.jpg)
ទេស សំខាន់ កំពុងរង់ចាំជំនួយ នៅមន្ទីរពេទ្យ ក្រោយវះកាត់រួច។ សហការី
ភ្នំពេញ៖ អ្នកប្រដាល់ ទេសសំខាន់ ដែលចាប់អាជីពរកប្រាក់ពីសង្វៀនប្រដាល់អស់ពេលជាង ១០ ឆ្នាំមកហើយនោះ បានរងរបួសបាក់ឆ្អឹងប្រអប់ដៃម្តងទៀត និងបានចូលវះកាត់រួចរាល់កាលពីថ្ងៃចន្ទ ប៉ុន្តែ សំខាន់ បានអះអាងថា «បើទោះបីជាខ្ញុំបានប្រឈមនឹងគ្រោះថ្នាក់ច្រើនលើកច្រើនសា ក៏ខ្ញុំនៅតែមិនបោះបង់មុខរបរប្រដាល់មួយនេះដែរ គឺពេលជាសះស្បើយ ខ្ញុំនឹងឡើងប្រកួតទៀត ទៅតាមសមត្ថភាព និងលទ្ធភាពជាក់ស្តែង»។
សម្រាប់ការប្រកួតនៅលើសង្វៀន CNC កាលពីថ្ងៃសៅរ៍ កន្លងមកនោះ ទេស សំខាន់ ដែលធ្លាប់ជាជើងខ្លាំងជួរមុខរបស់កម្ពុជាមួយរូបនេះ ត្រូវបានដាក់ឱ្យប្រកួតក្នុងទម្ងន់ ៧១ គីឡូក្រាម ជាមួយអ្នកប្រដាល់ជើងចាស់ លួន សុខខេង ត្រឹមជាគូបើកឆាកទី១ ហើយលទ្ធផល សំខាន់ បានចាញ់ សុខខេង ដោយពិន្ទុ ប៉ុន្តែចប់ការប្រកួត ទេស សំខាន់ បានឈឺចុកចាប់ខ្លាំងនឹងបានទៅពិនិត្យ និងថតឆ្លុះនៅមន្ទីរពេទ្យ ទើបឃើញថា បាក់ឆ្អឹងប្រអប់ដៃ ព្រោះរងស្នៀតទាត់យ៉ាងធ្ងន់របស់ លួង សុខខេង។
ទេស សំខាន់ បានចាប់អាជីពឡើងប្រដាល់អស់រយៈពេល ១៣ ឆ្នាំ ដែលធ្លាប់ប្រកួតប្រហែល ៤០០ ដង ហើយនៅក្នុងវដ្តនេះ ទេស សំខាន់ ធ្លាប់គ្រប់គ្រងខ្សែក្រវាត់ ២ ស្ថាប័ន គឺខ្សែក្រវាត់លីអូ ទម្ងន់ ៦០ គីឡូក្រាម នៅសង្វៀន CNC និងខ្សែក្រវាត់ Black Panter នៅក្នុងទម្ងន់ ៦៣,៥ គីឡូក្រាម ក្នុងឆ្នាំ ២០១៥ នៅសង្វៀនប៉ុស្តិ៍លេខ ៣ ព្រមទាំងបានឈ្នះពាន និងជើងឯករងជាច្រើនទៀត។
ប៉ុន្តែរយៈពេល ៥ ឆ្នាំចុងក្រោយនេះ ទេស សំខាន់ បានជួបគ្រោះថ្នាក់ធ្ងន់ធ្ងរពីសង្វៀនប្រកួត ចូលវះកាត់ធំចំនួន ៥ លើក រាប់ទាំងលើកនេះ ប៉ុន្តែគ្រប់ពេលដែលបានព្យាបាលជាសះស្បើយហើយ កីឡាកររូបនេះនៅតែប្តេជ្ញាចិត្តថា បន្តអាជីពមួយនេះ ដោយអះអាងថា បើប្រកួតលែងកើត ក៏សុំធ្វើគ្រូបង្វឹកដែរ។
ទេស សំខាន់ បានរៀបរាប់ពីជីវិតកម្សត់ក្នុងអាជីពប្រដាល់នេះថា៖ «នៅឆ្នាំ ២០១៥ ខ្ញុំរងរបួសធ្ងន់បាក់ឆ្អឹងថ្គាមចំនួន ២ លើក ដោយកីឡាករថៃ ទាត់ចូលសន្លប់តែម្តង។ បន្ទាប់មកការប្រកួតឆ្នាំ ២០១៧ នៅសង្វៀន SEATV ខ្ញុំត្រូវបានដៃគូបុកជង្គង់ចូលពោះ បណ្តាលឱ្យដាច់ពោះវៀន ចូលព្យាបាលនៅពេទ្យកាល់ម៉ែត វះកាត់ ២ លើកទៀត ហើយបន្ទាប់មកបានព្យាបាលរបួសចាស់នេះ នៅមន្ទីរពេទ្យកេតុមាលាបន្ថែមទៀត»។
«ចំណែកថ្ងៃនេះ ខ្ញុំជួបគ្រោះថ្នាក់បាក់ឆ្អឹងប្រអប់ដៃ និងបានចូលវះកាត់រួចរាល់ហើយ នៅមន្ទីរពេទ្យចំរើន ដោយអស់ប្រាក់ជិត ១ ០០០ ដុល្លារ ហើយពេលនេះ លោកគ្រូពេទ្យរបស់សហព័ន្ធកីឡាប្រដាល់គុនខ្មែរ កំពុងសរុបការចំណាយ ដើម្បីរាយការណ៍ជូនខាងម្ចាស់សង្វៀន និងថ្នាក់ដឹកនាំ សុំថវិកាព្យាបាល»។
ទោះជាយ៉ាងណា គិតត្រឹមល្ងាចថ្ងៃចន្ទម្សិលមិញ ទេស សំខាន បានប្រាប់ថា ពុំទាន់មានខាងណាឧបត្ថម្ភនៅឡើយ ស្របពេលដែលប្រពន្ធរបស់គេបានចូលវះកាត់ដកឆ្អឹងជើងចេញដោយសារគ្រោះថ្នាក់ចរាចរណ៍ផងដែរ។ ទេស សំខាន់ បញ្ជាក់ថា៖ «ខ្ញុំរងរបួសធ្ងន់ៗកន្លងមក ក៏ធ្លាប់ទទួលបានប្រាក់ពីសប្បុរសជនផងដែរ ដើម្បីជួយជីវភាពដ៏ខ្វះខាតរបស់ខ្ញុំ ពេលលំបាកហើយពេលនេះដែរ ខ្ញុំសុំក្ដីមេត្តាពីថ្នាក់ដឹកនាំ និងសប្បុរសជនជួយឧបត្ថម្ភដល់ខ្ញុំផង»៕
