោះ ទើបដឹងច្បាស់ ព្រោះទាំងចំនួនក្របី សេះ និងអ្នកចំបាប់ សុទ្ធតែបានចូលរួមដោយការស្ម័គ្រចិត្ត ប៉ុន្តែខ្ញុំជឿថា នឹងកើនជាងឆ្នាំមុន ពិសេសចំនួនក្របី ព្រោះនៅទីនេះប្រជាពលរដ្ឋរបស់យើង នៅតែបន្តចិញ្ចឹមក្របីទុកមើល ដោយសារពួកគាត់ស្រឡាញ់ និងទុកវា សម្រាប់យកប្រណាំងគ្នានៅថ្ងៃភ្ជុំបិណ្ឌធំនេះ គឺយើងនាំគ្នាថែរក្សា មិនចង់ឲ្យកីឡាប្រពៃណីរបស់ដូនតានេះ បាត់បង់នោះទេ»។
យ៉ាងណាក៏ដោយ សម្រាប់ការប្រកួតកីឡាប្រពៃណី ដែលធ្លាប់ធ្វើនៅក្នុងបរិវេណវត្តសន្ធរ កន្លងមកនេះ គឺនៅឆ្នាំនេះ នឹងយកមកធ្វើនៅក្នុងសាលាទួលបាសាន ជិតវត្តសន្ធរវិញម្តង ដោយសារទីធ្លានៅក្នុងវត្តសន្ធរ ពេលនេះត្រូវបានព្រះចៅធិការវត្ត ដាំដូង និងដើមឈើទៅហើយ។
តាមលោក ស៊ឹម សេស បានឲ្យដឹងថា ការប្រណាំងក្របី និងសេះ នឹងធ្វើចន្លោះពីម៉ោង ៦ ដល់ម៉ោង ៧ ព្រឹក នាថ្ងៃទី ២៨ ខែកញ្ញ ហើយពីម៉ោង ៩ ដល់ម៉ោង ១២ ជាការប្រកួតចំបាប់បុរាណ។
ចំណែកលោក ចាប លឿន គ្រូបង្វឹកថ្នាលក្រុមជម្រើសជាតិចំបាប់កម្ពុជា និងជាគណៈកម្មការរៀបចំការប្រកួតកីឡាប្រពៃណី ១ រូប នៅវិហាសួគ៌ បានទទួលស្គាល់ថា៖ «ក្របី ដែលយកទៅប្រណាំងនៅសន្ធរ ពិតជាមានចំនួនច្រើនជាងនៅវិហារសួគ៌ ដោយសារតែអ្នកភូមិនៅទីនោះ មានការចិញ្ចឹមក្របីច្រើនជាងអ្នកភូមិនៅវិហារសួគ៌»។
ជាមួយគ្នានេះ លោក ចាប លឿន ក៏គ្រោងនឹងទៅពិនិត្យមើលអ្នកចំបាប់វ័យក្មេង មានទេពកោសល្យនៅសន្ធរ ផងដែរ។
លោកបានប្រាប់ថា៖ «នៅឆ្នាំនេះ ខ្ញុំនឹងឆ្លៀតនាំក្មេងៗមួយក្រុម ទៅមើលការប្រកួតកីឡានៅសន្ធរ ថាតើមានការផុសផុលបែបណាដែរ? ពិសេសខ្ញុំចង់មើលទៅលើក្មេងៗ ដែលបានចូលរួមប្រកួតចំបាប់នៅទីនោះ ក្រែងលោឃើញអ្នកមានទេពកោសល្យល្អ និងមានកាយសម្បទាល្អ ដែលយើងអាចយកមកបណ្តុះបណ្តាលក្នុងក្រុមថ្នាលរបស់យើងបាន»៕