ភ្នំពេញ៖ ជាមួយបទពិសោធធ្លាប់លេងកីឡាចំនួន ៥ ប្រភេទ ដោយប្រើពេលអស់ជិត ២០ ឆ្នាំ ទ្រី សុថាវី នៅពេលបច្ចុប្បន្នបាននិងកំពុងបំពេញការងារជាមន្ត្រីស្ម័គ្រចិត្តរបស់គណៈកម្មាធិការជាតិអូឡាំពិកកម្ពុជា (NOCC) និងមានក្របខ័ណ្ឌជាកងទ័ពនៃមជ្ឈមណ្ឌលកីឡាកងយោធពលខេមរភូមិន្ទ បន្ទាប់ពីនាងបានចំណាយពេលច្រើនឆ្នាំក្នុងសកម្មភាពកីឡា មានយូដូ ចំបាប់ ប្រដាល់ល្បុក្កតោ និងបាញ់កាំភ្លើង។
ទោះជា ទ្រី សុថាវី ទទួលបានលទ្ធផលល្អប្រសើរនៅក្នុងប្រភេទកីឡាទាំង ៥ នេះ ប៉ុន្តែស្រ្តីមានកម្លាំង និងកាយសម្បទារឹងមាំដូចបុរសរូបនេះ នៅតែចិញ្ចឹមចិត្តចង់ក្លាយខ្លួនជាគ្រូបង្វឹកកីឡាចំបាប់ ខណៈឱកាសដែលរង់ចាំនោះ ហាក់នៅឆ្ងាយព្រោះទីតាំងដែល ទ្រី សុថាវី ចង់បាននេះ គឺស្ថិតក្នុងការប្រជែងមួយដ៏លំបាកក្នុងបេក្ខភាពជាច្រើនប៉ងប្រាថ្នា។
ក្នុងវ័យ ៣៩ ឆ្នាំ ក្នុងឆ្នាំនេះ ទ្រី សុថាវី បានរៀបរាប់ពីប្រវត្តិក្នុងសកម្មភាពកីឡាដែលបានចាប់ផ្តើមពីកុមារភាពក្នុងគ្រួសារ ដែលមានបងប្អូនឪពុកម្តាយ មិនចូលចិត្ត និងគាំទ្រសោះឡើយ។ មិនតែប៉ុណ្ណោះ ក្នុងការលួចមកហ្វឹកហាត់ម្តងៗ ពេលត្រឡប់ទៅផ្ទះវិញ សុថាវី ត្រូវបានម្តាយវ៉ៃ និងស្តីបន្ទោស ដោយមិនអនុញ្ញាតឲ្យហ្វឹកហាត់លេងកីឡានោះឡើយ។
ជាកូនទី ២ ក្នុងគ្រួសារអ្នករកស៊ីលក់ដូចធម្មតា មានលំនៅក្នុងទីក្រុងភ្នំពេញ និងមានបងប្អូនបង្កើតចំនួន ៦ នាក់ ទ្រី សុថាវី បាននិយាយថា៖ «ខ្ញុំបានជាប់ចិត្តចូលហាត់កីឡាយូដូមុនគេ នៅស្តាតអូឡាំពិក កាលពីឆ្នាំ ១៩៩៦ ហើយ ៣ ឆ្នាំក្រោយមក ខ្ញុំបានចេញទៅប្រកួតជើងឯក នៅវៀតណាមក្នុងឆ្នាំ ២០០០ និងទទួលបានចំណាត់ថ្នាក់លេខ ៤ គឺជិតបានជយលាភីមេដាយ ក្នុងចំណាត់ថ្នាក់លេខ ៣ ទៅហើយ»។
«បន្ទាប់មក ខ្ញុំបានចូលហ្វឹកហាត់កីឡាចំបាប់វិញ ជាមួយលោកគ្រូ វ៉ាត់ ចំរើន ដែលកាលនោះ គាត់ជាគ្រូបង្វឹកផង និងអ្នកគ្រប់គ្រងផង ហើយខ្ញុំបានជាប់ជាជម្រើសជាតិ នៅឆ្នាំ ២០០១ មករហូត។ នៅឆ្នាំ ២០០៣ ខ្ញុំបានចេញទៅប្រកួតស៊ីហ្គេមនៅប្រទេស វៀតណាម ទទួលបានចំណាត់ថ្នាក់លេខ ៤ ទៀត ហើយជាបន្តបន្ទាប់រហូតដល់ឆ្នាំ ២០១៥ ខ្ញុំនៅតែជាក្រុមជម្រើសជាតិ»។
