ភ្នំពេញ៖ ទូកចំនួន ២៩៧ មកពី ១៩ ខេត្ត និងរាជធានី ព្រមទាំង ៦ ស្ថាប័ន សរុបមាន ២៥ ប្រតិភូត្រូវបានគណៈកម្មការរៀបចំការប្រកួត ត្រៀមរួចរាល់អស់ហើយ ដើម្បីដាក់ឲ្យប្រកួតគ្នា ក្នុងពិធីបុណ្យអុំទូកបណ្តែតប្រទីប និងអកអំបុក សំពះព្រះខែ រយៈពេល ៣ ថ្ងៃ ពីថ្ងៃទី ១០ ដល់ថ្ងៃទី ១២ ខែវិច្ឆិកា ឆ្នាំ ២០១៩ ខាងមុខនេះ នៅខាងមុខព្រះបរមរាជវាំង ក្រោមការអនុញ្ញាតរបស់រាជរដ្ឋាភិបាលកម្ពុជា។
លោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា និងជាអនុប្រធានអចិន្រ្តៃយ៍នៃគណៈកម្មការរៀបចំបុណ្យអុំទូក ព្រមទាំងជាប្រធានគណៈកម្មការមេប្រយោគបានប្រាប់ភ្នំពេញប៉ុស្តី កាលពីថ្ងៃអង្គារថា ក្រុមការងារ និងគណៈកម្មការគ្រប់ផ្នែក បានត្រៀមលក្ខណសម្បត្តិរួចជាស្រេចអស់ហើយ ហើយតាមការត្រៀមនោះ គឺមានទូកសរុប ២៩៧ ទូក ចូលរួមអបអរសាទរក្នុងពិធីបុណ្យអុំទូក បណ្តែតប្រទីប និងអកអំបុក សំពះព្រះខែ រយៈពេល ៣ ថ្ងៃចាប់ពីថ្ងៃទី ១០ ដល់ថ្ងៃទី ១២ ខែវិច្ឆិកា។
លោក ប៊ូ ជុំសេរី បានបន្ថែមថា៖ «កម្មវិធីប្រកួត នឹងប្រារព្ធដូចឆ្នាំមុនៗ គឺនៅទន្លេចតុមុខ ខាងមុខព្រះបរមរាជវាំង ពីព្រឹកម៉ោង ១១ តទៅ រហូតបញ្ចប់ ចាប់តាំងពីថ្ងៃទី ១០ ដល់ថ្ងៃទី ១២ ខែវិច្ឆិកា ប៉ុន្តែគ្រប់ស្ថាប័ន ឬប្រតិភូដឹកនាំអត្តពលិក មកទាំងអស់ត្រូវបានសម្រួលឲ្យស្នាក់នៅហូបចុក តែមួយកន្លែងខាងត្រើយម្ខាង នៅចំណុចច្រាំងទន្លេងខាងកើត គឺមិនអនុញ្ញាតឲ្យមកត្រើយខាងលិចទេ»។
តាមរបាយការណ៍របស់គណៈកម្មការបច្ចេកទេសរៀបចំការប្រណាំងទូក និងការប្រាប់បន្ថែមពីលោក ប៊ូ ជុំសេរី បានឲ្យដឹងលម្អិតថា នៅក្នុងចំនួនទូកសរុប ២៩៧ នោះ មានប្រភេទទូកអុំបុរស ចំនួន ១៦៧ ទូកផ្នែកនារីចំនួន ៥ ហើយមានទូកចែវមកពីខេត្តចំនួន ៣០ ទូក (ផ្នែកនារីមាន ២ ទូក)។ រីឯប្រភេទខ្នាតទូកអន្តរជាតិចំនួន ៩៥ ទូក ដែលសរុបកីឡាករកីឡាការិនីមានចំនួន ១៩ ២១៨ នាក់ គឺប្រហាក់ប្រហែលឆ្នាំមុនៗដែរ។
ទាក់ទងទៅនឹងជីវភាពការហូបចុកស្នាក់នៅ ប្រចាំថ្ងៃរបស់អត្តពលិកចំនួនជិត ២០ ០០០ នេះ ប្រភពពីគណៈកម្មការរៀបចំប្រកួតបានឲ្យដឹងថា សាមីប្រតិភូនីមួយៗ ជាអ្នកទទួលបន្ទុកខ្លួនឯង ដោយមានថ្នាក់ដឹកនាំ ឬក្រុមហ៊ុនសប្បុរសជន ឧបត្ថម្ភគាំទ្រតាមការនិយមចូលចិត្ត និងស្ម័គ្រចិត្ត ដែលមានលក្ខណៈជាតិនិយម តាមប្រពៃណីតាំងពីបុរាណកាល។
បន្ថែមលើនេះ ថវិកាជាតិសម្រាប់ផ្តល់ជាប្រាក់រង្វាន់ជូនដល់អត្តពលិក គឺដូចបណ្តាឆ្នាំមុនៗដែរ គឺនឹងផ្តល់ជូនទៅតាមចំណាត់ថ្នាក់ជយលាភី ហើយក្នុងកីឡាករកីឡាការិនីម្នាក់ៗ នឹងទទួលបានប្រាក់ថ្លៃអាហារបន្ថែមចំនួន ៣០ ០០០ រៀល ក្នុងរយៈពេល ៣ ថ្ងៃ ក្នុងអត្តពលិកសរុប ១៩ ២១៨ នាក់នេះ។
យ៉ាងណាក៏ដោយ សម្រាប់ការប្រណាំង ឬប្រកួតអុំទូក ក្នុងពិធីបុណ្យអុំទូក បណ្តែតប្រទីប និងអកអំបុក សំពះព្រះខែ រយៈពេល ៣ ថ្ងៃនេះ គឺជាធម្មតា ទោះបីប្រាក់រង្វាន់ទទួលបានពីគណៈកម្មការ មានចំនួនតិច ប៉ុន្តែតាមវិស័យឯកជន និងសប្បុរសធម៌ បានចូលរួមឧបត្ថម្ភលើកទឹកចិត្តឲ្យកីឡាករ កីឡាការិនី ទទួលបានការហូបចុក បានគ្រប់គ្រាន់ដែលធ្វើឲ្យពួកគាត់ពេញចិត្តពេញថ្លើម ក្នុងការចូលរួមតាំងតែពីដើមមក៕