.jpg)
លោក ទៀ វិញ និងមន្ត្រីផ្សេងទៀតដែលបានចូលរួមក្នុងមហាសន្និបាត។ ស្រេង ម៉េងស្រ៊ុន
ភ្នំពេញៈ សហព័ន្ធកីឡាទូកកានូ និងរ៉ូអ៊ីងកម្ពុជាបានធ្វើមហាសន្និបាតបញ្ចប់អាណត្តិទី ៣ និងបោះឆ្នោតជ្រើសរើសថ្នាក់ដឹកនាំដែលជាគណៈកម្មាធិការប្រតិបត្តិអាណត្តិទី ៤ សម្រាប់ឆ្នាំ ២០១៩ ដល់ ២០២៣ ខណៈសមាសភាពទាំង ៣៣ រូបភាគច្រើនជាមន្ត្រីជាន់ខ្ពស់មានតំណែងធំៗក្នុងរាជរដ្ឋាភិបាល ព្រមទាំងជាអភិបាលខេត្ត និងរាជធានីភ្នំពេញ ២៥ នាក់ដែរ។
នៅក្នុងមហាសន្និបាតដែលធ្វើនៅទីស្នាក់ការ NOCC កាលពីថ្ងៃអង្គារក្រោមអធិបតីភាពលោកនាយឧត្តមនាវី ទៀ វិញ អគ្គមេបញ្ជាការរង មេបញ្ជាការកងទ័ពជើងទឹក និងជាអនុប្រធានសហព័ន្ធកីឡាទូកកានូ និងរ៉ូអ៊ីងកម្ពុជានោះ មានសមាជិកចំនួន ៣៣ នាក់ទទួលបានការគាំទ្រតាមរយៈការបោះឆ្នោតក្នុងនោះលោកឧបនាយករដ្ឋមន្ត្រី ស ខេង ត្រូវបានបន្តគាំទ្រឲ្យធ្វើជាប្រធានសហព័ន្ធលោក ឃួង ស្រេង អភិបាលរាជធានីភ្នំពេញលោក ទៀ វិញ លោកម៉ៅ ភិរុណ និងលោក ប៉ាន សូរស័ក្តិ ជាអនុប្រធាន ឯលោក មាស សារិន ជាអនុប្រធានអចិន្ត្រៃយ៍ និង ជា ប៊ុនហេង ជាអគ្គលេខាធិការ និងកញ្ញា មាស តឿ ជាអគ្គហេរញ្ញិក។
បន្ថែមលើសពីនេះមានសមាជិកប្រតិបត្តិបន្ថែមទៀតគឺជាអភិបាលខេត្តចំនួន ២៣ ទៀតគឺមានខេត្តកំពង់ចាម កែប កំពង់ធំ រតនគិរី សៀមរាប កំពង់ស្ពឺ ក្រចេះ ឧត្តរមានជ័យ បាត់ដំបង ព្រៃវែង មណ្ឌលគិរី ត្បួងឃ្មុំ ព្រះសីហនុ ស្វាយរៀង កំពង់ឆ្នាំង តាកែវ កំពត កោះកុង បន្ទាយមានជ័យ ស្ទឹងត្រែង និងខេត្តព្រះវិហារ ហើយនៅមានអនុប្រធាន និងសមាជិកកិត្តិយស ៦ នាក់ទៀតដែលគណៈកម្មាធិការប្រតិបតិ្តសម្រេចជូនលោក នូ សាខន និង ឡុច សារិន ជាអនុប្រធានកិត្តិយស រីឯលោក ស្រេង សេង លោក ទេស សូ លោក ពិន ដារ៉ា និងលោក ប៊ុន បូរ៉ាន់ ជាសមាជិកកិត្តិយស។
លោក មាស សារិន ថ្លែងថា៖ «សហព័ន្ធកីឡាទូកកានូ និងរ៉ូអ៊ីងកម្ពុជាអាណត្តិទី ៤ មានមន្ត្រីជាន់ខ្ពស់ច្រើនក្នុងនោះយើងមានបេក្ខនារីម្នាក់បន្ថែមសម្រាប់ធ្វើសវនកម្មឲ្យសហព័ន្ធដែលមានជំនាញផ្នែកទីផ្សារ និងគ្រប់គ្រងផ្នែកហិរញ្ញវត្ថុ ដែលទទួលបានការបោះឆ្នោតទុកចិត្តពីគណៈកម្មការប្រតិបត្តិសហព័ន្ធគឺកញ្ញា សួង ចាន់តូរ៉ាទី»។
ចំណែកលោក ជា ប៊ុនហេង ដែលប្រធានអង្គភាពកីឡាក្រសួងមហាផ្ទៃផងនោះបានថ្លែងថា៖ «ខ្ញុំមិនចេះនិយាយច្រើនទេ ប៉ុន្តែការងារកីឡាដឹងតែដឹកនាំគ្រប់គ្រងឲ្យឈ្នះមេដាយបាន ហើយសហព័ន្ធដែលអាចឈានទៅជោគជ័យបានត្រូវមានរចនាសម្ព័ន្ធគ្រប់គ្រងល្អ គឺមានគណៈកម្មការអចិន្ត្រៃយ៍ និងគណៈកម្មការជំនាញដែលអាចឈានរហូតដល់ ៨ រួមមាន គណៈកម្មការរៀបចំប្រកួត គណៈកម្មការចៅក្រមអាជ្ញាកណ្តាល គណៈកម្មការគ្រូបង្វឹក គណៈកម្មការហិរញ្ញវត្ថុ និងទីផ្សារ គណៈកម្មការស្ត្រី និងកីឡា គណៈកម្មការអត្តពលិក និងគណៈកម្មការព័ត៌មាន និងផ្សព្វផ្សាយ»។
ទោះជាយ៉ាងណាមន្ត្រីជំនាញកីឡាម្នាក់បានប្រាប់ភ្នំពេញ ប៉ុស្តិ៍ ដោយសុំមិនឲ្យបញ្ចេញឈ្មោះថា សហព័ន្ធដែលមានសមាសភាពអ្នកធំចូលជាគណៈកម្មការប្រតិបត្តិគឺគ្មានបានការទេគឺលំបាកណាត់មកប្រជុំណាស់ ព្រោះអ្នកធំរវល់ច្រើន ហើយការពិតគ្រាន់តែមានឈ្មោះលម្អឲ្យសហព័ន្ធប៉ុណ្ណោះ។ តាមពិតកីឡារីកចម្រើនទៅមុខ វានៅលើតួនាទីប្រធាន និងអគ្គលេខាធិការ ដែលដឹកនាំគ្រប់គ្រងផ្ទាល់។
ប្រភពដដែលបន្ថែមថាបើតាមបទបញ្ជា និងច្បាប់កីឡា គណៈកម្មការប្រតិបត្តិដែលឈរឈ្មោះ ឬជាប់ឆ្នោតមិនអាចអវត្តមានក្នុងមហាសន្និបាតនោះទេ ប៉ុន្តែបេក្ខភាពជាប់ឆ្នោត ២ រូបដែលគេអាចវាយតម្លៃបានថា ជាអ្នកមានជំនាញដឹកនាំពិតប្រាកដនោះមានលោក មាស សារិន ជាអ្នកមានជំនាញកីឡាស្រាប់ និង លោក ជា ប៊ុនហេង ជាអ្នកជំនាញរៀបចំប្រកួតជាមនុស្សសំខាន់ក្នុងសហព័ន្ធនេះ៕