យ៉ាងណាក៏ដោយ សម្រាប់ការប្រកួតកីឡាចំបាប់ជើងឯកអាស៊ីអាគ្នេយ៍ ដែលកម្ពុជាធ្វើម្ចាស់ផ្ទះនោះ ទ្រី សុថាវី ឈ្នះបានមេដាយប្រាក់ បន្ទាប់ពីឈ្នះឡាវ ឈ្នះថៃ និងចាញ់កីឡាករវៀតណាម។ បន្ថែមលើនេះ ទ្រី សុថារី បានរកឃើញនូវជ័យជម្នះដ៏ធំបំផុត សម្រាប់ការចូលប្រឡូកក្នុងវិស័យល្បក្កតោ គឺការឈ្នះបានមេដាសមាស នៅក្នុងការប្រកួតកីឡាអាស៊ីលើឆ្នេរខ្សាច់ នៅប្រទេស វៀតណាម មុនពេលស្រ្តីម្នាក់នេះ បានបន្ថែមជំនាញ ១ ទៀត គឺអ្នកប្រដាល់ស្រ្តី។
ទ្រី សុថាវី បានបញ្ជាក់ថា៖ «នៅឆ្នាំ ២០១៦ ខ្ញុំបានទៅប្រកួតនៅដាណាំង ប្រទេស វៀតណាម ម្តងទៀត ផ្នែកកីឡាល្បុក្កតោ ហើយដណ្តើមបានមេដាយមាសតែម្តង។ ក្រោយចេញពីចំបាប់ ខ្ញុំហាត់ល្បុក្កតោ និងឡើងប្រកួតគុនខ្មែរផងដែរ ពីអំឡុងឆ្នាំ ២០១៧ ដល់ឆ្នាំ ២០១៨ ដោយខ្ញុំឡើងប្រដាល់គុនខ្មែរបានជាង ១០ លើក ដោយឈ្នះ ៨ ចាញ់តែ ២ លើកប៉ុណ្ណោះ គឺចាញ់ វី ស្រីខួច និងកីឡាការិនីនេប៉ាល់ នៅថ្ងៃទី ៨ ខែ ធ្នូ ឆ្នាំ ២០១៧»។
អតីតកីឡាការិនី ដែលបានផ្សារភ្ជាប់ជាមួយសកម្មភាពកីឡាយ៉ាងច្រើន ទ្រី សុថាវី បានបន្ថែមថា៖ «ដោយសារកម្លាំងធ្លាក់ចុះ ពេលខ្ញុំមានវ័យ ៣៨ ឆ្នាំ កាលពីឆ្នាំ ២០១៩ ខ្ញុំបានងាកមកហ្វឹកហាត់កីឡាបាញ់កាំភ្លើងឲ្យក្រសួងការពារជាតិ ព្រោះប្រើស្មារតី និងបច្ចេកទេសជំនួសកម្លាំងហើយនៅក្នុងការប្រកួតជម្រើសជាតិ ឆ្នាំ ២០១៩ នៅកងទ័ពឆត្រយោង ៩១១ ខ្ញុំទទួលបានមេដាយមាស ២ និងប្រាក់ ១ ខណៈបច្ចុប្បន្ន ថ្នាក់ដឹកនាំបានយកចិត្តទុកដាក់ ដោយបានផ្តល់ក្របខ័ណ្ឌជាកងយោធពលខេមរភូមិន្ទមានប្រាក់ខែផងដែរ»។
ទោះបីជាបានហែលឆ្លងបទពិសោធជាមួយប្រភេទកីឡាចម្រុះចំនួន ៥ និងមានការងារស្ម័គ្រចិត្ត នៅ NOCC ព្រមទាំងមានសមត្ថភាពអាចបំពេញការធ្វើជាគណៈកម្មការទៅលើប្រភេទកីឡាមួយចំនួនទៀតក៏ដោយ ប៉ុន្តែ ទ្រី សុថាវី មានការដក់ចិត្តខ្លាំង ទៅលើប្រភេទកីឡាចំបាប់ ដោយនាងមានក្តីស្រមៃថា ថ្ងៃណាមួយនឹងអាចក្លាយជាគ្រូចំបាប់ជម្រើសជាតិ។
ទ្រី សុថាវី បញ្ជាក់ថា៖ «ខ្ញុំស្ម័គ្រចិត្តបំពេញការងារជាមន្ត្រីរដ្ឋបាលរបស់ NOCC ហើយតាមបទពិសោធក្នុងសកម្មភាពកីឡាអស់រយៈពេល ២០ ឆ្នាំ ដោយឆ្លងកាត់ការហ្វឹកហាត់ និងប្រកួតកីឡាចំនួន ៥ ប្រភេទនោះ គឺខ្ញុំទទួលបានលទ្ធផលគួរជាទីមោទនៈ ប៉ុន្តែខ្ញុំនៅតែមានចិត្តចង់ក្លាយខ្លួនជាគ្រូបង្វឹកម្នាក់ឲ្យកីឡាចំបាប់។ ទោះបីយ៉ាងនេះក្តី ខ្ញុំនៅមានសង្ឃឹមតិច ព្រោះអ្វីៗនៅទីនោះ វាមានលក្ខណៈតូចចង្អៀត លំបាកនឹងទទួលបាន ទោះជាខ្ញុំមានសមត្ថភាព បទពិសោធច្រើនឆ្នាំក៏ដោយ»៕