ភ្នំពេញ: កីឡាករ ទេស ជីវ៉ា បានប្រឹងអស់ពីលទ្ធភាពពេលប៉ះជាមួយកីឡាករថៃ Chen Luop មុននឹងទទួលបានត្រឹមលទ្ធផលស្មើគ្នាក្នុងការប្រកួតប្រដាល់គុនខ្មែរលក្ខណៈមិត្តភាពអន្តរជាតិភេសជ្ជៈ Boostrong កាលពីព្រឹកថ្ងៃអាទិត្យ ទី ២០ ខែមករា ឆ្នាំ ២០១៩ នៅសង្វៀនអាស៊ីអាគ្នេយ៍ (SEA-TV)។ ចំណែកការប្រកួតវគ្គជម្រុះសន្សំពិន្ទុដណ្តើមយកខ្សែក្រវាត់ភេសជ្ជៈប៉ូវកម្លាំងខារ៉ាបាវកាលពីល្ងាចថ្ងៃសៅរ៍ កីឡាករជើងថ្មី ធន់ មករា បានទទួល ៣ ពិន្ទុក្រោយពីយកឈ្នះជើងខ្លាំងថៃ Banasak ដោយពិន្ទុក្នុងការតស៊ូចំនួន ៥ ទឹកពេញ។
ដូចគ្នានេះដែរកីឡាករ លាភ រដ្ឋា បានប្រើរយៈពេលតែចំនួន ២ ទឹកប៉ុណ្ណោះក្នុងការផ្តួលកីឡាករថៃ Dek Deur ឲ្យសន្លប់ដោយស្នៀតកែងបុកមុខកាណូតក្នុងការប្រកួតនៅសង្វៀន SEATV តែមួយ។
ការប្រកួតរបស់ ទេស ជីវ៉ា ជាមួយកីឡាករថៃ Chen Luop ជាជំនួបដ៏ជក់ចិត្តបំផុតសម្រាប់ការចង់បានរបស់ទស្សនិកជន។
កីឡាករ ទេស ជីវ៉ា ដែលមកពីក្លិបកងពលលេខ ៧០ មួយរយៈនេះកសាងកេរ្តិ៍ឈ្មោះល្បីគួរសម និងមានឱកាសបានឡើងប្រកួតលក្ខណៈអន្តរជាតិញឹកញាប់ផងដែរ។
នៅក្នុងការប្រកួតចំនួន ៥ ទឹកពេញ ទេស ជីវ៉ា វាយបានល្អតែដើមទឹក និងមានប្រៀបទឹកទី ៣ និងទឹកទី ៤ ប៉ុន្តែកីឡាករថៃវាយបកវិញដោយស្នៀតទាត់ និងជង្គង់នៅចុងទឹក ខណៈដែលការប្រកួតចំនួន ២ ទឹកដំបូងប្រហាក់ប្រហែលគ្នា។
ក្រោយការប្រកួតបូកសរុបលទ្ធផលពីសំណាក់ចៅក្រមទាំង ៥ រួចមក ប្រធានវិនិច្ឆ័យគឺលោក ចាន់ សុទ្ធ បានបញ្ជាឲ្យប្រកាសលទ្ធផលស្មើគ្នាតែម្តង។ ជុំវិញបញ្ហានេះអ្នកទស្សនាភាគច្រើនគ្មានប្រតិកម្មទៅនឹងការសម្រេចលទ្ធផលឲ្យស្មើនោះទេ ប៉ុន្តែក្រុមអ្នកភ្នាល់លុយក្បែរៗសង្វៀនមានអ្នកខ្លះជេរគណៈកម្មការវិនិច្ឆ័យ និងមានអ្នកខ្លះគាំទ្រទៅវិញ។
ចំពោះបញ្ហានេះលោក ឯម ហៀង អនុប្រធានវិនិច្ឆ័យបានពន្យល់ថា៖ «ការសម្រេចឲ្យស្មើគ្នានេះសមរម្យនឹងទទួលយកបាន ពីព្រោះការប្រកួតលក្ខណៈមិត្តភាព ហើយការវាយចេញ ទេស ជីវ៉ា ល្អបានដើមទឹក ហើយកីឡាករថៃ Chen Luop ទទួលបានពិន្ទុល្អចុងទឹក អ៊ីចឹងលទ្ធផលស្មើសមរម្យនឹងទទួលយកបាន»។
ចំណែកគូដណ្តើមខ្សែក្រវាត់ខារ៉ាបាវវគ្គជម្រុះសប្តាហ៍ទី ២ រដូវកាលទី ៨ កីឡាករ លាភ រដ្ឋា មកពីក្លិបដីឡូត៍មានរិទ្ធ ខេត្តបន្ទាយមានជ័យបានវាយសន្ធាប់ទៅលើកីឡាករថៃ Dek Deur តាំងពីទឹកដំបូង និងបានបង្ខំឲ្យអាជ្ញាកណ្តាលរាប់នៅទឹកទី ២ ហើយបន្ថែមស្នៀតកែងពុះមុខកាណូតបង្ខំឲ្យកីឡាករថៃរូបនេះ ដួលប្រកាច់ងើបលែងរួចត្រឹមទឹកទី ២។ ជ័យជម្នះបានធ្វើឲ្យ លាភ រដ្ឋា ទទួលបាន ៣ ពិន្ទុឈរលំដាប់លើគេជាបណ្តោះអាសន្នក្នុងពូលខាងកម្ពុជា។
ជាមួយគ្នានេះកីឡាករ ធន់ មករា មកពីសមាគមប្រដាល់ក្រសួងការពារជាតិ បានប៉ះចំកីឡាករថៃដែលមានសមត្ថភាពរឹងមាំគួរឲ្យកត់សម្គាល់ ហើយទោះបីរូបគេបានប្រើស្នៀតជង្គង់ល្អ និងកែងច្បាស់ក៏ដោយ ប៉ុន្តែនៅតែមិនអាចផ្តួលកីឡាករថៃ Banasak ឲ្យសន្លប់ឡើយ។
ក្នុងការប្រកួតចំនួន ៥ ទឹកពេញ កីឡាករ ធន់ មករា បានឈ្នះត្រឹមពិន្ទុ ហើយក៏មិនទាន់អស់សង្ឃឹមដែរ ពីព្រោះកីឡាករម្នាក់ៗនៅសល់ការប្រកួតចំនួន ៣ លើកទៀតឯណោះ ក្រោយពីការឈ្នះដោយពិន្ទុជាឯកច្ឆន្ទរបស់គេ៕